Tíðindi úr Føroyum tann 24. aug Tíðindi til føroyingar uttanlanda stuðla av tí føroysku sjómanskirkjuni.

Transkript

1 Tíðindi úr Føroyum tann 24. aug Tíðindi til føroyingar uttanlanda stuðla av tí føroysku sjómanskirkjuni. Danjal av Rana (10:51) Nú er summarið her Milum eitt lágtrýst vestan fyri Skotland og eitt hátrýst yvir Skandinavia streymar heit luft eina tíð yvir Føroyar av landsynningi og eystri. Týsdagin og mikudagin flytir eitt lágtrýst seg til Føroya av landsynningi og hevur regn og ælaveður við sær. Mánadagin verður gott veður við einum guli til stívt andøvsgul av landsynningi og eystri, 5 til 10 metrar um sekundið, í støðum upp í strúk í vindi, 13 metrar um sekundið. Turt og nakað av sól. Hitin millum 13 og 18 stig, heitast vestanfyri. Um náttina verður eitt andøvsgul upp í ein strúk av vindi av eystri, 5 til 10 metrar um sekundið, framvegis turt og klárt veður og um 12 stig. Týsdagin verður eitt lot til andøvsgul av landnyrðingi, 3 til 8 metrar um sekundið. Fyrst verður sól, men sum frá líður skýggjað og um kvøldið og náttina regn í støðum. Hitin um dagin millum 13 og 18 stig, um náttina niður í 10 stig. Mikudagin verður eitt lot til eitt gul av ymsum ættum, 2 til 7 metrar um sekundið. Skýggjað og okkurt æli, men eisini møguleiki fyri sól seinnapartin. Hitin upp í 12 stig. Um náttina verður eitt lot til andøvsgul av suðri, 3 til 8 metrar um sekundið. Sum frá líður klárar í, og tað verður turt. Hitin um 10 stig. Hósdagin verður eitt gul til stívt andøvsgul av suðri og útsynningi, 5 til 10 metrar um sekundið. Skýggjað og ælaveður ymsa staðni. Hitin alt døgnið millum 10 og 13 stig. Fríggjadagin verður eitt gul til stívt andøvsgul av útsynningi, 5 til 10 metrar um sekundið. Samdrigið og møguliga okkurt æli. Hitin alt døgnið millum 10 og 13 stig. Leygardagin verður eitt lot til andøvsgul av ymsum ættum, 3 til 8 metrar um sekundið. Samdrigið og okkurt æli og hitin alt døgnið millum 10 og 13 stig. Uppsagnirnar í norsku frálandsvinnuni halda fram Túsundtals fólki eru søgd úr starvi í norsku frálandsvinnuni í seinastuni, og sum er røkist onki fyri, at nøkur vend kemur í í bræði. Fríggjadagin boðaði stóra norska Solstad-fyritøkan frá, at neyðugt verður at senda 300 fólk til hús, og samstundis verða tíggju frálandsskip hjá felagnum løgd. -Hetta er ein tungur dagur fyri okkum øll, sigur varastjórin í Solstad, Sven Stakkestad, við Haugesunds Avis. Felagið hevur sum er 1600 fólk í starvi. Helvtin av teimum 300, ið eru søgd úr starvi, eru norðurlendingar, meginparturin norðmenn. Hini eru úr Brasilia og Filipsoyggjunum. Trý av teimum 46 skipunum hjá Solstad eru løgd, og helst verða tíggju aftrat løgd hetta til árslok. - Vit hava nøkur skip klár, um onkur uppgáva kemur, og síggja annars fyri okkum, at øll hini skipini fara at liggja alt 2016, sigur Stakkestad við blaðið. Solstad-reiðaríið sendi fyrr í ár 50 fólk til hús. Kelda: maritime.no Antares.fo Norra revsar fyrsta skipið fyri brot á ECA-reglurnar Norska sjóferðslustýrið (NMD) hevur avdúkað navnið á fyrsta skipinum, sum hevur brotið dagførdu og herdu Emissions Control Area (ECA) reglurnar, sum komu í gildi 1. januar í ár. Farmaskipið Sardius, sum hollendska reiðaríið De Bock Maritiem BV (De Bock) eigur, varð kannað, eftir at tað legði at bryggju í Florø 5. februar. Skipið varð avdúkað í at hava brúkt ólógligt brennievni fyrr á degnum og somuleiðis 8. januar.

2 De Bock, sum eigur trý skip, ið eru í sigling framvið norsku strondini, er dømt at rinda eina bót upp á dollarar fyri brotini. Sambært Sjóferðslustýrinum vístu loggbøkurnar hjá skipinum, at Sardius í januar brúkti heavy fuel oil við einum innihaldi upp á í minsta lagi 13 ferðir meira svávul enn loyvda markið upp á 0,10 prosent í 15 tímar, skamt sunnanfyri Haugesund. Norsku myndugleikarnir siga eisini, at skipið brúkti heavy fuel oil í umleið tveir tímar aftur 5. februar, eftir at skipið var komið inn í ECA-umráðið. DeBock er ikki ósamt í innihaldinum í loggbøkrunum hjá Sardiusi, men er sera ósamt í revsingini. Reiðaríið sigur, at manningin á skipinum ikki var greið yvir, at teir vóru komnir inn í ECA-sjógv, og at kalla onki spardu við at brúka skeivt brennievni. Reiðaríið hevur biðið Den Norske Søfartsstyrelse um at umhugsa revsingina, tí skipini hjá reiðarínum ikki hava fingið nakra revsing áður fyri brot á ECA reglurnar. DeBock leggur aftrat, at burtursæð frá tveimum førum, har brot eru framd, vísa skjølini hjá skipinum, at tað altíð hevur brúkt rætta brennievnið. Harumframt heldur reiðaríið, at tað er siðvenja at geva ávaringar fyri slík brot beint eftir, at tey eru framd, ikki bøtur. Sardius er fyrsta av fýra málum av hesum slag, sum NMD hevur viðgjørt higartil í ár. Kelda: shipandbunker.com Antares.fo Smyril Line keypt tvey farmaskip Smyril Line hevur keypt systurskipini Cometa og Tananger. Tey bæði farmaskipini eru skrásett í FAS og eita nú Eystnes og Hvítanes. Skipini eru 102 metrar long, brt og hava hp Man maskinur. Manningin verður føroysk og við skipunum verða eini 32 mans. Síðan Smyril Line yvirtók Smyril Line Cargo fyrr í ár, hevur felagið arbeitt við at víðka og økja um farmavirksemið. Til tíðir hevur ikki verið nøktandi farmakapasitetur umborð á Norrønu, og millum annað orsaka av hesum, hevur Smyril Line keypt tey bæði nýggju farmaskipini. Smyril Line yvirtekur skipini í næstum, og væntandi verða tey at síggja í vanligari sigling um hálvan oktober. Eystnes siglir tó longu ein túr seinni í vikuni, tá ið teir hjálpa Norrønu at flyta farm. Keypið av Eystnesi og Hvítanesi er enn ein liður í at víðka og menna um virksemið hjá Smyril Line. Samlaða starvsfólkatalið í Smyril Line verður við nýggju íløguni umleið 300 fólk. Tey starvast á skrivstovunum hjá Smyril Line í Føroyum, Íslandi, Danmark og Týsklandi, við Norrønu, Eystnesi og Hvítanesi og á Hotel Skálavík. Kelda: vp.fo Antares.fo Freistin at bjóða er í dag :10 Í dag er evstamark fyri at bjóða upp á tey 30 prosentini av Eik banka, sum Fíggjarligt støðufesti eigur TF Holding og Fíggjarligt støðufesti gjørdu í 2011 parteigaraavtalu um, at TF Holding hevur forkeypsrættin til tey 30 prosentini av Eik banka fyri 293 milliónir krónur Men 15. august segði stjórin í Fíggjarligum støðufesti, Henrik Bjerre-Nielsen, við Útvarpið, at forkeypsrætturin er ikki meira bindandi enn so, at bjóðar onkur hægri enn TF Holding, og TF Holding ikki er sinnað at lata so nógv, so fær hin íleggjarin tey 30 prosentini. Kvf.fo Løgreglan stendur á berum í kirkjuinnbrotum :09 Løgreglan hevur ongar ítøkiligar slóðir at elta í kjalarvørrinum á teimum fýra innbrotunum, sum hava verið í fýra føroyskum fólkakirkjum Tað byrjaði við einum innbroti í Tjørnuvíkar kirkju, men tað steðgaði ikki har. Seinastu vikuna hevur verið brotið inn í tilsamans fýra føroyskar fólkakirkjur.

3 - Løgreglan hevur onga slóð at elta aftaná innbrotini, sigur Hallgrím Hansen, vaktleiðari á politistøðini, í samrøðu við útvarpið í morgun. Hesa seinastu vikuna er brotið inn í kirkjurnar í Tjørnuvík, Norðskála, Hvannasundi og Sandavági. Í øllum innbrotunum eru kirkjubússurnar tømdar fyri pening. Kvf.fo Leiðarar á kreppufund um flóttafólkastreymin :37 Franski forsetin og týski samveldiskanslarin fara í dag á kreppufundi at umrøða, hvussu trupulleikin við flóttafólkastreyminum kann loysast Politisku leiðararnir í Fraklandi og Týsklandi, Francois Hollande og Angela Merkel, skulu í dag á kreppufund um, hvat Evropa skal gera við avbjóðingina við tey nógvu flóttafólkini, sum koma til Evropa. Franski forsetin og týski samveldiskanslarin skulu millum annað tosa um kvotur fyri flóttafólk og tilflytarar, váttar franski innanríkisráðharrin, Laurent Fabius, fyri Reuters tíðindastovuni. Ein kelda hartar avgerðir hjá ES Ein kelda í fronsku forsetaborgini sigur við fronsku tíðindastovuna, AFP, at avgerðirnar, sum higartil eru tiknar í ES ikki eru nøktandi, ikki eru nóg skjótar og loysa ikki uppgávuna. Støðan loysir ikki seg sjálva, sigur keldan. Í juni vístu limalond í ES aftur uppskotið frá Jean Claude Junkcker, formanni í ES-nevndini, um at seta í verk kvotur fyri, hvussu túsundtals fóttafólkini, sum streyma - serliga- til Italia og Grikkaland - skulu býtast millum londini í Evropa. Á fundinum í dag fara Hollande og Merkel at tosa um ynskini hjá stjórnum teirra um at fara longri fyri at fáa semju um strategi, sum millum annað fevnir um politikk fyri friðskjót, og fyri at seta í verk ein meiri fullkomnan evropiska politikk, sigur keldan á fronsku forsetaborgini. Umrøða møguleikan at gera móttøkustøð Sambært kelduni fara Merkel og Hollande at hava ein lista yvir lond, hvørs ríkisborgarar ikki fara at verða tiknir sum umsøkjarar um friðskjól uttan so, at óvanlig persónlig viðurskifti tala fyri hesum. Higartil hevur ikki eydnast at gera slíkan lista í ES-høpi. Angela Merkel og Francois Hollande skulu eisini tosa um, hvussu ES kann hjálpa til at seta í verk móttøkumiðstøðir í Grikkaland og Itala fyri at hjálpa til við at eyðmerkja tey, sum søkja um friðskjól og tilflytarar, sum skulu sendast heimaftur. Seinast mánaðin eru fólk komin til ES-londini. Talið veksur væntandi næstu mánaðirnar, skriva tíðindastovurnar, Ritzau og AFP. Kvf.fo Læknar rópa varskó um kynssjúku :39 Læknar í Nuuk stúra fyri at ein nýggj syfilis farsótt kann fara at herja í Grønlandi, nú talið á fráboðanum støðugt veksur Í nógv ár hava so at siga eingir tilburðir verið staðfestir av kynssjúkuni syfilis. Men nú er álvarsliga kynssjúkan aftur um at gerast trupulleiki í Grønlandi, skrivar blaðið, Sermitsiaq. Tríggir læknar á sjúkrahúsinum í Nuuk rópa nú varskó, eftir at talið av fráboðanum um syfilis er vaksið. Teir stúra fyri, at nýggj syfilis farsótt kann fara at herja í Grønlandi. Samstundis mæla tey til, at myndugleikar og heilsstarvsfólk seta í verk fyribyrgjandi tiltøk og royna at fáa samband við tey, sum eru smittað og tey, sum tey hava verið saman við. Teir tríggir læknarnir hava júst almannakunngjørt frágreiðing um evnið í enska læknatíðarritinum, International Journal of Circumpolar Healt, sum partvís arbeiðir við heilsuviðurskiftum í Arktis. Kvf.fo Hevur fingið nokk - savnar inn undirskriftir :15 Sunneva Ludvig, kommunuskrivari í Hvannasundi, hevur fingið nokk. Hon savnar nú inn undirskriftir, at fáa gjørt okkurt við tunlarnar norður um fjall - Eg havi fingið propp av proppum, og nú má okkurt gerast, sigur Sunneva Ludvig, kommunuskrivari í Hvannasunds kommunu, ið hevur tikið stig til undirskriftinnsavning at fáa gjørt okkurt við tunlarnar norður um fjall.

4 Sunneva Ludvig sigur, at alsamt fleiri, størri og tyngri bilar koyra ígjøgnum tunlarnar, og tað hevur havt við sær nógvar proppar í summar. Hetta kann verða vandamikið, og órógvar sera nógv gerandisdagin hjá borgarunum ið búgva norðuri um fjall, vinnuna og ferðavinnuna, heldur Sunneva Ludvig. Frætt meira í útvarpstíðindunum klokkan 12:20. Kvf.fo Hallur av Rana (08:59) Maður handtikin umborð á Næraberg Í gjár kom Næraberg aftur til Føroyar aftaná ein túr í Eysturgrønlandi, har skipið hevur á makrelveiðu. Fjøruti mans eru við Næraberg í løtuni, og kom skipið á Kollafjørð um 16 tíðina í gjár. Hóast skipið einans hevur ligið eina nátt í Føroyum, so varð neyðugt at senda boð eftir løgregluni í gjár. Orsøkin var, at illstøða var komin millum nakrar mans, meðan teir sótu í vertskapi umborð. Boð vórðu send eftir løgregluni, ið fór umborð á trolaran og handtók ein av útlendsku monnunum, ið síðani varð koyrdur til Klaksvíkar at sova rúsin av sær. Danjal av Rana (13:02) Fría atgongd til arbeiðsmegi Føroya Arbeiðsgevarafelag vil hava markið á 3,5 prosent burtur, so lættari verður hjá fyritøkum at nýta útlendska arbeiðsmegi. Markið á 3,5 prosent sigur, at einans er loyvt at nýta útlendska arbeiðsmegi í Føroyum, um arbeiðsloysi er lægri enn 3,5 prosent. Hetta er gjørt, fyri at tryggja, at føroyginar fáa størvini, áðrenn latið verður upp fyri útlendskari arbeiðsmegi. Nú vil Føroya Arbeiðsgevarafelag hava lógina broytta. Føroya Arbeiðsgevarafelag vísir á, at nógvir føroyingar leita sær av landinum at arbeiða, men sum orðatakið sigur, maður má koma í mans stað. - Føroyski arbeiðsmarknaður er opin, og føroyingar hava frælsi at flyta seg út um landoddarnar eftur nýggjum størvum eisini um líknandi størv eru at fáa í Føroyum. Um hetta framhaldandi skal vera soleiðis, er neyðugt, at eisini føroyskir arbeiðsgevarar fáa fríar ræsur til at fáa arbeiðsmegi inn um landoddarnar, boðar Føroya Arbeiðsgevarafelag frá. Føroya Arbeiðsgevarafelag sigur, at hóast vit hava tøl fyri, hvør tørvurin er, so er sannlíkt, at veruligi tørvurin er størri. - Sannlíkt er, at fyritøkur halda seg aftur við t.d. at bjóða uppá arbeiði, tá tær ikki vita, um tær kunnu fáa neyðuga arbeiðsmegina til uppgávuna, og tí tykist tørvurin lægri, enn hann hevði verið, um fyritøkurnar sluppu at virka frítt, skrivar Føroya Arbeiðsgevarafelag í dag. Føroya Arbeiðsgevarafelag vísir á, at um vit hava strangari treytir í mun til útlendska arbeiðsmegi enn grannalondini, eru vit eisini aftast í røðini í kappingini um arbeiðsmegina. - Hetta kann kosta okkum dýrt. Vit eiga framhaldandi at vera var við, at neyðugt er at seta við, eisini í Føroyum, sigur Føroya Arbeiðsgevarafelag. - Føroya Arbeiðsgevarafelag hevur tí greiðu støðu, at markið á 3,5 % eigur at verða tikið burtur, soleiðis at føroyskar fyritøkur kunnu seta borgarar úr ES-londum í starv eftir lagaligari mannagongd, enn annars er galdandi. Føroyski arbeiðsmarknaðurin eigur at verða javnsettur við arbeiðsmarknaðirnar kring okkum. Vit eiga altíð at hava ein líka opnan arbeiðsmarknað inneftir sum úteftir, skrivar Føroya Arbeiðsgevarafelag. Eirikur Lindenskov (13:18) Triton á veg í grind Sjóverjan hevur sett kósina móti grindini í Leirvík, og Bob Barker liggur á Sundi

5 Løgreglan hevur í dag víst vøddar mótvegis Sea Shepherd. 21 fólk sum komu við skipinum hjá Sea Shepherd, Bob Barker um middagsleitið sleppa ikki í land. Tað kemur uttan iva dátt við hjá felagsskapinum, tí um sama mundið, sum tey fingu hesi boðini, varð boðað frá grind í Leirvík. Sjóverjuskipið Triton, sum fylgdi Bob Barker, tá hann nærkasti Sandoynni eystanifrá og inn í Nólsoyarfjørð. Men nú boðað varð frá grind í Leirvík, setti Triton ferð á motorarnar við kós móti Leirvík. Hini bæði skipini hjá Sea Shepherd, Brigitte Bardot og Sam Simon hava framvegis ikki tendrað AIS'in, sum vísir knattstøðuna hjá skipunum. Hallur av Rana (13:21) Bob Barker kom í dýrdarveðri Føroysku oyggjarnar vístu seg frá teirra bestu síðu og veðrið var tað besta, tá Sea Shepherd skipið Bob Barker kom á Sund við føroyska flagginum í húnar hátt. At talan var um eitt serligt skip sást í uppmøtingini. Fitt av fólki vóru samlaði á kaiini, harav tey flestu vóru klædd í svørtu klæðunum hjá Sea Shepherd, men eisini fjølmiðlar og føroysku myndugleikar vóru til staðar. Tollvaldið og løgreglan fóru umborð á skipið, har løgreglan gav teimum tey boð, at tey 21 fólkini umborð á skipinum ikki fingu innfararloyvi til landið. Skipið sjálvt tyktist at vera í ringum standi, og tað var týðiligt, at talan er um eitt skip, ið hevur nógv arr frá gomlum stríðum í øðrum londum. At skipið eisini er klárt til stríð í Føroyum sæst, tí á dekkinum vóru tveir skjóttgangandi bátar, ið helst eru ætlaðir at brúka í stríðnum móti grindadrápi. Hvussu hetta stríðið fer at spæla av má tíðin vísa, nú føroyskir myndugleikar hava sett hart móti hørðum og nokta manningini innfararloyvi. Danjal av Rana (14:48) Virða ikki lógirnar Tá Bob Barker kom á Sund í morgun, stóðu løgregla og tollarar fyri teimum, sum vanlig mannagongd er. Tollvaldið og løgreglan fóru umborð og løtu seinni boðaði løgreglan í tíðindaskrivi frá, at manningin, ið telur 21, ikki fær innferðarloyvi, og tí má fara úr landinum aftur. Andras Marr Poulsen, varapolitiinspektørur, sigur, at avgerðin er tikið í eini heimild í útlendingalógini. - Har eru ásetingar í útlendingalógini, sum vísa til atlit at lóg og landaskili, og tað eru hesar heimildir, vit styðja okkum at, sigur hann. Hann vísir á, at løgreglan síðani í vár hevur havt samskifti við Sea Shepherd og teirra umboð her í Føroyum. - Vit høvdu fund við tey fyrr í ár og kritaðu tá banan upp, og greiddu teimum frá, hvørji rættindi tey høvdu viðvíkjandi talufrælsi, men eisini hvat vit væntaðu av teimum. Hendingarnar fyrr í summar hava tó víst, at tey ikki virða okkara lógir, og tí fara vit meiri víttgangandi til verka hesaferð, sigur Andras Marr Poulsen.

6 Tey 21 fólkini fáa nú møguleikan sjálvi at fara av landinum. Tað vil siga, at tað er upp til teirra, um tey sigla avstað við Bob Barker, ella um tey fara av landinum á annan hátt. Danjal av Rana (15:33) Methøgt fólkatal Sambært nýggjastu uppgerðini av fólkatalinum hjá Hagstovuni búðu fólk í Føroyum 1. juni. Í 12 mánaðar skeiðinum 1. juni 2014 til 1. juni 2015 var burðaravlopið 234 og nettotilflytingin 282. Hetta gevur ein fólkavøkstur á 516. Sambært Hagtalsgrunninum hjá Hagstovuni er hetta nýtt met. Gamla metið var frá 1. septembur 2009, tá fólkatalið var Samanborið við síðstu uppgerð fyri 12 mánaðar skeiðið mai mai 2015 er burðaravlopið so at siga óbroytt, skrivar Hagstovan. - Fráflytingin er nakað størri og tilflytingin nakað minni, so nettotilflytingin er minkað úr 316 til 282. Vøksturin í fólkatalinum er tí eisini 33 fólk minni enn við síðstu uppgerð, stendur at lesa á heimasíðuni hjá Hagstovuni. Hallur av Rana (16:07) Trý Sea Shepherd fólk handtikin í Fuglafirði Trý Sea Shepherd fólk vórðu handtikin í Fuglafirði í dag, tí tey royndu at órógva arbeiðið, tá sendaran vórðu settir á grindina. Tað boðar løgreglan frá í tíðindaskrivi. Tað var tá fólk frá Náttúrugripasavninum royndu at seta sendararnar á hvalirnar, at trý Sea Shepherd fólk royndu at órógva hesum. Tey handtiknu eru ein 25 ára gamal maður og tvær kvinnur sum eru ávikavist 24 og 31 ára gamlar. Tey handtiknu koma frá Kanada, USA og Fraklandi. Tey handtiknu verða skuldsett fyri brot á grindalógina. Politiið hevur ikki fleiri viðmerkingar til málið í løtuni. Danjal av Rana (16:25) Toskurin meiri verdur Hagstovan boðar í dag frá, at útflutningurin fyrra hálvár í ár er vaksin 230 milliónir krónur ella 8% samanborið við sama tíðarskeið í fjør. Tølini vísa, at tað er útflutt meiri av uppsjóvarfiski í ár. Talan er um tvífalding av virðinum, meðan nøgdin er helvtina størri enn í fjør. Við øðrum orðum hevur prísurin higartil verið hægri enn í fjør. - Útflutningurin av botnfiski er eisini vaksin nógv í virði, meðan nøgdirnar eru minkaðar nakað. Her er tað útflutta virðið av toskinum, sum er vaksið nógv í ár. Nøgdin av toski er áleið tann sama, skrivar Hagstovan. Hagstovan boðar eisini frá, at fyri fyrstu ferð í langa tíð er útflutningurin av alifiski ikki vaksin. Trý túsund færri tons eru útflutt, og svarar tað til góðar 100 mio. Tað er ein minking á uml. 10%. - Hóast hesa minking er alifiskurin framvegis ein sera stórur partur av útflutninginum, og hesar fyrstu 6 mánaðirnar er laksur 43% av samlaða útflutninginum av fiskavørum. Fyrra hálvár í fjør var laksurin 50%, skrivar Hagstovan.

7 Vilmund Jacobsen (18:04) Soleiðis skal makrelveiðan býtast Í morgun skrivaðu manningarfeløgini, Føroya Skipara-og Navigatørfelag og Maskinmeistarafelagið øðrumegin og reiðaríini, P/F Jókin og TG Fish hinumegin, undir avtalu um flutningsskip og trolarar, sum fiska makrel í bólki 2. Avtalan snýr seg eitt nú um at býta søluupphædd fyri veiðina millum trolarar og flutningsskip, sum í hesum førinum er millum Fram (sum flutningsskip) og teir trolarar - partrolarar ella lemmatrolarar - sum fara at fiska makrel. Í avtaluni stendur, at " søluupphæddin verður býtt soleiðis, at flutningsskipið (Fram) fær 36% av søluupphæddini - og trolararnir fáa 64% av býta sínámillum ". Um avrokningina stendur, at " trolarar í bólki 2 avrokna við býtisprosentinum, sum er ásett í sáttmálanum millum manningarfeløgini og Føroya Reiðarafelag " Lagt verður aftrat, at " flutningsskip avrokna við býtisprosentinum, sum svarar til býtisprosentið í skipabólkinum, ið skipið er partur av " Feløgini, Føroya Skipara-og Navigatørfelag, Maskinmeistarafelagið, P/F Jókin og P/F TG Fish, sum hava undirskrivað avtaluna, siga, at endamálið við ásetingunum er, at manningarnar á trolaraunum og á flutningsskipinum tjena á leið tað sama. - Annars eru felags reglurnar galdandi, verður lagt aftrat í avtaluni millum partarnar, sum er galdandi frá 24. august 2015 og árið út. Vilmund Jacobsen (18:21) Pallborðsfundur í Kollafirði í kvøld Veljarin, sum hevur saknað tað góða gamla við veljarafundum, slapp rættiliga at uppliva ein slíkan fund av teimum gomlu, tá bjóðað varð til fundar í Vestmanna seinasta hóskvøld. Í kvøld verður enn ein politiskur pallborðsfundur í Arbeiðsmannafelagshúsinum í Kollafirði, og fundurin í kvøld byrjar klokkan Triði og seinasti pallborðsfundurin í hesum umfari verður í Eydnuni á Oyrarbakka mikukvøldið 26. august klokkan Tað eru politisku valfeløgini í Norðurstreymoy sum skipa fyri. - Vit vóna, at valevnini fara at geva áhoyrarunum gott grundarlag at seta spurningar, og at fleiri áhugaverdir spurningar fara at koma úr salinum eisini, siga fyrireikararnir. Vilmund Jacobsen (19:29) Gordrúgvin royndist drúgvastur Seinnu árini, meðan fleiri útróðrarmenn eru givnir at rógva út vegna vánaliga toska-og hýsuveiði, eru tað tó nakrir útróðrarmenn, sum hava fingið tað at bera væl til. Á sjómannadegnum í Klaksvík leygardagin varð útróðrarbáturin Gordrúgvin, sum fiskar í bólki 5A, heiðraður fyri størstu nøgd og størsta veiðivirði í hesum bólki í Tað er Sámal Debess á Oyri, sum eigur bátin, og hann og hansara menn teljast millum raskastu og dugnaligastu útróðrarmenn í Føroyum. hevur roynt at fingið fatur í Sámali Debess í dag, men tað hevur ikki eydnast. Vit hava tó skilt, at veiðivirðið hjá bestu útróðrarbátum í bólki 5A í fjør liggur um 3,5 miljónir krónur.

8 Vilmund Jacobsen (20:13) Fiskivinnan sjálv er besti umsitari Alfred Olsen, formaður í vinnunevnd løgtingsins, segði á Føroya Sjómannadegi í Klaksvík leygardagin, at hesir dagar á serstakan hátt samansjóða familjuna og fiskivinnuna í nøkrum góðum og gevandi tiltøkum. - Hugburður og atferð hjá fiskivinnuni styrkir mítt álit á, at vinnan umsitir okkara fiskastovnar væl og skynsamt. Vit fáa ferð eftir ferð at vita frá serfrøðini, at vit sum politikarar skulu taka fiskidagar frá vinnuni. Hann segði, at serfrøðin heldur fiskivinnuna uppføra seg soleiðis, at hevur hon nakrar fiskidagar at brúka - ja, so brúkar hon teir allar. - Tilráðingin hjá fiskifrøðini er, at vit fyrst skuldu taka allar óbrúktar dagar inn og haraftrat taka helvtina av teimum døgum, sum skipini høvdu brúkt. Hetta varð sagt vera neyðugt fyri at verja fiskastovnarnar móti vinnuni. Men, Alfred segði seg ikki vera samdan í, at hetta er hugburðurin og atferðin hjá fiskivinnuni. - Vit kunnu hyggja eftir bólki 3, sum eru línuskip yvir 110 tons. Skipini hava fingið tillutað sína kvotu av fiskidøgum. Sambært fiskifrøðini skuldu hesi skip verið úti og fiskað undir Føroyum fyri at brúka sínar seinastu fiskidagar í hesum fiskiári. Men, soleiðis er ikki. Alfred Olsen vísti á, at bert okkurt einstakt línuskip fiskar undir Føroyum í løtuni. Ikki tí, at eingir fiskidagar eru eftir. Tað er tí ikki rætt, at línumenn fiska bara fyri at brúka fiskidagar, men fyri at fáa fisk. Tað er tað, ið teir - og vit - liva av. - Hvar eru so okkara línuskip í dag, tá tey ikki liggja við bryggju? Jú, okkara dugnaligu skipaeigarar hava forhandlað seg til brúkiligar avtalur við grønlendsk feløg. Hesar avtalur hava ført við sær, at okkara línuskip í dag fiska í Eysturgrønlandi, bæði inni við land og á djúpum vatni og hava brúkiligan fiskiskap. Alfred Olsen, formaður í vinnunevnd løgtingsins, helt, at okkara fiskivinna sjálv er besti umsitari av fiskatilfeinginum undir Føroyum. - Tað er ikki undarligt, at vit, sum kenna hesa vinnu, fáa størri og størri virðing fyri teimum dugnaligu fólkum, ið her starvast. Tað dreiv, hugflog, framdrift og ótroyttiliga áhaldni, sum er í okkara samlaðu fiski-og alivinnu, er fantastiskt. Latið okkum tí hava tey høgt í metum okkara millum, segði formaðurin í vinnunevnd løgtingsins á sjómannadegnum. Vilmund Jacobsen (23:26) Stapin og Klakkur gjørdust bestir Á sjómannadegnum í Klaksvík leygardagin vórðu línuskipini, Stapin og Klakkur, sum fiska í bólki 3, heiðrað fyri ávikavist størstu veiðinøgd og størsta veiðivirði í undanfarna ári. Í uppgerðini yvir bestu skip og bátar, sum verður løgd fram á sjómannadegnum, fylgja eingi tøl, men bara, hvørji skip/ bátar hava ávikavist størstu nøgd og størsta veiðivirði. Í summum førum er tað sama skip/ bátur, sum er best í báðum tveimum, t.v.s. í nøgd og veiðivirði, men soleiiðis er tað ikki altíð. Tað er Jákup Eli Eidesgaard, skipari á Eiði, sum førir Stapan, og tað eru brøðurnir, Líggjas og Bethuel Johannesen í Klaksvík, sum skiftast um at føra Klakk. hevur annars skilt, at Klakkur hevur havt eitt rættiliga gott ár í ár - og nógv betri enn nakað annað ár í nýggjari tíð.

9 Longu teir fyrstu tveir mánaðirnar í ár, tá skipið var á Flemish Kap, mundi veiðivirðið tátta í 10 miljónir krónur, sum er óføra gott. Tað verður í øllum førum spennandi at síggja, hvussu hetta árið fer at vignast hjá okkara línuskipaflota, tá saman um kemur. Meting um tilfeingið fyri viku 35 Friday, 21 August 2015 Samandráttur: Línuskip: Bara eitt línuskip er til fiskarí undir Føroyum (fríggjadag 21/08) og kemur tað at landa síðst í vikuni ella fyrst í aðru viku. 9 línuskip eru við Eysturgrøndi og landa øll, sum ísa umborð, fiskin í Íslandi. Annars so fara vantandi nøkur línuskip út í næstum. Helst fer onkur til Íslands. Útróður. Streymurin er góður, men harðnar sum vikan líður. Veðrið sær gott út fyri vikuna, so helst verður nakað av útróðrafiski. Tað er ein blandingur av toski og hýsu sum bátarnir fáa. Onkur fær nakað av kalva. Djúpvatnstrolarar: Fýra eru til fiskarí. Teir fiska mest svartkalva, kongafisk og upsa. Ein fiskar mest av upsa og so nakað av toski og hýsu. Ein landar miðskeiðis í vikuni, meðan hinir landa síðst í vikuni ella fyrst í aðru viku. Partrolarar: Partrolarnir hava smáligt fiskarí, tó fær okkurt parið brúkiligt fiskarí. Teir fáa nakað av hvítum fiski, serliga longu og toski. Teir landa sum vikan líður. Trý pør eru á gulllaksaveiðu. Trolbátar: Ein er á landleiðin og fiskar mest tosk, reyðsprøku, tungu og havtasku. Hann landar síðst í vikuni. Trýggjir trolbátar eru á rygginum, meðan tveir eru norðanfyri. 2-3 landa mánadagin og so landa hinir seinni í vikuni. Garnaskip: Eitt fer til fiskarí í vikuni og kemur helst at landa síðst í vikuni. Hann fiskar svartkalva. Fmf.fo Valutanavn Nationalbankens middelkurs Australske dollar 469,30 Bulgarske leva 381,60 Brasilianske real 182,32 Canadiske dollar 489,85 Schweizerfranc 692,52 Kinesiske renminbi.yuan 101,35 Tjekkiske koruna 27,570 Euro 746,33 Britiske pund 1022,09 Hong Kong dollar 83,73 Kuna 98,72 Ungarske forint 2,3680

10 Israelske new shekel 167,14 Indiske rupees 9,7200 Japanske yen 5,4160 Mexicanske peso 37,910 Norske kroner 79,66 Newzealandske dollar 425,82 Polske zloty 175,91 Russiske rubel 9,1600 Svenske kroner 78,53 Singapore dollar 458,57 Thailandske baht 18,150 Tyrkiske lira 219,70 US dollar 649,15 Sydafrikanske rand 48,930 Danskebank.dk Andlát Sonja Lipczak, fødd Clementsen, búsitandi í Hornbæk andaðist 23. august, 77 ára gomul. Jógvan Kári Waag Jacobsen, vanliga nevndur Jógvan á Bakkanum, Klaksvík, andaðist leygardagin 22. august, 71 ára gamal.