Vennegrupper på Høle Barne- og Ungdomsskule Rettleiar for gjennomføring av vennegrupper på HBUS. «Jo mere vi er sammen» Utarbeida av Arbeidsgruppe 1 ved HBUS
1. Innføring av vennegrupper som strategisk grep i den sosiale planen til HBUS. Ved ei rekke skular her i landet blir det gjennomført «obligatoriske» vennegrupper alle med bakgrunn i ønsket om å styrke klassemiljøet og bidra til eit betre og tryggare læringsmiljø for alle. Frå og med skuleåret 2013/2014 ønskjer HBUS å innføra vennegrupper som ein del av den strategiske planen til skulen for å styrka dei sosiale nettverka på trinna og førebygga «klikkdanningar,» utestenging og mobbing. Denne ordninga er eit nytt ledd i heim-skule samarbeidet i tillegg til foreldremøtet og utviklingsamtalen. Ordninga med vennegrupper skal gå over 2 år; skuleåra 2013/14 0g 2014/15. Deretter skal ordninga bli evaluert både med omsyn til måloppnåing og praktisk gjennomføring. Nokre foreldre vil kanskje hevde at vennegrupper er noko ein ikkje har tid til, og at barn bør få styre eigen omgangskrets. Sjølsagt kan dette vera gode poeng, men leiinga ved skulen og Arbeidsgruppe 1 er av den oppfatninga at vennegrupper er eit viktig strategisk grep for å fremja godt skulemiljø ved HBUS. Dersom elevar blir ståande utanfor vennegrupene på trinnet, får dette konsekvenser både for det einskilde barn og for trinnet som heilskap. Vi vonar difor at alle foreldre er med og bidreg til at ordninga skal bli ein suksess!
2. Kva er vennegrupper? Vennegrupper er ei gruppe elevar på kvart trinn som regelmessig treffast heime hos kvarandre. Kontaktlærarane på trinnet sett opp lister kor elevane er delt inn i grupper på 4-5 elevar. Gruppa skal treffast heime hos kvarandre nokre timar ein ettermiddag/kveld, ein gong per månad. Etter 4-5 månadar, når alle har vore heime hos alle, vil kontaktlæraren sette opp nye lister med nye gruppesamansettingar. For skuleåret 2013/14 skal 1.-3. trinn delta i ordninga. Gjennom skulekvardagen vil vi ha fokus på felles leik og aktivitetar i friminutt gjennom faddar ordninga for 1.trinn, turdag ordninga for 1.- 2.trinn, og trivselsleiar ordninga med organisert leik for heile småskulen, 1.-4.trinn, og mellomtrinnet, 5.-7.trinn.
3. Målet med vennegrupper Ofte vil elevane opp gjennom skuletida snevre inn den faste omgangskretsen meir og meir. På HBUS tenkjer vi det er positivt for det sosiale miljøet på skulen at det er rom for variasjon mellom vennegjenger. Føremålet med å innføre vennegrupper er i samarbeid med skule og bygd å bidra positivt til eit godt sosialt miljø på skulen og fritid for alle barn i skulekretsen ved å stimulera til bredde i vennenettverka samt hemma klikkdanning og utestenging. At barn har nokre venner dei føretrekk framføre andre, er naturleg. Vårt mål er at alle i tillegg skal vite kor alle på trinnet bur, ha leika saman, og ete hos kvarandre, møtt sysken og foreldre. Gjennom vennegrupper på 1.-3.trinn, vil vi styrke samhald, tryggleik og kjensle av å høyre til med dei andre på trinnet. Når elevar som normalt ikkje er bestevenner tilbring litt tid saman og blir betre kjent, er det lettare å ta kontakt og inkludera i vennekretsen enn om ein aldri treffast på fritida. Vi vonar og trur at vennegruppene skal bidra til å senka terskelen for å ta kontakt med kvarandre og heva kjensla av fellesskap og tryggleik ovanfor kvarandre.
4. Organisering av vennegruppene Kontaktlærarane på trinnet er ansvarlege for å sette saman grupper på 4-5 elevar, og listene blir delt ut første veke etter haustferien, 2013/14 og første veke etter vinterferien: Månad Vennegruppe A Adresse TLF. Månad Vennegruppe A Adresse TLF. Deltakarane i kvar gruppe må sjølv bli samde om kva for dagar gruppa skal møtast- ein fast dag i månaden (t d: første måndag i månaden, kl.17-19.30.) eller etter avtalte datoar. Foreldra øvst på lista tek kontakt først. Dersom det ikkje passar å avhalda vennegruppa for nokon ein månad; gi melding til nestemann på lista slik at vennegruppa går etter planen. Vertsfamilien avgjer sjølv tidspunkt for å ha vennegruppa heime hos seg, og besøket kan t d. vara i 2,5-3 timar. Men, det skal alltid vera vaksne til stades når vennegruppa er samla!
5. Praktisk gjennomføring- vennegrupper til 1.-3.trinn Stikkord: «Gjer det enkelt!» I vennegruppene skal barna treffast for å leika og kosa seg saman. Det er ikkje naudsynt å organisera for mykje på førehand, det skal ikkje vera eit bursdagsselskap. Men det kan vera ein god ting at foreldra setter barna i gong, dersom dei har problem med å finna på noko sjølv. Det er imidlertid viktig med tilsyn av ein vaksen heile tida, slik at barn som er utrygge på kvarandre, kan få litt støtte og at alle deltek på lik linje. For dei foreldra som har lyst til å organisera nokre aktivitetar, er det sjølsagt berre å kasta seg over oppgåva. Mange har t d. hatt stor suksess med å la barna sjøl laga maten dei skal ete, kutta opp grønsaker til taco, legge på fyll på ferdig pizzadeig eller kutta frukt til fruktsalat. Er det godt vêr og gode føreforhold, kan ein også nytta årstidene; aking, ski, skøyter, badetur eller bærtur osv. Uteområda i skulekretsen innbyr til mange ulike aktivitetar. Men hovudmålet er alltid at barna skal gjera noko saman og bli betre kjent med kvarandre. Det er ei heller meininga at de skal stå klar med kaffi og kaker til foreldra som kjem for å henta barna. Ein prat er alltid hyggeleg, men det er ikkje meininga at ein skal nytta mykje tid på førebuing, før vennegruppa skal møtast heime hos dykk.
6. Evaluering Ordninga med vennegruppa skal ha klare mål; å strekka nettverka og redusera klikkdanning og konflikter. Etter 2 år skal difor ordninga evaluerast; har vi nådd måla om eit betre skulemiljø? Gjennom brukarundersøkinga, foreldremøter og utviklingssamtalar vil skulen få svar på om ordninga med vennegrupper bidreg til å styrka samhaldet på trinnet og hemma konflikter. Korleis har det gått med ordninga, kva har vi lukkast med, kva kunne vore betre og ikkje minst, kva gjer vi vidare? For å få vennegruppene til å fungera, må alle bidra. Dersom nokon har kommentarar, spørsmål eller innspel til ordninga, eller denne rettleiaren, ta kontakt med kontaktlærar på ditt trinn eller sosiallærar på 1.-7.trinn. Eit godt klassemiljø gir eit trygt skulemiljø som styrkar læringsmiljøet for alle.