Politisk reglement For Kommunestyret Vedteke av kommunestyret Sak 117/15
1 Kommunestyret arbeids- og ansvarsområde a. Kommunestyret er det øvste politiske organet i Jølster kommune, og arbeidet skjer i samsvar med Lov om kommuner og fylkeskommuner av 25.09.1992 (kommunelova). b. I samsvar med Kommunelova 76 har kommunestyret det øvste tilsynet med den kommunale forvaltninga og kan krevje alle saker framlagde for seg til orientering eller avgjerd. Kommunestyret kan omgjere vedtak gjorde av andre folkevalde organ eller administrasjonen i samme omfang som desse kunne omgjere vedtaket sjølv. Kommunestyret skal sjå etter at dei kommunale rekneskapane vert reviderte på fullnøyande måte. c. Kommunestyret gjer vedtak i alle kommunale saker, dersom vedtaksmyndet som følgje av lov eller vedtak om delegering ikkje er lagt til anna politisk organ eller administrasjonen. d. Dersom minst 2 % av innbyggjarane i kommunen står bak eit innsendt framlegg som verksemda i kommunen (innbyggjarinitiativ), har kommunestyret sjølv plikt til å handsame og ta stilling til framlegget. I slike høve følgjer sakshandsaminga reglane i Kommunelova 39 a, 1-4. 2 Saksførebuing a. Rådmannen har ansvaret for at saker som vert lagde fram for handsaming i kommunestyret er forsvarleg utgreidde og at vedtaka vert iverksette. b. I saker som vert lagde fram for kommunestyret til handsaming skal det til vanleg liggje føre tilråding frå formannskapet, eit eller begge av dei faste utvala eller kontrollutvalet. I særskilde høve t.d. der utanforståande tilhøve har gjort at kommunestyret bør / vil handsame ei sak på kort varsel og det ikkje er tid til å vente til nytt kommunestyremøte kan kommunestyret godkjenne å handsame saker der framlegg frå rådmannen vert framlagde direkte for kommunestyret. I slike høve, og dersom det er praktisk mogleg, kan òg ordføraren ta avgjerd om å innkalle formannskapet (eller ein utvalsleiar om å innkalle eit av dei faste utvala) til ekstramøte straks før kommunestyret tek til, slik at det kan liggje føre ei tilråding frå formannskap / utval. c. Rådmannen har ansvaret for at naudsynte saksdokument vert sende til medlemmer og varamedlemmer i kommunestyret og andre som skal ha desse dokumenta. d. Kommunestyret kan oppnemne ad hoc-utval andre arbeidsgrupper for utgreiing og handsaming av særskilde saker. Kommunestyret kan i mandatet for utvalet avgjere at eit ad hoc-utval gir tilråding direkte til kommunestyret.
e. Kommunestyret kan som del av arbeidet sitt halde synfaringar, temamøte eller opne høyringar. f. Kommunen skal minst ein gong i byrjinga av kvar kommunestyreperiode gjennomføre folkevaldopplæring for alle medlemmene i kommunestyret. Folkevaldopplæring bør også vere ein del av den rullerande oppfølginga gjennom heile perioden. Ordføraren har ansvaret for at slik opplæring vert gjennomført. 3 Møteinnkalling og utlegging av saksdokument a. Kommunestyret held møte når kommunestyret sjølv eller ordføraren avgjer det, eller når fylkesmannen krev det. Vanlege kommunestyremøte vert haldne i samsvar med møteplan som er fastsett for minst eit halvt år om gongen, og som er samordna med møteplanane for formannskapet og faste utval. b. Møteplanen skal vere lett tilgjengeleg på den kommunale heimesida (www.jolster.kommune.no). c. Ordføraren har ansvaret for utsending av møteinnkalling, som skal innehalde tid og stad for møtet. Møteinnkallinga skal så langt det er praktisk mogleg sendast ut seinast ei veke før kommunestyremøtet. Det skal gå fram av møteinnkallinga kva for saker som skal handsamast. d. I tillegg til konkrete saker med saksnummer og namn på saka, kan saklista innehalde eiga sak med referat- og meldingssaker. Så langt råd er, bør det vere ein kort omtale (t.d. brev-overskrift) for kvart punkt under referat- og meldingssaker, og saksdokument kan følgje som vedlegg. Referat- og meldingssaker vert til vanleg ikkje realitetshandsama i same møte, men kommunestyret kan sjølv vedta å føre ei slik sak opp som tillegg til den utsende saklista, og dette spørsmålet skal i så fall handsamast i samsvar med 8, siste ledd, i dette reglementet. Under referat- og meldingssaker kan ordføraren leggje fram eller godkjenne at rådmannen legg fram referat og meldingar som ikkje er omtale i dei utsende saksdokumenta. Dette gjeld også om punktet om referat- og meldingssaker ikkje er teke med i den utsende saklista. Referat- og meldingssaker kan leggjast fram skriftleg (t.d. med utsending / utdeling av kopi av saksdokument / brev) eller munnleg. e. Saksdokument med saksutgreiing og framlegg til vedtak / tilråding for dei sakene som skal realitetshandsamast, skal som hovudregel liggje ved innkallinga. Saksdokument kan ettersendast. Dersom dokumenta i ei sak først vert lagde fram i møtet, avgjer kommunestyret sjølv om det vil handsame saka. f. Jølster kommune kan når som helst ta avgjerd om å nytte elektroniske medium som einaste eller viktigaste utsendingsform for møteinnkallingar, saksdokument
osv. I så fall har kommunen samstundes ansvar for å sikre at alle representantane har likeverdig og kostnadsfri tilgjenge til kommunale dokument. Omtalen av saksdokument osv. i dette reglementet gjeld både for trykte og elektroniske dokument, likevel med eventuelle praktiske tilpassingar til bruken av elektroniske dokument. g. Møteinnkalling med sakliste skal kunngjerast offentleg. Kravet om offentleggjering er ivareteke ved at innkallinga med sakliste er lett tilgjengeleg på den kommunale heimesida. Saklista med saksdokument skal leggjast ut på den kommunale heimesida samstundes som møteinnkallinga vert sendt ut. Dette gjeld ikkje dokument som etter Lov (av 19.05.2006) om rett til innsyn i dokument i offentleg verksemd (offentleglova) eller anna lov er unnateke frå offentleg innsyn. 4 Forfall og innkalling av varamedlemmer a. I samsvar med Kommunelova 40, 1 har kommunestyremedlemmene plikt til delta på kommunestyremøta, dersom det ikkje ligg føre gyldig forfall. Medlem eller innkalla varamedlem som med gyldig grunn ikkje kan møte, skal så snart som mogleg gi melding til tenestekontoret, som kallar inn varamedlem. b. Varamedlem bør òg innkallast når det på førehand er klårt at ein medlem kan verte rekna som inhabil under handsaminga av ei sak som står på saklista. Partigruppene ved gruppeleiar har ansvar for denne vurderinga. Gruppeleiar kan sjølv kalle inn rett varamedlem eller melde frå til tenestekontoret som kallar inn. c. Dersom ein medlem har gyldig grunn til å forlate eit møte, skal om mogleg varamedlem innkallast og overta plassen. Dette må i så fall skje mellom handsaminga av to saker, ikkje under ei sak. d. Som hovudregel har ordføraren ansvaret for å vurdere og avgjere om det er gyldig forfall. Ved tvil kan spørsmålet om gyldig forfall leggjast fram for kommunestyret til avgjerd. T.d. helse- eller velferdsgrunnar, sjukdom i nær familie, viktige forretningar og tungtvegande plikter i arbeidssamanheng vert til vanleg rekna som gyldig forfallsgrunn. 5 Møterett for andre enn valde medlemmer a. Rådmannen eller ein representant for rådmannen skal delta i kommunestyremøta, med talerett. b. Rådmannen har ansvaret for at det til ei kvar tid er ein tilsett i kommunen som er sekretær for kommunestyret under alle møte. c. Revisor møter med talerett i saker som er framlagde frå kontrollutvalet.
d. Andre kan møte når særskilt lovregel gir rett til det, og da med dei rettar og plikter som den aktuelle lovregelen fastset. e. Ordføraren eller kommunestyret sjølv kan innkalle andre kommunalt tilsette eller folk utanfrå med særleg sakkunnskap. Desse kan av ordføraren verte bedne om å gi opplysningar og informasjon i ei sak, men dei har ikkje generell talerett i diskusjonen. f. Ved temamøte, opne høyringar, temaopplegg eller synfaringar som del av eit vanleg kommunestyremøte kan ordføraren invitere deltakarar etter behov. Ordføraren eller kommunestyret sjølv avgjer i kvart tilhøve kva for vilkår slike deltakarar deltek på. 6 Møteleiing a. Kommunestyremøta vert leia av ordføraren. Dersom ordføraren har forfall eller er inhabil, overtek varaordføraren møteleiinga. Dersom begge har forfall eller er inhabile, vel kommunestyret i fleirtalsval møteleiar mellom dei medlemmene som er til stades. b. Dersom ordføraren eller annan møteleiar ønskjer å ta aktivt del i debatten i ei sak, skal han / ho gi frå seg møteleiinga til varaordføraren eller annan møteleiar vald av kommunestyret. Dersom møteleiaren vil gi korte saksopplysningar eller korte kommentarar for å kaste lys over sakshandsaminga, kan likevel ordføraren / møteleiaren gjere dette frå møteleiarplassen eller talarstolen utan å gi frå seg møteleiinga. c. Møteleiaren har ansvar for at det råd ro og orden i og omkring møtesalen. Møteleiaren har òg ansvaret for at debatten går uhindra, og at debattform og språkbruk er verdig for kommunestyret. d. Dersom det kjem tilrop, meiningsytringar eller andre reaksjonar som uroar sakshandsaminga eller er i strid med god orden og folkeskikk, skal møteleiaren stoppe det som skjer. Ordføraren kan vise personar som uroar møtet, bort frå møtesalen. 7 Opent eller stengt møte a. Jølster kommunestyre held møta for opne dører, dvs. med fritt tilgjenge på tilhøyrarplass for publikum og presse. Kommunestyret kan sjølv vedta å handsame ei sak for stengde dører i saker der det er lovheimel for dette. Drøftingar om dette vert haldne for stengde dører, dersom møteleiaren krev det eller kommunestyret vedtek det.
b. Rådmannen, sekretæren for kommunestyret og kommunalt tilsette som er innkalla for å gi opplysningar om den konkrete saka, kan vere til stades om saka vert handsama for stengde dører. c. Når ei sak vert handsama for stengde dører, har alle som er til stades teieplikt om drøftingane og om vedtak som vert gjort i saka, i den grad det er lovfesta teieplikt knytt til innhaldet i den konkrete saka. 8 Opning og sakshandsaming a. Kommunestyremøta startar til fastsett møtetid. Møteleiaren gjennomfører namneopprop for registrering av dei som er til stades, og spør om nokon har merknader til innkalling eller sakliste. Møtet er lovleg sett dersom det er nok representantar til stades (jf. Kommunelova), og det ikkje er sett fram alvorlege innvendingar til innkalling og sakliste. Når møtet er lovleg sett, kan ingen medlemmer eller møtande varamedlemmer forlate møtet for kortare eller lengre tid utan først å ha teke opp spørsmålet om lovleg grunn med møteleiaren. b. Dersom det ved starten av møtet vert reist innvendingar i samband med forfall, frammøte av varamedlemmer eller om sjølve innkallinga og saklista, vert slike spørsmål handsama først i møtet. Deretter vert sakene handsama i samsvar med den utsende saklista og eventuelle tilleggssaker, men etter at møteleiaren har sett fram framlegg på to representantar til å skrive under møteboka. Dersom ingen har innvendingar, er desse valde. Spørsmål vert til vanleg tekne opp mellom referat- og meldingssaker og sakene som skal realitetshandsamast. Kommunestyret kan sjølv vedta annan rekkjefølgje. c. Når handsaminga av ei sak har starta, kan ikkje møtet avsluttast før saka er avgjort ved avrøysting eller det er gjortvedtak om utsetjing. Når ei saka er teken opp til handsaming, kan ingen av medlemmene forlate møtet før saka er ferdig handsama (med reelt vedtak eller utsetjingsvedtak). Kommunestyret kan ta pause under handsaminga av ei sak (t.d. dersom nokon ber om gruppemøte eller om møteleiaren ser behov for pause fordi drøftingane av saka tek lang tid). d. For kvar sak som vert teken opp til handsaming, les møteleiaren opp namnet på saka. Møteleiaren informerer om eventuelle nye saksdokument. Innhaldet i saka vert gjennomgått så langt som møteleiaren eller kommunestyret finn det naudsynt. e. Saker som ikkje er med på den utsende saklista, kan takast opp til handsaming dersom ikkje møteleiaren eller 1/3 av dei frammøtte representantane set seg imot det. Dersom ei sak vert avvist ved ei slik avgjerd, kan kommunestyret med
samtykke frå den som har fremja saka oversende saka til formannskapet eller det faste utvalet der saka naturleg høyrer heime for vidare handsaming. f. Når saklista er utsendt, kan ikkje ordføraren eller rådmannen trekke ei sak frå handsaming. Men ved starten av møtet eller når handsaminga av ei sak startar, kan ordføraren med ei munnleg grunngjeving gjere framlegg om at saka vert trekt. Kommunestyret røystar over slikt framlegg før realitetshandsaminga av saka startar. g. Tre eller fleire medlemmer av kommunestyret kan saman bringe avgjerder som folkevalde organ eller den kommunale administrasjonen har gjort, inn for departementet til kontroll av om avgjerda er lovleg ( lovlegkontroll ). Det same gjeld avgjerder om møte skal haldast for opne eller lukka dører og avgjerder om habilitet. Avgjerder om tilsetjing, oppseiing og avskil kan ikkje takast opp for lovleg-kontroll. Jf. utfyllande omtale i Kommunelova 59. 9 Inhabilitet a. Reglane i Kommunelova 40, 3 a c og Lov (av 10.02.1967, med endring av 19.06.2009) om behandlingsmåten i forvaltningssaker (forvaltningsloven) kap II ( 6 10) gjeld for kommunestyremedlemmer. Den som er inhabil etter desse lovreglane, skal ikkje delta i handsaminga av ei sak. b. I kollegiale organ som kommunestyret, er det kvar einskild medlem som har ansvar for å ta opp spørsmålet om eventuell inhabilitet. Vedkommande må sjølv ta opp spørsmålet, helst med ordføraren i høveleg tid før møtet (slik at det kan vere mogleg å innkalle varamedlem, dersom vedkommandevert kjend inhabil), men seinast når den aktuelle saka vert teken opp til handsaming i møtet. Representanten gir sjølv ei kort grunngjeving for at spørsmålet om inhabilitet kan vere aktuelt. Kommunestyret utan den medlemmen / dei medlemmene som det gjeld avgjer om vedkommande er inhabil. 10 Debatt a. Når ei sak er teken opp til handsaming, opnar møteleiaren for debatt om saka. Representantane og evt. rådmannen får ordet i den rekkjefølgja dei ber om det. Det er høve til replikkordskifte, og da får den / dei som ber om replikk, ordet før møteleiaren går attende til den vanlege talarlista. Replikk / replikkordskifte kan berre vere retta til siste ordinære innlegg. b. Jølster kommunestyre nyttar talarstol, som alle skal bruke når dei har innlegg. Dersom kommunestyret har møte i lokale der det ikkje er mogleg å nytte høveleg talarstol, avgjer møteleiaren korleis innlegga skal haldast.
c. Talarar skal vende seg til møteleiaren og ikkje til dei andre representantane. Møteleiaren har ansvar for at dei som har ordet, held seg til den saka som er oppe til handsaming. d. Under debatt i kommunestyret skal spørsmål, kritikk, ros osv frå representantar til administrasjonen vere retta til rådmannen og ikkje til einskilde kommunalsjefar, tenesteleiarar, sakshandsamarar eller andre tilsette. Rådmannen gir eventuelle svar, kommentarar osv på vegner av administrasjonen og har ansvar for å avklare aktuelle spørsmål internt i administrasjonen. Etter behov skal rådmannen gi svar, forklaringar osv til kommunestyret. Om dette ikkje kan skje i det møtet der spørsmål er tekne opp, skal rådmannen formidle svar, utfyllande informasjon eller liknande til ordføraren eller i spesielle høve til formannskapet eller til kommunestyret i neste møte. e. Det er ikkje høve til å gi uttrykk for semje, usemje eller misnøye med noko som vert sagt eller skjer under møtet (t.d. gjennom tilrop, applaus, piping e.l.), og heller ikkje å uttrykkje seg krenkjande om andre. f. Møteleiaren skal gripe tak i brot på reglane for god debattskikk, om naudsynt to gongar. Om dette ikkje hjelper, kan møteleiaren avbryte det innlegget som det gjeld. Møteleiaren kan òg be kommunestyret røyste over spørsmålet om den aktuelle representanten skal stengast ute frå heile eller delar av resten av kommunestyremøtet. g. Møteleiaren skal ikkje avbryte ein representant som har ordet, unnateke for å påtale uhøvisk språkbruk (jf. pkt. d framanfor), eller for å oppklare tydelege mistydingar i det som vert sagt av den som har ordet. 11 Framleggsrett a. I kommunestyret har berre faste medlemmer og møtande varamedlemmer framleggsrett. b. I særskilde høve (jf. 2, 2. ledd, i dette reglementet) kan rådmannen leggje fram sitt framlegg direkte for kommunestyret. Som hovudregel vert da saksutgreiing med framlegg delt ut ved starten av møtet. I slike høve kan også rådmannen endre framlegget sitt under debatten, dersom rådmannen finn grunnlag for det. c. Framlegg som vert tekne opp i møtet skal som hovudregel leverast skriftleg og med underskrift til møteleiaren. Det vert ikkje stilt krav til den formelle utforminga av slik framlegg, men framlegget må vere utforma slik at det ikkje er tvil om kva som er intensjonen. Om naudsynt kan framleggsstillaren be møteleiaren eller rådmannen om praktisk hjelp til å skrive framlegget. Det er likevel godt nok med munnleg framlegg når det gjeld namn i val- og
tilsetjingssaker, framlegg om utsetjing eller oversending til anna kommunalt organ, eller framlegg om å gå imot den tilrådinga som ligg føre i saka. 12 Avrøysting a. Når debatten i ei sak er avslutta, tek møteleiaren saka opp til avrøysting. Som hovudregel refererer møteleiaren alle framlegg før avrøystinga startar, men møteleiaren kan gjere unntak frå dette, t.d. dersom framlegget inneheld lange talkolonner. Når møteleiaren tek ei sak opp til avrøysting, skal det ikkje haldast fleire debattinnlegg eller fremjast nye framlegg. b. Røysterett har berre dei medlemmene og varamedlemmene som er til stades når saka vert teken opp til avrøysting. Ingen kan forlate møtet før avrøystinga er avslutta, og ingen kan slutte seg til møtet etter at ei sak er teken opp til handsaming og før avrøystinga er avslutta. Alle representantane har røysteplikt. Ved val- eller tilsetjingssaker kan det gjevast blank røyst. c. Vert det fremja framlegg om utsetjing, skal debatten om sjølve saka stoppe, medan det er debatt og avrøysting over utsetjingsframlegget. Dersom utsetjingsframlegget vert vedteke, vert også debatten om saka avslutta. Dersom utsetjingsframlegget ikkje vert vedteke, vert debatten om saka teken opp att der den stoppa. d. Dersom det skal røystast over fleire framlegg, avgjer møteleiaren rekkjefølgja for røystinga, dersom ikkje kommunestyret vedtek anna rekkjefølgje. Så langt som mogleg skal det først verte røysta over det mest ytterleggåande framlegget. Avrøystinga skal leggjast opp slik kvar einskild representant så langt som mogleg får gi uttrykk for sitt prinsipale syn. e. Dersom tilråding / framlegg er delt opp i fleire punkt, bør det som hovudregel røystast førebels over kvart punkt, før det vert røysta over heile tilrådinga under eitt. f. Før endeleg avrøysting i ei sak, kan det dersom møteleiaren ønskjer det og / eller ein eller fleire representantar ber om det haldast ei eller fleire prøverøystingar før endeleg røysting. Møteleiaren må vere tydeleg på kva som er prøverøysting og kva som er endeleg røysting. Prøverøystingar er ikkje bindande. 13 Røystemåten a. Røysting vert gjennomførd på ein av desse måtane: Open røysting kan skje ved - Stillteiande tilslutnad - Røysteteikn (handsopprekking eller ved at representantane reiser seg) - Namneopprop
Namneopprop skal nyttast når møteleiaren avgjer det, eller når minst 1/5 av representantane krev det. Skriftleg røysting Løynleg røystegjeving kan nyttast berre ved val og tilsetjingar når ein eller fleire representantar krev det. Ordføraren oppnemner to personar til å telje røystene. b. I vanlege saker er det framlegget vedteke, som har fått over halvparten av røystene. Ved likt røystetal for to framlegg, er ordføraren si røyst avgjerande ( dobbelrøyst ). c. Ved fleirtalsval vert den vald, som har fått over halvparten av røystene. Om ingen får det, vert det røysta på nytt. Om det da vert likt røystetal, vert valet avgjort ved loddtrekking. Ved høvestalsval gjeld reglane i Kommunelova 8, 2, og 35 37, jf. også rundskriv nr. H-4/11 av 24.08.11 frå Kommunal- og regionaldepartementet (eller evt. seinare rundskriv som måtte avløyse dette). Ved avtaleval gjeld reglane i Kommunelova 38 a, jf. også rundskriv H-4/11. d. Ved likt røystetal i tilsetjingssaker avgjer møteleiaren tilsetjinga. Jf. Kommunelova 38. 14 Spørsmål a. Alle representantane har rett til å stille spørsmål til ordføraren under møtet, også om saker som ikkje står i den utsende saklista. Slike spørsmål bør vere levert skriftleg seinast fire dagar før møtedatoen. Ordføraren refererer spørsmålet og gir eit svar mellom gjennomgangen av eventuelle referat- og meldingssaker og handsaminga av den vanlege saklista. Det vert til vanleg ikkje lagt opp til debatt om slike spørsmål, og heller ikkje framlegg / røysting. b. Spørsmålsstillaren kan be om kommunestyrestyret sin tilslutnad til at det vert sett opp eiga sak om temaet på eit seinare møte, eller at spørsmålet vert sendt over til eit av dei faste utvala for vanleg handsaming. 15 Deputasjonar a. Utsendingar / grupper som ønskjer å møte for kommunestyret, skal gi melding om dette til ordføraren seinast to dagar før møtedato. Kommunestyret avgjer sjølv om utsendingane / gruppa skal takast imot. Kommunestyret avgjer òg om deputasjonen får møte heile kommunestyret, eit utval av kommunestyremedlemmer eller ordføraren aleine. Ordføraren / møteleiaren fungerer som leiar for eventuelt utval som tek imot ein deputasjon. b. Ein deputasjon skal ha høve til å leggje fram ein kort munnleg presentasjon av bodskapen sin, saman med eventuelt skriftleg materiale. Kommunestyret eller
den / dei som tek imot deputasjonen for kommunestyret, kan stille oppklarande spørsmål til deputasjonen, men det skal ikkje vere debatt om realitetane i saka. c. Dersom deputasjonen er teken imot av eit utval eller ordføraren aleine, skal ordføraren orientere kommunestyret om innhaldet i bodskapen. Dersom det gjeld ei sak på saklista, vert orienteringa gitt ved starten av handsaminga av saka. Dersom det ikkje gjeld ei sak på saklista, vert orienteringa gitt på det tidspunktet i møtet som det til vanleg vert opna for spørsmål frå representantane. 16 Møtebokføring d. Det skal førast møtebok frå kommunestyremøta, og ordføraren har ansvar for at dette vert gjort. I praksis skjer dette ved at rådmannen syter for at det til ei kvar er ein tilsett til stades som fører møteboka. e. I møteboka skal stå: Eventuelle merknader til innkalling og / eller sakliste. Møtetid og -stad. Dato og innkallingsform. Oversyn over faste medlemmer som ikkje er til stades. Oversyn over møtande varamedlemmer. Namn på medlemmer eller varamedlemmer som sluttar seg til eller går ifrå under møtet, med tidspunkt / saksnummer når dette skjedde. Oversyn over kven som møter frå administrasjonen. Oversyn over eventuelt andre innkalla eller inviterte, delegasjonar e.a. Saker i nummerert rekkjefølgje som følgjer kalenderåret. Naudsynte opplysningar som viser handsamingsmåten. Opplysningar om handsaminga av spørsmål om inhabilitet. Opplysningar om eventuelle referat- og meldingssaker i tillegg til dei som står i utsendt sakliste. Tilrådingar og framlegg til vedtak for kvar einskild sak. Naudsynte opplysningar som viser at avrøystingane er lovlege. Oversyn over avrøystingar. Vedtak for kvar einskild sak. f. Møteleiaren avgjer om protokolltilførsel skal godkjennast. Dersom det vert reist protest mot møteleiaren si avgjerd, tek kommunestyret avgjerda. Protokolltilførsel som gjeld påstått(e) formell(e) feil, skal som hovudregel godkjennast. g. Møteboka skal underskrivast av møteleiaren og minst to andre medlemmer, som er valde ved starten av møtet.
h. Så snart det er praktisk mogleg etter at møteboka er underskriven, skal møteboka gjerast tilgjengeleg på den kommunale heimesida. 17 Ny handsaming av saker Kommunestyret kan sjølv, på fritt grunnlag og når som helst, ta opp saker som er avgjorde til ny handsaming. Kommunestyret må før eventuell slik handsaming startar få informasjon om dei formelle reglane for og eventuelle konsekvensar av å endre tidlegare vedtak (jf. Forvaltningslova 35). 18 Vedtak om reglement Politisk reglement for Jølster kommunestyre gjeld frå og med dagen etter vedtaksdato. Berre kommunestyret sjølv kan gjere vedtak om endringar i reglementet.