ei norsk oppleving
Juvet Landskapshotell I tunet Burtigard på Alstad i Norddal kommune blir det etablert ei reiselivsbedrift utanom det vanlege; eit landskapshotell som tilbyr eit kortferiekonsept basert på geoturisme. Landskapshotellet består av våningshuset på garden, låven, og i første omgang inntil ti frittståande hotellrom som blir plasserte ute i tilnærma urørt natur. Kvart «rom» får si unike utsikt til rå norsk natur: tunet, elva, dalen, fjella eller juvet. Romma får ei moderne utforming som går inn i naturen, slik at naturen og det moderne framhevar kvarandre. I høgsesongen får gjestene tilbod om eit femdagars opphald som blir toppa med naturopplevingar i det vestnorske fjordlandskapet. Profesjonelle vertar tek hand om dei, følgjer dei på turar, lagar mat og formidlar kunnskap om naturen, kulturen, geologien og historia i området. Gjestene skal reise herifrå med ei klar kjensle av at dei verkeleg har opplevd ein bit av Noreg. Utanom sommarsesongen arrangerer landskapshotellet temaopphald, og vender seg til bedrifter og organisasjonar. I helgane blir det stort sett ope for bryllaup, åremålslag, slektsstemne, blåturar osb. Garden ligg ved Gudbrandsjuvet, den mest besøkte naturattraksjonen på vegen mellom Trollstigen og Geiranger. Denne vegbiten får status som Nasjonal Turistveg. Hotellkonseptet, som blir opna i 2008, er blitt til i eit samarbeid mellom Nasjonal Turistveg, arkitektkontoret Jensen og Skodvin (JSA) og grunneigar Knut Slinning.
«eit møte med rå norsk natur, kulturhistorie og moderne arkitektur» «THE NORWEGIAN BIG FIVE» Juvet landskapshotell rettar seg først og fremst mot internasjonal kortferieturisme, hovudsakleg i Danmark, Tyskland, Nederland, Storbritannia og Noreg. Dette er eit tilbod i det øvste prisleiet, der vi satsar på det eksklusive. Gjestene på Juvet landskapshotell skal bu i nærkontakt med naturen dei får likevel svært høg grad av service og komfort. Medan dei bur her, skal dei oppleve fem av dei eksotiske opplevingane som Noreg er kjent for, til dømes: topptur på ski eller til fots lettare klatring/rappellering rafting stå på ski på Stryn Sommarskisenter besøkje verdsarvområdet og ein av fjellgardane i Geirangerfjorden. 3d Jensen & Skodvin
Burtigard anno 1880 Tanken bak Burtigarden på Alstad er frå gammalt av ein av dei største gardane i Norddal kommune. Garden ligg ved innfallsporten til verdsarvområdet, og Reinheimen nasjonalpark går nesten heilt inn på tunet. Vi finn garden og folket dokumenterte i bygdebøker og kyrkjebøker tilbake til 1500-talet, og det er verdt å nemne at garden ligg på historisk grunn. Snorre skriv at Heilag-Olav på si ferd gjennom Valldalen i 1028 overnatta fleire netter under Olavshellaren då han rydda Skjærsura for å kome seg vidare til Sverige. Hellaren, Olavsvegen og Olavskjelda er i dag levande kulturminne frå den ferda. Det er sjølvsagt eit poeng å nemne at vatnet vi drikk og badar i, kjem frå Olavskjelda. I Snorre står det at den som drikk av denne kjelda, skal bli frisk og halde seg ung Vi har restaurert og tilbakeført bygningane på garden med respekt og vørnad for det som forfedrane og formødrene våre har stått for. Dette vil også seie at vi tek ansvar for kulturlandskapet, syner fram gamle gardsreiskapar og gjenskaper gamle tufter slik at garden blir eit eksempel på korleis ein skjøttar jorda og kulturhistoria vel. Det nye som skal setjast opp i Burtigarden, skal gjerast med varsam hand, utan store inngrep i naturen. Dei gode miljøløysingane skal speglast både under oppføring og i dagleg bruk. Likevel skal arkitekturen og det estetiske tydeleg vise at «vi har vore her, vi også». Tida er annleis i Burtigarden no. I staden for å ta oss av dyr og produsere mat, skal vi ta oss av menneske og vise gjestfridom. Inst inne dreier reiseliv seg om å ta seg av folk på skikkeleg vis, slik at dei reiser vidare med gode kjensler kjensla av å ha fått ein smakebit av det gamle, av det nye, og av det som finst i Valldal her og no.
Trollstigen Valldalen Gudbrandsjuvet Tafjord Geiranger JUVET landskapshotell Alstad, 6210 Valldal T: +47 9503 2010 post@juvet.com juvet.com