Sakshandsamar: Anne Sigrid Loftesnes Harjo Vår dato Vår referanse Telefon: 57643146 05.12.2013 2013/4222-472 E-post: fmsfash@fylkesmannen.no Dykkar dato Dykkar referanse Byrkjelo Miljø og Containerservice 6826 BYRKJELO Bakgrunn for og forklaring til endring i utsleppsløyve til Byrkjelo Miljø og Containerservice for mottak og handtering av vomfyll og gebyr for sakshandsaming Fylkesmannen gir Byrkjelo Miljø og Containerservice, gnr. 103, bnr. 4 på Fløtre i Gloppen kommune, endra løyve etter ureiningslova til mottak og handtering av vomfyll. Løyvet erstattar utsleppsløyvet gitt 25.06.2004. Endra løyve med tilhøyrande vilkår vert send saman med denne oversendinga. Dokumenta må lesast i samanheng. Dette dokumentet gir bakgrunn for saka, grunngjeving for vedtak og nærare tolkingsgrunnlag for dei juridiske vilkåra (rang som lovtekst for verksemda) i løyvedokumentet. Forvaltninga sitt arbeid med utsleppsløyve er omfatta av ei gebyrordning, og verksemda vil få betalingskrav i etterkant. Vi viser til søknad frå Byrkjelo Miljø og Containerservice datert den 30.9.13 om endra løyve til mottak og handsaming av vomfyll frå Nordfjord Kjøtt AS. Søknaden har vore sendt på ei avgrensa høyring til Gloppen kommune. Når vurdering av søknad endar som her, med utsleppsløyve til aktivitet, vert vedtaket send ut som to skriv: Dette oversendingsbrevet og løyvedokumentet. Dette oversendingsbrevet omtalar bakgrunn for saka og søknadsprosessen. Det gir nærare grunngjeving for vedtaket og enkelte vilkår, og må nyttast som tolking av nærare krav i enkelte av vilkåra. I vedlagte skriv (løyvedokumentet) gir Fylkesmannen Byrkjelo Miljø og Containerservice utsleppskonsesjon (utsleppsløyve) for mottak og handsaming av vomfyll på Fløtre i Gloppen kommune. Merk at både vilkår og vedlegg til løyvedokumentet er ein del av dei juridiske krava til verksemda. Verksemda må leggje dokumenta til grunn for all dagleg drift som kan omfatta ytre miljø, og som viktig føring for utarbeiding og oppfølging av internkontroll. Saksframstilling Byrkjelo Miljø og Containerservice er ei etablert bedrift som har hatt løyve til mottak, mellomlagring og handsaming av inntil 1200 m 3 avvatna avløpsslam. I desember 2012 avvikla verksemda denne aktiviteten og søkjer nå om å endre løyve til å gjelde for mottak og handtering av ei årleg mengd på 300 m 3 vomfyll frå Nordfjord Kjøtt AS. Kompostering av produktet vil skje i hus og sluttproduktet er tenkt brukt til jordforbetring. Hovudkontor Landbruksavdelinga E-post: Njøsavegen 2, 6863 Leikanger Fjellvegen 11, 6800 Førde fmsfpost@fylkesmannen.no Telefon: 57 64 30 00 Postboks 14, 6801 Førde Internett: Telefaks: 57 65 33 02 Telefon: 57 64 30 00 www.fylkesmannen.no/sfj Org.nr 974 763 907 Telefaks: 57 82 17 77
2/6 Førehandsvarsling og offentleg høyring Løyvet vil etter vår vurdering ikkje føre til reelle auka miljøulempe. Ramma for mengd avfall vert redusert og vomfyll er eit produkt med høgare tørrstoffprosent som vil gi mindre avrenning samanlikna med avvatna avløpsslam. Fylkesmannen har difor vurdert det som openbert unødvendig å førehandsvarsle til ålmenta (offentleg høyring). Søknaden har vore førehandsvarsla til kommunen. Det har ikkje kome inn merknader til søknaden. Produksjonsforhold På grunn av nedbrytbarheit og innhald av organisk materiale kan vomfyll ikkje lenger leggast ubehandla på avfallsdeponi. Materiala har høg verdi som jordforbetrings- og gjødslingsstoff. Prosessen ved anlegget vil sikre at avfallet vert omdanna til eit gjødselvareprodukt. Avfallet endrar med andre ord klassifisering frå avfall, og underlagt ureinings-styresmaktene sitt regelverk, til eit produkt som vert underlagt gjødselvarereglar (m.a. eigen forskrift om gjødselvarar). Når massen ikkje lenger er karakterisert som avfall, og elles tilfredsstillar gjødselvarereglane, kan den omsetjast som annan vare. Verksemda har i februar 2013 utført analyse på tungmetall og sjukdomsframkallande bakteriar i vomfyllet. Analyseresultat viser verdiar under grenseverdiar for kvalitetsklasse 0 gitt i forskrift om gjødselsvarer mv. av organisk opphav. Ramme for produksjonen er gitt i vilkår 1. Med vesentlege endringar er meint endringar over om lag 10%, men også vedvarande produksjonsmengd over ramma kan utløyse behov for endring av løyvet. Miljøpåverknad frå aktivitetane Påverknadane frå denne type prosess er vesentleg lukt til luft, ureina vatn og mogeleg skadedyr. Lokalisering av anlegget synest til no å ha vore gunstig. Behandling av visse typar organisk avfall kan føre til auka utslepp (emisjon) av lukt. Luktemisjon vert søkt minimalisert ved optimal prosess av anlegget. Om nødvendig må luktdempande tiltak iverksetjast straks og utan ugrunna opphald. Døme på tiltak kan vere innebygging av anlegget med reinsing av lukt, tettare vegetasjon rundt anlegget, kalktilseting, tildekking, biofilter (dekke med bark, flis el. anna organisk materiale), endring av driftsrutinar (omsyn til vindretning). Det er ikkje sett spesifikke krav til støy i løyvet, men vi forventar at støyen ikkje skal overskride retningslinjene i TA-2115/2005 ( støyretningslinjen ) Avfallet genererer ureina vatn. Område der det vert handtert eller lagra vomfyll skal sikrast mot at overflatevatn kan renne inn eller på anna måte kome i kontakt med vomfyllet. Det må også byggjast eit topplag av drenerande massar som hindrar at vatn blir ståande på overflata. Massane skal ha filtrerande eigenskapar for å halde tilbake/reinse avsig frå vomfyllet. Skadedyr er sjeldan eit problem ved denne type anlegg. Vi reknar ikkje med at det vil vere ulempe for andre ved rette tiltak. Vi reknar heller ikkje med at flygeavfall er noko problem frå denne type organisk produkt. Fylkesmannen sine vurderingar og grunngjeving for fastsette vilkår Fylkesmannen har ved denne avgjerda behandla søknaden om mottak og handsaming av vomfyll. Dersom det skulle vise seg å bli vesentleg større skade eller ulempe på grunn av
3/6 drifta ved anlegget enn det som vert rekna med i dag, kan Fylkesmannen setje andre vilkår for løyvet og krevje ytterlegare tiltak, jf. 18 i ureiningslova. Vilkåra for løyvet er i det vesentlege som for eksisterande aktivitet. Løyvet er likevel betydeleg omarbeidd, for å vere tilpassa ny måte å formulere krav i utsleppsløyve. Alt avfall som verksemda sjølv ikkje kan utnytte eller gjenbruke skal leverast vidare til godkjent mottak. Det er berre Fylkesmannen eller Miljødirektoratet som kan godkjenne nærare kven som kan motta avfall. Nokre sentrale krav er presiserte i vilkåra, men det vert streka under at både ureiningslova og avfallsforskrifta (jf. spes. kap. 11 om farleg avfall) set fleire krav til avfallshandteringa enn det som er omtalt her. Vi vil streke under at all ureining frå og skjemmande innsyn til verksemda isolert sett er uønskt. Faktorane som vi vurderer har størst innverknad på miljøet, er regulerte gjennom dei spesifikke vilkåra. Utslepp som ikkje er regulert på denne måten, er omfatta av løyvet så langt opplysningar om slike utslepp vart lagde fram i samband med saksbehandlinga eller må reknast som kjende på anna måte då vedtaket vart gjort. Verksemda pliktar å halde alle utslepp på eit lågast mogleg nivå, og pliktar å rydde opp i ev. ureining eller forsøpling så snart som råd, jf. dei generelle pliktane som følgjer av 7 og 28 i ureiningslova. Vi gjer spesielt merksam på at mange krav går direkte fram av lov/forskrift og er ikkje gjentekne i det vedlagte løyve. Når enkelte lovkrav er spesielt nemnde, har vi meint å informere verksemda og ålmenta om spesielt viktige krav, og i nokre høve presisere og tilpasse generelle reglar til verksemda. Ved tvil om tolking gjeld likevel krav i lovverket over vedtak i løyvet, dersom lovteksten ikkje gir styresmakta heimel til særskild unntak eller skjerping. Nettstaden www.regelhjelp.no gir oversikt over dei viktigaste ureinings- og avfallshandteringskrav til ei lang rad verksemder i Norge. Merk at avfall som kan ha farlege eigenskapar og som skal til sluttdeponering på ordinært deponi, må vere testa. Det er laga særskilte standardar for uttak av prøver, omfang og analyse som må følgast. Tilhøva til naturmangfaldlova og vassforskrifta I tillegg til retningslinene i ureiningslova, er også prinsippa i 8-12 naturmangfald-lova lagde til grunn for vår vurdering. Det er ikkje grunn til å tru at utslepp frå verksemda vil kunne føre til lågare tilstand enn god i vassførekomsten Storelva som renn ut i Breimsvatnet. Vi ser ikkje noko - så langt i den framlagte dokumentasjon at det skulle vere fare for dårlegare tilstand etter endringar av aktivitetane. Fylkesmannen vurderer at dei samla miljø- og helsemesige konsekvensane av utsleppa med dei vilkåra som er sette, vil vere akseptable. Konklusjon Fylkesmannen har vald å skrive ut nytt løyve av di utforminga av løyveskriva har endra seg. Løyvet frå 2004 har generelt behov for endra utforming i samsvar med utvikling av regelverket og tilsvarande krav sett i nyare tid til liknande verksemder. På bakgrunn av søknaden og etter ei heilskapleg vurdering av miljømessige, tekniske og økonomiske forhold vurderer Fylkesmannen at dei vedtekne krava til verksemda vil føre til totalt sett mindre miljøulempe som for tidlegare løyve. Søknadsprosessen har sett fokus på fleire miljøulempe, og verksemda vil med nye krav vere betre i stand til å redusere ulempe
4/6 for nabolag. Fylkesmannen vil føre eit risikobasert tilsyn med verksemda, og vil ha særskild fokus på tilhøve som har kome fram i søknadsprosessen. Løyvedokumentet (utsleppskonsesjon) vert sendt saman med dette skrivet. Dei juridiske krava som elles ikkje går fram av lov- og forskriftsverket, eller er presisert eller innskjerpa i høve til det generelle regelverket er samla i løyvedokumentet. Fristar Tabellen nedanfor gir oversikt over fristar for gjennomføring av tiltak som løyvet krev: Tiltak Frist Tilvising til vilkår Internkontroll Handlingsplan etter Min. årleg risikovurdering Journalføring Kontinuerleg 3.3 Miljørisikoanalyse Innan 6 mndr. frå 6.1 løyvedato Rapportering til Fylkesmannen Årleg 1.mars eller 7 særskild frist det enkelte året Oversikt over miljøpåverknad frå aktiviteten Årleg til ålmenta Miljøinformasjonslova Varsel om gebyr for sakshandsaminga Fylkesmannen si handsaming av søknader om nytt eller endra utsleppsløyve er omfatta av ei gebyrordning, jf. kap. 39 i ureiningsforskrifta. Vi varslar med dette at verksemda skal betale eit gebyr på kr. 5 400,- for Fylkesmannen si handsaming av søknaden, jf. 39-5 (endring) i ureiningsforskrifta. Dersom de ikkje har merknad til dette varselet, vil vi be Miljødirektoratet sende ut faktura på vegner av Staten etter om lag tre veker frå de ha motteke dette varselet. Gebyret forfell til betaling 30 dagar etter fakturadato. Varsel om plassering i risikoklasse På bakgrunn av mottak og handtering av vomfyll, vurderer vi å plassere verksemda i risikoklasse 4. Klassifiseringa vil ikkje ha noko å seie for behandling av ev. søknadar, men vil seie at gebyr for ein inspeksjon eller revisjon går fram av 39-6 (kontroll som varer inntil ein dag) eller 39-8 (systemrevisjon). Ein kan rekne med rutinemessig inspeksjon kvart 3. år i form av systemrevisjon eller dagsbesøk. I tillegg vil det kome inspeksjonar på grunn av hendingar, koordinerte aksjonsformar eller andre særskilde grunnar. Generelle føresetnader for løyvet og informasjon om regelverket Internkontroll Forskrift om systematisk helse-, miljø og sikkerhetsarbeid (internkontrollforskrifta) er eit felles regelverk for tilsynsetatane som er kjent som HMS-etatane. Regelverket og korleis ein generelt må arbeide for å stette krava, er nærare omtalt på www.regelhjelp.no. Krava om tiltak for ytre miljø (tiltak for vern mot ureining og ei betre handtering av avfall) gjeld alle verksemder som har minst ein tilsett. Plikta til internkontroll som gjeld det ytre miljøet er difor
5/6 presisert i vilkåra. Forskrifta omtalar kva for oppfølging av krav som må dokumenterast skriftleg, og korleis ein bør organisere arbeidet. Den skriftlege dokumentasjonen må tilpassast type og omfang av ulike aktivitetar. Arbeid som ikkje er grunna på gjennomført, skriftleg og oppdatert risikovurdering med oppfølgande handlingsplan, vil ikkje stette minimumskrava i forskrifta. Verksemda må også sikre skriftlege rutinar for førebyggande vedlikehald av alt utstyr og produksjonsprosessar som kan føre til utilsikta utslepp. Driftsinstruksar og driftsjournalar må førast for alle prosessar og aktivitetar som vil ha noko å seie for det ytre miljøet. Det må t.d. også etablerast, vedlikehaldast og konkretiserast eigne mål for internkontrollarbeidet, dei tilsette må medverke og det må lagast og vedlikehaldast plan for kompetanseutvikling når det gjeld ytre miljø. Merk at det framleis er ei vanleg mistyding å berre omtale krav etter internkontrollforskrifta som gjeld indre miljø (dvs. arbeidsmiljøet) som HMS-krav (helse miljø sikkerheit), medan tilsvarande HMS-krav etter internkontrollforskrifta som gjeld ytre miljø (ureining og avfallshandtering) vert omtala på annan måte. Vi vil såleis generelt presisere at HMS-krav etter internkontrollforskrifta gjeld fullt ut for det ytre miljøet. Endring eller tilbakekalling av løyvet Fylkesmannen kan gjere endringar i dette løyvet med heimel i 18 i ureiningslova. Endringar skal vere grunna på skriftleg saksbehandling og ei forsvarleg utgreiing av saka. Ein eventuell endringssøknad må difor liggje føre i god tid før endring kan gjennomførast. Tilsyn Verksemda pliktar å la representantar for ureiningsstyresmaktene eller den som desse gjev fullmakt, få inspisere anlegget til ei kvar tid jf. ureiningslova kap. 7. Tvangsmulkt, straff Brot på løyvet er straffbart etter ureiningslova 78 og 79. Også brot på krav som følgjer direkte av ureiningslova og produktkontrollova samt forskrifter fastsett i medhald av disse lovene, er straffbart. Ved avvik frå løyvet eller ureiningslova kan Fylkesmannen gje pålegg om igangsetjing av tiltak for å rette opp avvik, jf. ureiningslova 7, siste ledd. Dersom pålegget ikkje vert følgt opp kan Fylkesmannen fatte vedtak om tvangsmulkt til staten jf. 73, eller sørgje for igangsetjing av tiltak jf. ureiningslova 74. Erstatningsansvar At ureininga er tilleten, fritek ikkje verksemda frå eventuelle erstatningsansvar for skade, ulemper eller tap som følgje av ureininga, jf. ureiningslova 10 og kap 8 (spesielt 56), samt grannelova 6, 7 og 8. Dette løyvet fritek ikkje søkjaren for ansvar etter anna lovverk som gjeld for denne verksemda, t.d. arbeidsmiljø-, helse- og brannvernreglar. Klagerett Vedtaket - også plasseringa i risikoklasse, kan klagast på til Miljødirektoratet av partane i saka eller andre med rettsleg klageinteresse innan 3 veker etter melding om vedtak er kome fram eller frå vedkommande fekk eller burde skaffa seg kjennskap til vedtaket. Ein eventuell
6/6 klage skal oppgje nærare kva det vert klaga på og den eller dei endringane som ein ønskjer. Klagen bør grunngjevast, og andre opplysningar som har noko å seie for saka bør nemnast. Klagen skal sendes til Fylkesmannen. Ei eventuell klage fører ikkje automatisk til at gjennomføringa av vedtaket vert utsett. Fylkesmannen eller Miljødirektoratet kan etter oppmoding eller av eige tiltak avgjere at vedtaket ikkje skal gjennomførast før klagefristen er ute eller klagen er avgjort. Avgjerda av spørsmålet om gjennomføring kan ikkje påklagast. Med visse avgrensingar har partane rett til å sjå sakens dokumenter. Nærare opplysningar om dette kan ein få ved å vende seg til Fylkesmannen. Andre opplysningar om saksbehandlingsregler og andre regler som har noko å seie for saka vil Fylkesmannen også kunne gje på førespurnad. Offentleggjering av løyvet Dette er ei formalisering av eit etablert tilbod, og vil ikkje medføre nye utslepp eller større fare for skade eller ulempe for miljøet. Vedtaket kan difor gjerast kjent for ålmenta ved publisering på nettsida til Fylkesmannen. Verksemda kan velje å kunngjere løyvet i aviser, ev. saman med annan firmainformasjon. Med helsing Gøsta Hagenlund assisterande fylkesmiljøvernsjef Anne Sigrid Loftesnes Harjo overingeniør Kopi pr. e-post: Gloppen kommune og Nordfjord Kjøtt AS