Den norske kyrkja ULSTEIN SOKN VISITASMELDING

Den norske kyrkja ULSTEIN SOKN VISITASMELDING Visitas i Ulstein sokn 8. 13. november 2011 1

Innhald Visitasmelding 1. Statusrapport 1.1 Statistisk materiale samanlikna med sist visitas 1.2 Talet kyrkjelege handlingar samanlikna med sist visitas 2. Forventa utvikling i soknet 2.1. Demografisk fordeling og forventa folketalsutvikling 2.2. Konsekvensar for kommunen ved forventa tilflytting 2.3 Vedtekne planar 3. Aktivitet og utfordringar i kyrkjelyden 3.1 Gudstenesteliv 3.1.1 Gudstenestelivet i Ulstein sokn 3.1.2 Utfordringar for gudstenestelivet 3.2 Kyrkjemusikalsk verksemd 3.2.1 Den kyrkjemusikalske verksemda i Ulstein sokn 3.2.2 Utfordringar framover 3.3 Diakoni 3.3.1 Arbeidet ser slik ut 3.3.2 Utfordringar 3.4 Undervisning/trusopplæring 3.4.1 Arbeidet ser slik ut 3.4.2 Utfordringar 3.5 Ungdomsarbeidet 3.5.1 Arbeidet ser slik ut 3.5.2 Utfordringar 3.6 Arbeid for barn og barnefamiliar. 3.7 Byggeklossen open barnehage 3.8 Misjon Kultur og samarbeid med andre organisasjonar. 2

3.9 Sokneråd og utvalsarbeid 3.9.1 Struktur og medlemmer 3.9.2 Utfordringar 4. Bemanningssituasjonen 4.1 Statlege stillingar 4.2 Fellesrådsstillingar 4.3 Stillingsbehov 5. Eigedomar i soknet 6. Økonomi 7. Soknerådsleiar sine tankar på vegner av Ulstein sokneråd og fellesråd 8. Oppsummering 3

1. Statusrapport: Ulstein sokn vart visitert av biskopen i 1995 og i 2002. Sidan siste visitas har det skjedd store endringar med tanke på tilflytting. Ulstein kommune er i sterk vekst, og etter at fastlandssambandet med undersjøisk tunell har bunde oss saman med Volda/ Ørsta har også talet på folk som arbeidspendlar auka. Tidlegare Ulstein prestegjeld høyrer inn under Søre Sunnmøre prosti i Møre bispedømme og består av to sokn, Ulstein sokn og Hareid sokn som begge er identiske med Ulstein kommune og Hareid kommune. Ulstein sokn dekker byen Ulsteinvik og tilhøyrande krinsar Eiksund, Haddal, Hasund, Dimna, Ulstein, og Flø. Vedtak av bispedømmerådet av 2006 inndelte Hareid, Ulstein og Herøy inn i eit samarbeidsområde. Til no har Hareid og Ulstein samarbeid om organisering av prestetenesta. Skipsbyggingsindustrien er framleis hovudnæringa og gjev mange arbeidsplassar. Planar om utvidingar gjev tilflytting av ny arbeidskraft med høg fagleg kompetanse slik at kommune, men og kyrkja vert utfordra til å auke tilbodet. Barnehagar gjev arbeidsplassar og mange er også tilsett i skulane våre; 4 barneskular, ein ungdomsskule og ein vidaregåande. Det er også mange arbeidsplassar knytt til offentleg sektor, mange av dei er i innan helse og omsorg. Mange arbeider på sjøen, i Nordsjøen eller i fjerne strok, og nokon arbeider i jordbruksnæringa. Handel og næringsverksemda er stor og aukande, og aktiviteten er også aukande innan idrettsarbeid og andre tiltak i frivillig sektor. Mykje av dette er i byen, men også krinsane har gode og byggande aktivitetar. Sunnmøre Folkehøgskule er lokalisert i soknet og dette gjev eit inspirerande og ressurssterkt miljø som lokalkyrkja har stor glede av. Soknet samarbeider med kristne lag og organisasjonar, og held saman med andre trussamfunn fast i oppgåva å legge til rette for tru og godt liv. Det er gledeleg at ein prest i eit prosjekt innanfor næringslivet, har fått til at den store delen arbeidstakarar tilhøyrande den katolske kyrkje får kyrkjelege tenester på Hasund bedehus i regi av Den katolske Kyrkja. 1.2 Statistisk materiale samanlikna med sist visitas. Ulstein kommune er ei kommune i sterk folketalsvekst. Under følgjer tala samanlikna med sist visitas: Folketal i Ulstein pr. 01.01.2002: Folketal: Fødde -02: Døde-02: 6664 113 50 Folketal i Ulstein pr. 01.01.2011: Folketal: Fødde -10: Døde-10: 7751 95 42 Folkevekst i perioden for Ulstein kommune: 1.087 (16,3%) Årleg folkevekst: 1,8% Folkevekst i perioden for Møre og Romsdal fylke: 10.049 (4,1%) Årleg folkevekst: 0,45% 4

I perioden 2002 til 2011 har altså Ulstein hatt fire gongar så høg vekst som Møre og Romsdal fylke. I Visitasen i 1995 var folketalet 6132, i visitasen i 2002 var det 6664, og no i 2011 er det 7751. Med den varsla auken i arbeidsplassar frå næringslivet i framtida, står vi ovanfor ein hurtigare auke i folketalet enn mellom førre og noverande visitas. 1.2 Tal på kyrkelege handlingar ( dåp, vigsel, gravferd) Dåp Vigsel Gravferd 2002 99 23 52 2010 98 17 39 Til desse tala kan det seiast at talet på gravferder er nok aukande i større grad enn forholdstala tilseier, for 2011 er vi allereie oppe i 49. Samarbeidet med kasualia delast mellom prestane i Hareid og Ulstein slik at ein har annakvar veke tenesteveke. Når det gjeld sjukeheimar er dei alle 4 besøkte kvar veke, og prestane deler også på dette. Dåpssamtaler avviklar ein frå hausten 2011 av i Ulstein med felles dåpssamtaler i kyrkja med lokal prest. 2. Forventa utvikling i soknet 2.1 Demografisk fordeling og forventa folketalsutvikling I følgje ssb sine prognosar vil folketalet i Ulstein i 2020 vere på 10.010, dvs ein årleg vekst på 3,2%. Det bur mest folk i byen Ulsteinvik, men krinsane rundt er populære bustader med godt og sterkt lokalmiljø. Der er om lag 23 prosent av folketalet som er i skulepliktig alder. Vi har mange born og unge i soknet. Det gjev utfordringar for barnehage, skule, idrett og kommunale tilbod - men også for kyrkja sitt arbeid. Ulstein er dermed ei ung kommune, men mange ungdomar reiser bort for å ta utdanning. Mesteparten av dei som bur her er mellom 19-67 år. Likevel er det forventa at utviklinga syner at Ulstein vil auke sterkare enn landsgjennomsnittet i den veksande gruppa over 67 år. 2.2: Konsekvensar for kommune/forventa tilflytting: I tillegg til auken i innbyggartalet, har Ulstein dei siste åra hatt ei netto innflytting som begynner å nærme seg 2000. Institusjonar som Søre Sunnmøre asylmottak og Sunnmøre Folkehøgskule aukar det reelle innbyggartalet ytterlegare med 2-300 personar. Det daglege innbyggartalet i Ulstein er såleis rundt 10.000. Alle desse har krav på kommunale tenester. Det seier seg sjølv at tenestevolum og nivå vert sett under press. Krav om fleire barnehageplassar, fleire og store nok skular, tilstrekkeleg med omsorgsbustader og sjukeheimsplassar og betra infrastruktur krev mykje av alle kommunale etatar, og stiller krav til kommunal budsjettering og prioritering. Også soknet merkar at lokalsamfunnet er i sterk 5

vekst, både i forhold til kyrkjelege handlingar, men også i forhold til utoverretta arbeid innan alle aldersgrupper. 2. 4 Vedtekne planar: Ulstein sokneråd har nyleg vedteke ny diakoniplan for 2011-2014. Planen har teke utgangspunkt i diakoniplan for Den norske kyrkja, og er målretta med konkrete tiltak, tid for gjennomføring, evaluering, ressursar og kven som er ansvarleg for gjennomføringa. Ulstein sokneråd har hausten 2011 vedteke at visjonen for Ulstein sokn skal vere Ulstein kyrkje saman på ferda. Visjonen skal vere grunnlaget for arbeid med ulike delplanar og målsettingar for å realisere visjonen. Soknet har også under arbeid ein lokal trusopplæringsplan med grunnlag i den sentrale trusopplæringsplanen. Soknet vil også arbeide for implementering av den nye gudstenestereforma i kyrkja vår. 3. Aktivitet og utfordringar i kyrkjelyden 3.1 Gudstenesteliv 3.1.1 Gudstenestelivet i Ulstein sokn er prega av ein sterk tradisjon for at det, forutan i sommarferien, er gudsteneste i kyrkja kvar søndag, og at desse er svært godt besøkt. I fjor synte tala at med 242 besøkande i snitt på hovudgudstenester er Ulstein kyrkje 8. mest besøkte kyrkja i landet. Ein har ikkje gjort noko nemneverdig med liturgiske forsøk i hovudgudstenesta, men hatt ung messe i regi av kateket, barne- og ungdomsarbeidar og Sufh tilsette. Dette har styrka gudstenestetilbodet. For barnefamiliar har vi hatt nokre familiegudstenester, og tilbod om søndagsskule. Det er ein rik songtradisjon i Ulstein og dette får ein oppleve når ein feirar gudsteneste: songen er vakker og sterk! Folk har stor vilje til medverknad og særleg kateketen og klokkaren har organisert slik at frivillige slepp til med tekstlesingar og andre oppgåver i gudstenesta. Gudstenesteutvalet i soknet fungerer godt og legg saman med soknerådet premissar for gudstenestelivet i soknet. 3.1.2 Utfordringar for gudstenestelivet vil være å arbeide med det nye materialet til reform av kyrkja sitt gudstenesteliv. Frå november av byrjar vi med ny tekstbok, ny dåpsliturgi og enkelte forsøk som skal munne ut i lokale grunnordningar i løpet av neste år. Dette ser kyrkjelyden og soknet fram til med glede og forventing, og det er ei uttala forventing til fornying. Det er også ei utfordring å møte den stadig aukande gruppa småbarnsforeldre som søkjer til gudsteneste. Tolketenesta som er nesten kvar gudsteneste, sørgjer for at den store framandspråklege delen av gudstenestedeltakarar får liturgi og preike på engelsk. 6

3.2 Kyrkjemusikalsk verksemd 3.2.1 Den kyrkjemusikalske verksemda i Ulstein sokn har korarbeidet, konsertverksemda og gudstenestelivet/gudstenestlege samlingane og dei kyrkjelege handlingane som sitt nedslagsfelt. Ulstein sokn har også eit eige Kyrkjemusikk- og kulturutval som handsamar saker under kantor sitt ansvarsområde, og planlegg arrangement. Kantor har i si stilling fram til september 2011 hatt kyrkjekor for vaksne og 2 aldersbestemte barnekor som ein del av stillinga. Barnekora har gode medarbeidarar: Eige styre, Beate Mjøen Berg og Kari Aske Osnes som medansvarlege for kvar sitt kor. Kyrkjekoret har vore oppegåande fram til september 2011. Då vurderte koret, på allmøte, rekrutteringssituasjonen så vanskeleg at dei bestemte å stoppe øvingane inntil vidare. Dei utfordringane dette gir Ulstein sokn har ikkje vore gjennomdrøfta i overordna organ enda. Mykje av målsetjinga og motiveringa for korarbeidet i Ulstein sokn har vore vinkla opp mot gudstenesta. Dette trur vi (kora) gjennom tid har vore med på å heve standarden på desse samlingane, og bidrege til større gudstenestemedvit hjå dei som er med i dette arbeidet. Dei siste åra har det vore ein merkbar nedgang i ekstern utleige av kyrkja til konsertverksemd. Dette har nok si årsak i den store aktiviteten på Sjøborg kulturhus. I 2010 blei Ulstein kyrkje eksternt leigd ut 4 gongar til konsertverksemd. 3.2.2 Utfordringar framover for den kyrkjemusikalske verksemda er i årsmeldinga for 2010 formulert slik: - Forsongartenesta bør styrkast, og vurderast som ei viktig kristen teneste - Rekruttering til kyrkjekortenesta med tanke på gudstenesta - Ungdomsengasjement i gudstenesta utanom Ung messe - Styrking av profesjonelt instrumentalengasjement vil koste - Arbeid med arrangement - Arbeid med stadeige preg på gudstenesta i Ulstein 3.3 Diakoni 3.3.1 organisering av arbeidet: Dei siste åra har personalsituasjonen innan diakoni vore noko ustabil grunna sjukdom og permisjonar. Arbeidet har likevel vore drive grunna mange frivillige og vikarar. Soknerådet har oppnemnd eit Diakoniutval som saman med diakonen leier dette arbeidet. I 2010 blei det utarbeidd ein ny diakoniplan for kyrkjelyden. Denne byggjer på diakoniplanen til Den Norske Kyrkja og er delt opp i 4 hovudtema: Nestekjærleik, Inkluderande fellesskap, Vern om skaparverket og Kamp for rettferd. Her fylgjer aktiviteten skissert innanfor desse 4 områda: Nestekjærleik: Om lag 20 personar er knytt til besøkstenesta. Dei vitjar eldre som sit mykje åleine heime eller på institusjon, og dei hjelpar til med andaktane på sjukeheimen. Ein gong kvar månad er det ei gruppe på 4 frivillige som har ei hyggeleg samling for eldre, både dei som bur heime og dei som bur i omsorgsbolig. 7

Alle som har mista ein ektefelle eller eit barn får tilbod om besøk av diakonen. Dei fleste ein kjem i kontakt med etter eit dødsfall i nær familie, seier dei opplever stor omsorg frå vener og familie, og slik verkar det som den gamle bygdekulturen enno er sterk i Ulstein. Kvart år vert det skipa til ei samling for alle sørgjande laurdag før helgemesse. Kyrkja er open 2 kveldar kvar månad for dei som søkjer ei stille stund og forbøn. Byggeklossen- open barnehage er eit tilbod for foreldre og born, og vert omtalt seinare Inkluderande fellesskap: Når folk kjem til kyrkje vert dei ønskt velkomen av kyrkjevertar. Folk på mottak eller innvandrarar utan bil vert henta og kjørt til kyrkje. Tekstane for dagen får dei på eit ark og for dei som snakkar engelsk vert alt tolka. Ei gruppe på 9 personar delar på tolketenesta. Etter kvar gudsteneste er det kyrkjekaffi. Vi ser det viktig med ein slik møte- og samtaleplass. 2 gongar i månaden er det internasjonal damegruppe. Då samlast mellom 12 og 20 damer til samtale, song, andakt, bøn og sjølvsagt ei matøkt. Dette arbeidet vert drive av diakoniarbeidar saman med 4 frivillige. Vi arbeider for tida med å kartlegge behovet for eit tilbod for psykisk utviklingshemma. Vern om skaparverket. Soknerådet har vedteke at Ulstein skal vere Grøn Kyrkjelyd. Vi ønskjer å skape glede i, og over naturen og det kvart år legg ein opp til fleire turar, til dømes ved utandørs gudsteneste eller tur etter gudstenesta. Diakonisøndagen vart feira på FN sin miljødag. Vi hadde temagudsteneste og skipa til ein dag med aktivitetar for heile familien. Kamp for rettferd Globalt arbeidar kyrkjelyden for rettferd gjennom sitt misjonsengasjement og fasteaksjonen som konfirmantane er med på. På våre samlingar brukar vi til dømes rettferdig kaffi. Vi ønskjer også å stå opp for dei i vårt nærmiljø som vert råka av urett. 3.3.1. Utfordringar i arbeidet er mellom anna at i Ulsteinvik er det mange bustader for menneske med særskilte behov, og det er ein tankekross for Diakoniutvalet at kyrkja ikkje har noko arbeid retta mot desse personane. Diakoniutvalet ynskjer å arbeide med eit tilbod for Psykisk utviklingshemma i kyrkjelyden. Det vil og verta skipa sorg- grupper. 8

3.4 Undervisning/ trusopplæring. 3.4.1 Ulstein sokn er enno ikkje fasa inn i trusopplæringsreforma. Trusopplæringa ber difor preg av det gamle faseprogrammet. Vår oppleving er at vi har godt oppmøte på desse tiltaka. Innanfor trusopplæring har vi desse hovudpunkta: Dåp, fireårsbok, dåpsskule for seksåringar, bibelutdeling til femteklassingane og konfirmasjon. Dåp: Det er høg oppslutning om dåp, det er mest barnedåp men også nokre konfirmantar og eldre born som blir døypt. I forkant av dåpen er det dåpssamtale, og på eitt-, to- og treårsdag for dåpen får dei tilsendt helsing frå kyrkja. Utdeling av fireårsbok har vi god deltaking på med frammøtetal som dekker 70-90 % av årskulla. Dette tiltaket inneheld ikkje anna aktivitet enn sjølve utdelingsgudstenesta, og er eitt av dei punkta vi er veldig klar for å byggje ut når vi blir fasa inn i trosopplæringsreforma. Dåpsskule for seksåringar starta vi med i 2003, og har hatt suksess med det. I 2011 hadde vi 74 påmelde deltakarar av 116 på årskullet, ca 70 gjennomførte. Det har i snitt vore litt i underkant av 50 % deltaking pr. årskull sidan oppstart i 2003. Største hinder for å gjere dette arbeidet enno betre, er ramefaktorar som lokalar og vaksenleiarar. Bibelutdeling for 5. klasse har vi i samarbeid med skulane, og har såleis 100 % oppmøte. Her har kateketen eit undervisningsopplegg om Bibelen på skulane i etterkant av utdelinga. Dette er også eit punkt vi planlegg å byggje ut gjennom trosopplæringsreforma. I tillegg har vi i vaksenkatekumenatet Torsdagskveld på Fredheim, i samarbeid med Ulstein NMS og Ulstein KFUK-KFUM. Det er ein bibeltime eller temakveld, arrangert om lag ein kveld i månaden. Dette er eit godt tiltak, men ikkje særleg omfattande. 3.4.2 Utfordringar. Den største utfordringa vi har innanfor trosopplæring akkurat no, er førebuinga til trusopplæringsreforma. Arbeidet med ny trusopplæringsplan er godt i gong, målet er å vere klar for å bli fasa inn i reforma for fullt allereie i 2012. Det blir diverre for lite fokus på vaksenkatekumenatet, og hovudarenaen for undervisning av vaksne er gudstenesta. Midt i arbeid med trusopplæringsreforma for alderen 0 18 år må vi ikkje gløyme ansvaret for å drive undervisning for HEILE kyrkjelyden. 3.5 Ungdomsarbeid 3.5.1 I tillegg til det arbeidet som vert drive av Ulstein sokn sine tilsette, er det gode tiltak som blir drive av frivillige. Vi kan nemne Adventura, speidararbeidet, og forskjellige barneforeiningar. Arbeidet som er nemnt nedanfor er arbeid drive av Ulstein sokn sine tilsette: Merkur: klubb for 6. og 7. klassingar, annakvar torsdag kl. 17.30 19.30. Ca 30 50 ungdommar på klubbkveldane. Ansvar: Kateket, saman med frivillige leiarar. KRIK: I Ulsteinvik har vi to KRIK-grupper, ei for 8-10 klasse og ei for 1. klasse vidaregåande og oppover. Gruppa for ungdomsskulealder vart starta av kateketen på oppdrag frå soknerådet, og er no overtatt av frivillige leiarar. Difor litt vanskeleg om den skal definerast som soknet sitt arbeid eller ikkje, men dei har fått beskjed om å kome til oss å seie frå om dei får 9

utfordringar med å drive gruppa. Denne beskjeden har også KRIK-gruppa for vidaregåandealder fått. Ulstein Tensing: Ca 50 60 ungdommar på øvingane som er kvar onsdag kl 19.30 21.30. Ten sing har 2-3 faste vaksenleiarar, samt at 1 forelder kjem kvar gong, med litt mat. 3.5.2 Utfordringar for ungdomsarbeid. Det er ei utfordring å halde på dei eldste i ten sing koret, særleg elevar i vidaregåande. Vidare vert vi utfordra av den stadige fornyinga som må til når dei eldste ungdommane flyttar ut for å ta utdanning. Vi er sjølvsagt klar over at det ikkje er noko særskilt for oss enn andre stader. Ei anna utfordring er å få ungdommane på leiarkurs, slik at dei eldste ungdommane kan vere med som leiarar. Vi har som regel ein eller to ungdommar på leiarkurs kvart år, men skulle gjerne hatt fleire. Elles er det her som mange andre stader, vi skulle gjerne hatt enda fleire vaksenleiarar i arbeidet. Vi veit at vi er heldige i Ulstein, og er velsigna med mange aktive og dyktige leiarar, men di meir arbeid vi har, di fleire leiarar trengs. 3.6. Arbeid for barn og barnefamiliar I Ulstein kommune finst det fleire barneforeiningar og barnekor som ikkje er drive av tilsette i Ulstein sokn. Om desse tiltaka skal reknast som arbeid i Ulstein sokn kan vere eit spørsmål om definisjon, men vi veit i alle fall at mange av våre medlemar nyt godt av dette arbeidet. Sjå også opplisting av Ulstein sokn sitt arbeid under punkt 3.4.1. Vi har altså ein del arbeid som rettar seg inn mot born. Arbeid inn mot barnefamiliar har vi lite av, anna enn det som er integrert i dei andre tiltaka: Familiegudstenester, storfamiliesamling (som er ei spesiell gudstenesteform, gjerne nytta dei søndagane vi ikkje har hatt gudstenestevikar), kveldsmat for heile familien etter eine samlinga på dåpsskulen for seksåringar og liknande. Søndagskule har vi annakvar søndag i høve til gudstenestene i Ulstein kyrkje. Også nokre av krinsane har søndagsskule. 3.7. Byggeklossen - open barnehage 3.7.1 Byggeklossen er ein integrert del av soknet sitt arbeid, og er drive av barne- og ungdomsarbeidar som fungere som pedagogisk leiar, pluss ein tilsett assistent. I tillegg til det faste personalet har vi ei gruppe med frivillige på 12 aktive eldre, som møter 2 stk kvar opningsdag. Barnehagen held ope to dagar i veka á 4 timar. Vi har samlingsstund, lunsj, turgrupper, babysong, vaksenforum mm. Det er flest mødre med eigne barn som møter, men også fedre, bestemødrer og dagmammaer. Byggeklossen er eit flittig brukt av asylsøkarar, flyktningar og fastbuande frå andre land, samt at det kjem folk frå heile Søre Sunnmøre til Byggeklossen, og vi meiner det såleis er eit godt integreringstiltak. Hausten 2010 feira vi 10 år, og vi kan sjå tilbake på ei fantastisk tid. I løpet av 10

desse åra har det vore om lag 32 000 besøkande born og vaksne innom. Det meiner vi syner eit stort behov for eit slikt tilbod i kommunen vår. 3.7.2 Utfordringar : Byggeklossen held til på Fredheim som er eit allbrukshus for Ulstein KFUK-KFUM og soknet. Vi trivs godt her, men har ikkje godt egna uteområde. Vi hadde også trongt fleire rom til ulike aktivitetar. Vi opplever det spennande med den internasjonale spennvidda på Byggeklossen. 3.8 Misjon, kultur og samarbeid med andre organisasjonar 3.8.1 Misjonsarbeidet står enno sterkt i soknet, med mange aktive foreiningar. NMS driv det største lokale arbeidet her. Det er eit aktivt misjonsmiljø i Ulstein sokn, der det fleste organisasjonane er meir eller mindre representert, med foreiningar eller kontaktperson. NMS er den organisasjonen som har flest foreiningar, 16 kvinne-, 2 mann-, og 3 barneforeiningar. Det vert mange hundre medlemer og samlingar kvart år. Mange stader opplever ein at foreiningane vert lagde ned, men NMS har like mange foreiningar her som for 20 år sidan. NMS samarbeidar med soknet og KFUK/M om fleire temakveldar haust og vår, held misjonsfestar i sentrum eller i ein av krinsane, misjonsfest på Bygdestova spesielt innretta mot alle dei eldre som bur på Ulshaug, og stiller ved misjonssøndagsskule i kyrkja. I tillegg står NMS bak Gjenbruksbutikken i Kyrkjegata 15. Ulstein sokn har skriftleg samarbeidsavtale med NMS der soknet forpliktar seg på samle inn pengar til prosjekt 640309 skolestipend til fattige barn i Thailand. Det har vore vanskeleg å rekruttere medlemer til misjonsutvalet, og dei to som har vore med, har innstilt på å fordele misjonsoppgåvene til andre utval. Soknerådet har eit uttrykt ønskje om at 2/3 av ofringane skal gå til andre enn soknet sitt eige arbeid. Soknet har lokalt eit formelt samarbeid med Ulstein KFUK/M, Ulsteinvik NMS og søndagsskulane i Ulstein. Ulstein sokn har også samarbeid med kulturetaten om enkelte kulturarrangement, og var med på å planlegge og gjennomføre skilting av historiske stader som Osnes kyrkjegard og Ulstein gamle kyrkjestad. Det skjer også ein del lokale kulturelle arrangement i kyrkja. Julenattineen er ein stor produksjon med to utselde konsertar oppunder jul. 3.8.2 Utfordringar. Sjølv om mange i kyrkjelyden er engasjert i misjonsarbeid, er det ei utfordring å få enno fleire aktive, både gjennom soknet sitt eige arbeid, og gjennom det arbeidet som blir drive av misjonsorganisasjonane. 11

3.9 Sokneråd og utvalsarbeid 3.9.1 Soknerådet har 8 medlemer og 5 varamedlemer. Fellesrådet består av soknerådet i tillegg til den kommunale representanten, som i inneverande periode har vore ordføraren. Soknerådsmedlemane har betalt godtgjersle på line med formannskap og kommunestyre. Soknerådet har hatt denne utvalsstrukturen: Arbeidsutval (AU): Leiar, nestleiar og ein utvalsmedlem. Sekretær: Kyrkjeverja Administrasjonsutval: Medlemane i AU, to repr. Frå dei tilsette. Sekretær: Kyrkjeverja Diakoniutval: 5 medlemer herav 2 frå soknerådet. Sekretær: Diakonen Undervisningsutvalet: 3 medlemer, herav 2 frå soknerådet. Sekretær: Kateketen Kyrkjemusikk- og kulturutvalet: 4 medlemer, herav ein frå soknerådet. Sekretær: Kantoren Gudstenesteutval: Soknerådet valde sjølve å vere utval i 2010. På soknerådsmøtet 16.02.2011 valde soknerådet nytt gudstenesteutval med fire frå soknerådet(ein av desse soknepresten) i tillegg til klokkar og kantor Misjonsutvalet: Utvalet sjølv har vurdert om arbeidet skal fordelast mellom fleire av dei andre utvala. Saka blir drøfta i soknerådet på møtet 25.oktober Forhandlingsutval: Leiar, nestleiar og kyrkjeverje Soknet har dessutan hatt nært samarbeid med Frivilligsentralen (kommunalt organ), der diakonen har vore representert i styret. Soknet har også samarbeid med Ulstein KFUK/M og Ulsteinvik NMS om temakveldar på Fredheim. Kateketen er soknet sin representant i komiteen 3.9.2 Utfordringar. Tanken bak utvalsstrukturen har vore å gjere ein betra og meir målretta innsats på definerte område, der arbeidet for ein stor del vert basert på frivillig innsats. Bruken av lønna og ulønna medarbeidarar kan representere ei utfordring. Korleis får vi dette til slik at tilsette løyser ut eit enno større og vidare engasjement i kyrkjelyden? Den nye trusopplæringsplanen sentralt og lokalt inneber eit program der den døypte i løpet av dei første 18 leveåra får tilbod om 315 timar med systematisk trusopplæring. I tillegg til dette må soknet også ha eit tilbod for alle andre aldersgrupper, noko som vil stille store krav til den kyrkjelege organisasjonen, heilt ned på sokne- planet. 4. Bemanningssituasjonen 4.1 Statlege stillingar Sokneprest i heil stilling Soknet får statleg tilskot til diakonstilling og kateketstilling 4.2 Fellesrådstillingar Den nye samarbeidsplanen mellom Ulstein kommune og Ulstein sokn, inneheld desse stillingsheimlane: Kyrkjeverje - heil stilling 12

Sekretær - 60% Diakon heil stilling Kateket heil stilling Kantor heil stilling Kyrkjetenar 50% Reinhald kyrkje, kyrkjekontor 31% Kyrkjegardsarbeid 115% Klokkar 13% I tillegg til dette har soknet barne - og ungdomsarbeidar i 34,4% stilling, og driv open barnehage med eigne tilsette: Styrar i 35.6%, assistent 28.5% reinhaldar i 10.7% 4.3 Stillingsbehov : Det er eit sterkt behov for presteressurs som tilsvarer folketal og aktivitet. 5. Eigedomar i Soknet Ulstein sokn har ansvar for, og tinglyst rett for desse eigedomane: Ulstein gamle kyrkjestad med kyrkjeruinar og gamle gravminne 2143 m2 Ulstein kyrkje bygd i 1848 og kyrkjegarden ved kyrkja 3612 m2 Osnes kyrkjegard med driftsbygning og gravplass - 18033 m2 Kyrkjekontor, seksjon 4 i Forretningsgarden gnr 8, bnr 60 233 m2 Ulstein kyrkje har siste åra vore påkosta store summar til utvendig og innvendig vedlikehald. I tillegg er desse prosjekta gjennomført: 2006 oppgradering av sprinklaranlegget til kr. 215.000 2007 opprusting av orgelet til kr. 886.000 2009 utviding av Osnes kyrkjegard til kr. 11.492.000 2010 restaurering av altartavla til kr. 502.700 2010 kjøp av gnr 8, bnr 60, snr 4 til kr. 2.900.000 Prosjekt som er under arbeid, og truleg vert sluttført i 2011: Oppussing av sakristiet til kr. 550.000 Oppussing av våpenhuset til kr. 260.000 Prosjekt som er under arbeid, og truleg vert sluttført i 2012: Oppussing av galleriloftet til kr. 140.000 Lydanlegg og overføring av lyd/bilete frå kyrkja til kr. 525.000 13

6. Økonomi Ulstein sokn har ordna økonomi, men vanskelegare kommuneøkonomi har siste åra ført til at soknet har fått reduserte rammer. Det var difor naudsynleg å få ein gjennomgang av avtalen med Ulstein kommune frå 1997. Soknet og kommunen har etter ein grundig prosess kome fram til ny avtale. Til avtalen inngår eit Grunnlagsdokument,som skildrar soknet sine plikter etter kyrkjelova og kva som trengst av personell for å utføre desse tenestene, og med ei økonomisk ramme på i alt kr. 4.388.172 pr. 01.01.2011, der tenesteyting er verdsett til kr. 300.000. På grunn av kommunen sin økonomiske situasjon har kommunestyret redusert den økonomiske ramma med kr. 200.000. I skrivande stund har ikkje fellesrådet handsama følgjene av reduksjon i rammene. 7. Soknerådsleiaren sine tankar på vegner av Ulstein sokneråd og fellesråd: Arbeidet i Ulstein sokn: Eg trur eg har alle rådsmedlemmane med meg når eg skriv at det har vore kjekt og godt å vêre med i soknerådet denne perioden. Vi er heldige. Først av alt opplever eg at evangeliet vert forkynt mellom oss og eg ser at mange finn glede i å stå i tenesta på ulike vis i Ulstein sokn. Dette gjeld både tilsette og ikkje minst frivillige. Det er ein stor ressurs for kyrkjelyden at so mange tek del på ulike vis. Dette gjeld so vel i barnearbeid, ungdomsarbeid, speidar, søndagsskule, arbeid mellom innvandrarar og innflyttarar, i diakoni og eldresamvær osb. Dei kristne organisasjonane driv og godt arbeid i Ulstein. Ikkje minst gjelde dette innan ytre misjon. Her er likevel plass til fleire i arbeidet. I ein kommune som Ulstein der 27%, eller om lag 2000 er under atten år, er det viktig å vere opne for å kunne utfordre fleire til å ta del. For heile vår kyrkje er det å inkludere dei yngste sentralt også med tanke på framtida. Dette gjeld og lokalt her i Ulstein. Vi venter difor utålmodig på å få tildelt trusopplæringsmidlar. Vi er godt i gang med planarbeidet. Vi har mange innflyttarar i Ulstein. Dei fleste av desse kjem frå EU området for å arbeide. Vi har og asylmottak her. Vi ynskjer å vere ei open kyrkje for dei som kjem hit og håpar vi saman med lokalsamfunnet elles kan lukkast med det. Av saker vi har prioritert og arbeidd mykje med siste tida i fellesråd og sokneråd, er visjon for Ulstein sokn, planlegging av ny kyrkje, tenesteavtale med Ulstein kommune (økonomirammer) og gudstenestearbeidet. I store deler av perioden har heile soknerådet vore gudstenesteutval. Arbeid med kyrkjeval, presterressurs og visitasførebuing krev og sitt. Kjekt å oppleve ei valdeltaking på 21.5% som er høgt for kyrkjeval. 14

Stadig oftare er det trongt i kyrkja. Det er sjølvsagt kjekt, men krevjande. Den vekst som er i Ulstein generelt og den aktivitet som er i soknet tilseier at det no er tid for å planlegge for ei større kyrkje. Dette må skje anten i form av ei utviding eller truleg gjennom nybygg av ei arbeidskyrkje. På dette grunnlag har vi tatt initiativ overfor kommunen for å få ny kyrkje inn i planarbeidet ikkje minst inn i arealplanlegginga då vi meiner ei kyrkje for Ulstein skal vere i sentrum også i framtida. Dersom det vert bygt nytt er det og ei utfordring korleis gamlekyrkja kan nyttast på ei god måte. Ulstein kommune verdsetter arbeidet og soknet har nyss inngått avtale med kommunen som sikrar forsvarleg økonomi for soknet for åra som kjem. Avtalen byggjer på gjeldande gudstenesteforordning med gudsteneste kvar veke. I samband med visitas finn eg det og rett å ta opp at samarbeidet og ikkje minst kommunikasjonen med prostefunksjonen tidvis kan verte betre. Til dels gjeld dette og opp mot bispedømmet. Spørsmål knytt til prestetenesta og gudstenesteplanlegging er sjølvsagt viktige for oss. Tidleg i perioden hadde vi møte med stiftsdirektøren om denne type tema. Vi er glade for at biskopen no går gjennom gudstenesteforordninga for heile bispedømmet under eitt. Under visitas 1 stadfesta vikar for prosten, Per Inge Haugen, at samla presteressurs i vårt samarbeidsområde er 450% - som før. Dette ligg fast sjølv om den i praksis har vore meir på 400%nivå siste åra. Etter vårt skjøn er det gode grunnar til at desse siste 50% må kunne kome Ulstein til gode. Herøy har allereie dobbel presteressurs i høve til Ulstein og Hareid har eit klart lågare folketal enn Ulstein. Det viktigaste er likevel at samarbeidsområdet reelt får oppretthalde denne ressursen. Sett i høve til utviklinga jamført med 85, skulle ressursen i samarbeidsområdet likevel aukast og ikkje stå på same nivå. I Ulstein sokn ser vi framover. Mykje ligg no godt til rette for at arbeidet skal kunne utviklast og at fleire skal leve i tru og teneste. Vi er glade for at det no er tilsett ny sokneprest her med oss og saman har vi godt pågangsmot. No gjeld det at kyrkjelyden får tilstrekkeleg presteressursar og at prestane slik får skikkelege arbeidskår. Tor Wilhelm Havåg Soknerådsleiar/fellesrådsleiar Ulstein sokn 8. Oppsummering: Ulstein sokn er inne i ei tid der soknet må fylgje med på den store utviklinga i lokalsamfunnet. Det er godt at avtalen om tilskot har kome i stand med kommunen og at ein såleis har justert kyrkjeleg tenestene i høve folketalet. Det vert gjort mykje og godt arbeid i kyrkja, det er eit levande og rikt frivillig arbeid. Likevel er det sterkt behov for meir presteressurs. Den har slik vi har fått opplyst ikkje vore prøvd sidan 1985 og det har skjedd store ting i lokalsamfunnet etter det. Her er det forventing til at bispedømmet vidarefører dialogen utover å fordele få prosentar vikarmidlar. Her er det heimel for ei heil prestestilling i høve folketalet og aktiviteten. Til slutt er kyrkja vår for lita, prosjektet med å løyse dette er ei særs spennande og meiningsfull oppgåve som står framfor oss. Ulstein sokn har blikket mot framtida og er takksame for den velsigninga det er å stå i teneste her, og samstundes treng vi gode og konstruktive medarbeidar som er med å leve visjonen vår saman på ferda. 15