Det Norske Samlaget 2016 www.samlaget.no Omslagsdesign: Torill Stranger Omslagsillustrasjon og vignettar: Lene Ask Tilrettelagd for ebok av BookPartnerMedia, København 2016 ISBN 978-82-521-8946-9 «Fager kveldsol smiler». Av August Heinrich Hoffman, til norsk ved Peter Hognestad. «Visa vid vindens ängar». Av Mats Paulson.
Om denne boka Sjarmerande og ellevilt! Det er sommarferie og skulefri. Alvar og Jens badar med Gulla, leitar etter firkløver, har klubbmøte i trehytta ja, dei gjer alt det kjekke ein kan gjere på ei øy uti havgapet. Og snart skal ein gut flytte inn i Kråkeslottet. No skal dei bli tre det må jo bli trippelt så kjekt! Men når den nye guten kjem, forstår Alvar at sommaren blir ganske annleis enn han har sett for seg. Det blir sjalusi, krangel og forviklingar. Alvar må finne den vesle helten i seg, og det litt kjapt.
Christian Wiik Gjerde JAKTA PÅ FIRKLØVEREN
Oslo 2016
Til Signe og Elise, Theo og Alva
Innhald Trekløveret 1 Alvar treng naudhjelp med ein gong 2 Gulla er verdas beste flytebrygge 3 Velkomen til grineklubben 4 Magnus flyttar inn i Kråkeslottet 5 Regndansen 6 Katastrofe og ni velskapte edderkoppar 7 Hennemanejt stejkafejt! 8 Det blodige bitet 9 Dei kvite fingrane 10 Gulla syng den triste songen 11 Brevet med silkeband 12 Branntauet 13 Straks attende vi har brannøving 14 Den store korkonserten 15 Alvar dreg til sjøs 16 Verdas modigaste Alvar 17 Velkomen til ubursdag 18 Grineklubben driv med ekte spionasje
19 Er det verkeleg sant? 20 Den varme skinnjakka 21 No må du pikatre skjerpe deg! 22 Den vesle helten 23 Og så var dei fem
Trekløveret Om du sit i ein færing på ein blikstill sjø, og har havet og fyrtårnet i ryggen, kan du sjå Gulløya. Det er ei passe stor øy. Iallfall omtrent så stor som ei øy bruker å vere. Rett framme ved brygga er eit stort raudmåla hus. Det er her Gulla bur. Ho både jobbar og bur i huset sitt. Gulla er akkurat så gamal som gamle damer bruker å vere. Og ho er akkurat så koseleg som ei gamal dame skal vere, med dei lilla krøllene sine og den vennlege stemma. Ho har ei krambu der ho sel alt du kan tenkje deg. Både mat og godteri, leiker og anna skrot som kan vere nyttig å ha. Like bak Gulla si krambu ligg Kråkeslottet. Det kvite huset med kråkereir i pipa har stått tomt så lenge Alvar og Jens har levd. Og det er lenge, for dei er ni og ti år gamle. Alvar og Jens er naboar og bur rett bak Kråkeslottet i kvart sitt kvitmåla hus, saman med familiane sine. Dei er bestevenner. På heile øya er det
rikeleg med barn. Eller, det er nok barn til at dei har tre klasser på skulen. Men resten av barna bur på den andre sida av øya. På nordsida, der sentrum er. Det er på nordsida både skulen, kyrkja og frisørsalongen til Jens si mor ligg. Det er forresten her Gulla får sine lilla krøller, som Alvar synest er så fine. Like utanfor sentrum ligg også ferjekaia. Far til Alvar tek denne ferja kvar dag, for han jobbar på skipsverftet som ligg på fastlandet. Når Alvar skal byrje på ungdomsskulen, skal han også ta denne ferja, men det er heldigvis nokre år til. Frå tunet der Alvar og Jens bur, kan dei kome seg til nordsida enten ved å gå eller sykle over fjellet på kjerrevegen. Dei kan også ta bussen, om dei er heldige og rekk han. For han går nesten aldri. Dei kan ta færingen, men når dei ror langt fram til noko, og heile tida veit at det er like langt å ro tilbake, blir det ikkje så ofte dei orkar å legge ut på ein slik tur. Foreldra har sjølvsagt bil, men køyrde blir dei nesten aldri. Spesielt ikkje no når det er ferie. Alle foreldra er så opptekne med sitt. Alvar si mor har til og med nettopp fødd ein veslebror som bæsjar gul babybæsj, og som er full av kolikk. Når Alvar og Jens ikkje er på besøk hos Gulla, er dei ofte i Trollskogen som ligg like bak alle husa. Der har dei ei stor og fin trehytte, som foreldra deira har hjelpt til med å lage. Ho ligg høgt oppe i trea og er vanskeleg å sjå om du ikkje veit at ho ligg akkurat der. Ho er gøymd bak dei svære trekronene som blafrar lett i sommarvinden. No når denne historia tek til, er sommarferien godt i