Til... Frå... God Jul, Kald Kaffi Sauen!

Til... Frå... God Jul, Kald Kaffi Sauen!

Eit lite julekorthefte! Eg gleder meg til jul. Kanskje er eg ikkje aleine om det. Famile, julefilmar, julebrus, kakemenn og ikkje minst julehefte. Eg har i ei årrekkje drøymt om å laga julehefte. Og her er det. Eg og Kald Kaffi Sauen håper de vil lika å feira jul med oss. Frå oss til dykk med ønskje om ei god jul! Pappa og Kald Kaffi Sauen, Osøyro Libris; Os mållag og Solbakkestova God Jul, Kald Kaffi Sauen! ISBN 978-82-996709-5-1 Tekst og teikningar av Vidar Bratlund-Mæland Trykk: John Grieg AS, Bergen 2011 Epiphany Bøker www.bok.epiphany.no www.kaldkaffisauen.no

God Jul, Kald Kaffi Sauen! Pappaen min er gal etter jul. Før eg var fødd, var han vikar for julenissen. Mamma seier at han var nok meir ein assistent. Då smiler pappa lurt.

Pappa har hundrevis av juletradisjonar. Men av alle dei, er julekaffien den viktigaste. Han blandar kaffibønner for å få den rette julesmaken. Først mel han kaffien heilt fin. Så trykkokar han kaffien.

Men i år er han litt uroleg. Kvar gong han lagar seg ein kopp kaffi kjem Kald kaffi Sauen hoppande gjennom lufta. Og kvar gong vert kaffien kald.

I dag er det veslejulaftan, og pappa har starta å laga den spesielle julekaffien. Det luktar godt i huset. «Vil det gå bra i dag, pappa?» spør eg. Pappa ser på meg og smiler lurt. «I dag gir eg ikkje opp,» seier han.

I det pappa har sett på ein prøvekopp med kaffi, høyrer me ei bjølle. «Han kjem,» seier eg. Pappa er ikkje redd i dag.

Kald Kaffi Sauen fresar over kjøkkendisken så glitteret fyk, han sprett opp i lufta med eit høgt pling. Der oppe frysenys han kaffikoppen slik at det snør litt rundt koppen.

Pappa bit tennene saman og prøver å ta det med ro. Sauen ser skuffa ut. Pappa brukar alltid å bli skikkeleg sint. Me ser ikkje så mykje til sauen resten av dagen.

Seint på natta kjem pappa inn og vekkjer meg. «Du må vera stille,» seier han. Så kryp me inn stova.

«Kva er det me skal?» spør eg. Pappa ser lurt på meg. Plutselig brasar det ned pipa, og der står nissen. Oi! Eg måpar.

Pappa tar ein lasso og kastar over nissen. Nissen ser morskt på pappa. «Kva er det du finn på no?» spør han. Pappa smiler lurt. «Eg treng litt hjelp,» seier han.

Neste morgon vaknar eg tidleg og spring ned trappa. Var det ein draum? «God morgon,» seier pappa. Kva er det med pappa? Mamma berre ristar på hovudet. Han er oppe, vaken og har laga frukost. Han som aldri vaknar av seg sjølv.

«Kva er det med deg i dag?» spør eg når vi hentar pappa sin spesielle julekaffi. Han smiler berre lurt. Han tømmer kaffien i koppen. Så set han seg på huk bak bordet og ser spent bort mot stikkontakten. Flygande og dansande kjem Kald Kaffi Sauen. Og så høyrer me eit smell.

I ein haug av papir og pakkar ligg ein sau og lyser som eit lite juletre. Eit forskremt bæ rungar før han tar seg saman. Han ser veldig forundra ut.

«Eg snakka med ein venn av meg i natt,» seier pappa. «God jul til deg Kald Kaffi Sauen.» Sauen er nesten på gråten. Han hikstar så han slepp ein frostfis på pappa, så startar han å pakka opp gåvene med ein gong. Pappa børstar rim av julekaffien og tar han med inn i stova. Eg blir ståande å sjå litt til. Eg må smila. «Dette hadde du ikkje trudd,» seier eg til sauen. Han smiler tilbake.

Om kvelden etter pakkane sit to rare typar på trammen. Ein tjukk pappa i nissejakke med ein liten kopp kaffi og ein liten sau med ei stor flaske julebrus. Begge to veit at i morgon er alt vanleg igjen. Men i kveld, og berre i kveld, er det jul.

Juletresau Du treng : Piperensar Heil peanøtt Bomull Lim Tråd og nål Saks Tusj Del piperensaren og tvinn han saman på midten slik at du får armar og bein. Bind tråd i kroppen og stikk nål og tråd gjennom peanøtta. Teikn auge, nase og munn på peanøtta. Ta lim på kroppen. Legg eit lag bomull rundt kroppen så det stikk bein og armar ut. Heng sauen i juletreet og pass på kaffien. Kald Kaffi Sauen er her!

Julekakemannsau Oppskrift 100 g smør 3 1/2 dl sukker 1 ts hornsalt 2 1/2 dl mjølk ca. 12 dl kveitemjøl Smelt og avkjøl smøret. Bland alt det tørre. Rør inn det smelta smøret og mjølk. Etter bearbeiding, la deigen stå kjøleg i 1-2 timar. Elt deigen og kjevl ut. Trykk eller skjer ut figurar. Steik på 200º C i 7-10 min.

Følg prikkar og fargelegg sauen Pappa klarte det, gjorde du?

Pappa sin vinterkaffi Ta eit stort glas: Ca. 1 dl varm kaffi 1 knivsodd kanel 1 knivsodd kardemomme 1 knivsodd ingefær 1ts brunt sukker Fyll opp med varm mjølk. Pappa er endeleg blitt varm. Vetlegut sine tekjeks 1/2 l fløyte 250 g sukker 50 g smør 2 egg 2 ts bakepulver kveitemjøl Visp egg og litt av fløyten. Ha i sukkeret, det smelta smøret og resten av den stivpiska fløyten. Sikt i bakepulveret og mjølet. Ha i så mykje mjøl at deigen kan eltast til små kringler. Ha på plate. Steik på 180º C til dei er gylne og sprø.

Kald Kaffi Sauen sin julekalender 12. desember Nissedrakter må alltid prøvast ut. Og i år igjen må brannvesenet få pappa ut av pipa. Mamma har julekaker og kaffi til brannfolka. Det er i ferd med å bli ein tradisjon for alle saman. Meir på: www.kaldkaffisauen.no

Bøkene om Kald Kaffi Sauen Pappa møter kald kaffi sauen Min pappa er stor, godsleg og glad i kaffi! Veldig glad i kaffi. Pappa seier at kaffien ikkje vert kald av seg sjølv. Mamma seier han blir det. Kva om pappa har rett? Kva om det er nokon der ute som har det gøy med å gjera kaffien kald. Ein sau, kanskje? Kald Kaffi Sauen på stranda Pappa blir tvinga til å bli med ein tur på stranda. Han tar alle forholdsreglar for å verna sin dyrebare kaffi frå Kald Kaffi Sauen. Korleis skal dette gå på ei strand full av folk? Når Kald Kaffi Sauen søv, dansar pappa på kjøkkenet Om natta søv Kald Kaffi Sauen, seier pappa. Då snik han seg ned på kjøkkenet for å ta sin magiske tryllekaffi. Kan pappa klara å få laga kaffien sin og unngå å vekkja Kald Kaffi Sauen? www.kaldkaffisauen.no Epiphany Bøker 2011

Med ønskje om ei god jul frå oss Pappa og Kald Kaffi Sauen ISBN 978-82-996709-5-1 ISBN 978-82-996709-5-1 9 788299 670951 > Epiphany Bøker www.bok.epiphany.no www.kaldkaffisauen.no