saksframlegg Dato: Referanse: Vår saksbehandlar: 06.04.2018 45079/2018 Heidi Nerland Saksnr Utval Møtedato U 33/18 Fylkesutvalet 11.04.2018 Fylkesutvalet 23.04.2018 Fylkestinget 23.04.2018 E39 Lønset - Hjelset - lokalpolitisk vedtak om finansiering Bakgrunn Prosjektet E39 Lønset-Hjelset omfattar bygging av 9,5 km tofeltsveg med midtrekkverk og forbikjøringsfelt på strekninga Lønset Hjelset i Molde kommune. I Nasjonal transportplan 2018 2029 er det satt av midlar til å realisere prosjektet i første seksårsperiode. Prioriteringa er gjort under føresetnad om delvis bompengefinansiering. Denne prioriteringa vart stadfesta i Statens vegvesen sitt Handlingsprogram for 2018-2023. Anleggsstart for prosjektet er planlagt i 2019 med ferdigstilling sommaren 2022. Ferdigstilling er koordinert med tidspunkt for å ta det nye sjukehuset på Hjelset i bruk. Fylkestinget har i samband med uttale til Nasjonal Transportplan (NTP) 2018-2029 (sak T-40/16), stilt seg positive til ny E39 Lønset-Hjelset, samt at prosjektet kan vurderast for delvis finansiering med bompengar. Molde kommune gjorde den 23.6.16 prinsippvedtak om at prosjektet delvis kan finansierast ved bruk av bompengar. Før Stortinget kan ta stilling om prosjektet skal realiserast gjennom delvis bompengefinansiering, skal Møre og Romsdal fylkeskommune og Molde kommune uttale seg om finansieringsopplegget. Det blir presisert at det er viktig at kommune og fylkeskommune ikkje sett vilkår i sine vedtak som kommer i konflikt med sentrale føringar. Lokalpolitisk behandling av saka i Molde kommune og Møre og Romsdal fylkeskommune skjer parallelt. Statens vegvesen har utarbeida faglig grunnlag for prosjektet med forslag til lokalpolitisk vedtak. I oversendingsbrevet blir kommune og fylkeskommune bedt om å gjøre vedtak i tråd med forslaget. Dokument frå Staten vegvesen er lagt ved saka. Faglig grunnlag for E39 Lønset-Hjelset Prosjektet har ei kostnadsramme på 1380 mill. 2018-kroner, kor statleg løyving utgjør 610 mill. 2018-kroner og bompengeandelen 770 mill. 2018-kroner.
Bompengeordning Bompengefinansieringa av prosjektet er basert på etterskottsvis innkrevjing både på ny gamal E39 ved Hjelset i Molde. Innkrevjinga er automatisk og i begge køyreretningar. Plassering av bomstasjonar Retningslinjene for bompengeprosjekt føreset at det skal vere samanheng mellom nytte og betaling. Dette inneberer at dei som betalar bompengar, skal ha nytte av prosjektet, samanhengen går også andre vegen, slik at dei som har nytte av prosjektet skal betale bompengar. Det er trafikk til og frå Molde samt gjennomgangstrafikken som i hovudsak vil ha nytte av utbyggingsprosjektet. Dersom innkrevjing ikkje blir gjennomført på gamal E39 vil ein venteleg få stor trafikklekkasje dit. Dette vil gi stort inntektstap samtidig som gamlevegen ikkje vil få ønska trafikkreduksjon. Med bakgrunn i nytteprinsippet er det anbefalt at den trafikken som fortsatt nyttar dagens veg etter at ny E39 er bygd, dvs. i hovudsak dei som soknar til gamlevegen (busatte vest for bomstasjonen på gammel veg, grunnkrets 0601 Mjelvehagen og 0602 Hjelset) ikkje skal betale bompenger da dei ikkje vil ha nemneverdig nytte av ny veg. Statens vegvesen anbefaler derfor plassering av bomstasjon på gamlevegen ved Hjelset. Bomstasjon på ny E39 er også planlagt plassert på Hjelset. Figur - Plassering av bomstasjonar på ny og gammal E39 Takstgrunnlag Det er knytt usikkerheit til føresetnadene som er lagt til grunn, mellom anna endeleg kostnadsoverslag/styringsramme for prosjektet. For å redusere risikoen for at kommunen og fylkeskommunen må behandle saken på nytt dersom bomtakstane må aukast, anbefaler Statens vegvesen at det i vedtaket blir lagt til grunn takstar innanfor eit spenn. For at prosjektet skal kunne betalast ned i løpet av 15 år, er det behov for ein gjennomsnittleg inntekt per passering på om lag 27 kroner i 2018-prisnivå. Dette tilseier grunntakstar på om lag 30 kroner for takstgruppe 1 (kjøretøy med totalvekt
til og med 3500 kg og alle kjøretøy i kjøretøykategori M1) og om lag 60 kroner for takstgruppe 2 (kjøretøy over 3500 kg, eksklusiv kjøretøy i kjøretøykategori M1). Forslag til endelege takstar vil bli lagt fram for lokalpolitisk behandling i god tid før innkrevjinga startar. Det er lagt til grunn 20 pst. rabatt for kjøretøy i takstgruppe 1 med gyldig avtale og brikke. Det vil ikkje bli gitt rabatt til kjøretøy i takstgruppe 2. For kjøretøy i takstgruppe 1 med gyldig avtale og brikke blir det lagt opp til timesregel for passeringer gjennom bomstasjonene på ny og gammel veg. I tillegg er det foreslått eit månadstak på 60 passeringar. Betaling av bomavgift skjer enten ved bruk av elektronisk brikke eller etterskuddsvis fakturering basert på videofotografering av bilen sitt registreringsnummer. Takst- og rabattsystemet skal være i tråd med det til einkvar tid gjeldande regelverk. Bompengefinansieringa bygger elles på følgjande føresetnader: Lånerente 5,5 pst. første ti år, deretter 6,5 pst. Årleg prisstigning: 2,5 pst. Innkrevjingskostnader: 5 mill. kroner per år Statens vegvesen vurderer finansieringsopplegget som robust, med konservative anslag for trafikkmengder og andre føresetnader. Med desse føresetnadene er innkrevjingsperioden berekna til 15 år. Det er også rekna på et pessimistisk alternativ med følgjande føresetnader: 10 pst. kostnadsauke 10 pst. nedgang i trafikken ved oppstart på bompengeinnkrevjia og deretter nullvekst i trafikken Takstauke på 20 pst. ut over prisstigninga etter to år. Med desse føresetnadene er innkrevjingsperioden berekna til om lag 20 år, dvs. ei auke på 5 år. Eventuelle kostnadsendringar skal handterast i tråd med gjeldane reglar. Dette inneber at kostnadsauke ut over ordinær prisstigning opp til kostnadsramma skal dekkast med statlege midlar og bompengar etter same prosentvise fordeling som innafor styringsramma. Kostnadsauke ut over kostnadsramma er staten sitt ansvar og skal dekkast med statlege midlar. Endeleg styrings- og kostnadsramme vil først bli fastsett etter ekstern kvalitetssikring av prosjektet (KS2). Dersom økonomien i prosjektet blir svakare enn føresett, blir det lagt til grunn at bompengeselskapet etter avtale med Vegdirektoratet kan auke gjennomsnittstaksten med inntil 20 pst. og forlenge innkrevjingsperioden med inntil 5 år. Det regionale bomvegselskapet Vegamot AS skal stå for bompengeinnkrevjinga. Dette selskapet er eigd av Møre og Romsdal fylkeskommune og Trøndelag fylkeskommune. Fylkeskommunal garanti I bompengeprosjekt må i dag fylkeskommunar og/eller kommunar garantere for bompengeselskapet sitt låneopptak. Forslag til lokalpolitisk vedtak legg til grunn at
Møre og Romsdal fylkeskommune gir garanti (ved sjølvskyldnarkausjon) for bompengeselskapet sitt lån til E39 Lønset - Hjelset. Vedtak om fylkeskommunal garanti må ligge føre før saka blir lagt fram for Stortinget, då dette skal omtalast i bompengeproposisjonen. I finansieringsplanen er det lagt til grunn 770 mill. kroner i netto bompengar inn i prosjektet. I tillegg kjem kostnader knytt til innkrevjing og renter. Lånegarantien må ta høgde for ugunstig utvikling i føresetnadane for bompengefinansieringa. Dvs. at ei berekning av maksimal lånegjeld vil vere basert på pessimistiske føresetnader om trafikkutvikling, kostnadsutvikling mv. Maksimal lånegjeld er då berekna til om lag 1080 mill. 2018-kroner i opningsåret. I tillegg må garantien ta høgde for ytterlegare 10 prosent av den til ein kvar tid gjeldande hovudstol til dekning av eventuelle påløpte renter og omkostningar. Dette gir ei berekna garantiramme på 1190 mill. 2018-kroner. Lånegjelda vil vere på det nivået (inkl. ytterlegare 10 prosent til dekning av eventuelle påløpte renter og omkostningar) ved utgangen av 2022. Garantisten sine utlegg kan dekkast gjennom ein auke av realtakstane med inntil 20 prosent og ei forlenging av bompengeperioden med inntil 5 år. Garantien gjeld inntil bompengeselskapet sin gjeld er nedbetalt og blir redusert i takt med nedbetaling av lån. Det er føresett at garantien blir sikra 1. prioritet i retten til å krevje inn bompengar. Vurdering Gjennom NTP og seinare gjennom Handlingsprogram er det sett av midlar til E39 Lønset-Hjelset i perioden 2019-2023. Prioriteringa er gjort under føresetnad av delvis bompengefinansiering. Realisering av prosjektet er soleis avhengig av bompengefinansiering. Før Stortinget kan ta stilling om prosjektet skal realiserast gjennom delvis bompengefinansiering, skal Møre og Romsdal fylkeskommune og Molde kommune uttale seg om finansieringsopplegget. Takstnivå og plassering av bomstasjonar Bompengetakstane er lagt til eit nivå som tar sikte på nedbetaling av bompengelånet i løpet av 15 år, noko som svarer til ei gjennomsnittsinntekt på 27 kroner per passering. Med gjeldande føresetnader svarer dette til bompengetakstar på om lag 30 kroner for takstgruppe 1 og om lag 60 kroner for takstgruppe 2. Fylkesrådmannen meiner det er fornuftig å legge opp til bompengetakstar innanfor eit spenn i vedtaket. Dette vil redusere risikoen for at kommunen og fylkeskommunen må behandle saken på nytt dersom bomtakstane må aukast ved endeleg fastsetting av kostnadsoverslag/styringsramme for prosjektet. Når det gjeld plassering av bomstasjonar på eksisterande E39, er fylkesrådmannen einig i vurderinga til Statens vegvesen med plassering på Hjelset. Det er viktig å hindre stor bruk av dagens E39 trase, både på grunn av inntektsnivå og for å betre dei trafikale forholda langs strekninga. Samtidig vil plassering på Hjelset innebere at dei som fortsatt vil nytte dagens veg etter at ny E39 er bygd, dvs. i hovudsak dei som soknar til gamlevegen (busatte vest for bomstasjonen på gammel veg, grunnkrets 0601 Mjelvehagen og 0602 Hjelset) ikkje må betale bompenger for å komme til/frå Molde sentrum. Det vil vere i tråd med nytteprinsippet, då dei ikkje vil ha nemneverdig nytte av ny veg.
Fylkeskommunal garanti I finansieringsplanen er det lagt til grunn 770 mill. kroner i netto bompengar inn i prosjektet. Det er lagt til grunn at Møre og Romsdal fylkeskommune skal stille garanti ved sjølvskyldnarkausjon for bompengeselskapet si gjeld, med pant i bompengeselskapet sin rett til å krevje inn bompengar. Det samla garantibeløpet (som svarar til bompengeselskapet si maksimale gjeld berekna ut frå pessimistiske føresetnader) er avgrensa oppad til 1 080 mill. 2018-kroner med tillegg på 10 prosent av til ein kvar tid gjeldande hovudstol til dekking av eventuelle påløpte renter og omkostningar. Det samlede garantibeløpet blir slik 1 190 mill. 2018- kroner. Grunnen til at fylkeskommunen blir beden om å garantere for 1190 mill. kroner, er altså at garantien skal dekkje bompengedelen sjølv om prosjektet blir 10 % dyrare og trafikken blir 10 % lågare ved opning og ikkje veks i det heile etter det. (jf. berekning av pessimistisk alternativ som omtalt over). Det er òg sett av 10 % ut over maksimalt låneopptak i nemnde scenario til å dekkje renter på bompengelånet. Fylkeskommunal garanti for bompengelån på statlege prosjekt har vore drøfta i politiske organ ved fleire høve, mellom anna i samband med behandling av bypakke Ålesund i samferdselsutvalet den 14.3.18. Samferdselsutvalet vedtok her følgjande tillegg i tilrådinga: 24. Møre og Romsdal fylkeskommune meiner det er prinsipielt feil at ein fylkeskommune skal påta seg garantiansvar for statleg og kommunal infrastruktur, jfr. pkt 14 og 15 i vedtaket, og ber om at dette spørsmålet blir fremma som ei prinsippsak ovanfor Stortinget så snart som råd. Den 28.2.18 vart det fremma eit representantforslag i Stortinget som omhandlar garantiansvar på riksveg. Representantforslag 151 S (2017 2018): «Stortinget ber regjeringen sørge for at staten overtar garantiansvaret for eksisterande bompengeprosjekter på riksveg. Stortinget ber regjeringen i fremtidige bompengeprosjekter legge til grunn statlig garanti for bompengelån på riksvegprosjekter. Stortinget ber regjeringen sørge for at reduserte lånekostnader som følge av statlig garanti kommer bilistene til gode.omhandlar» Forslaget er satt opp til behandling i Transport- og kommunikasjonskommiteen, med frist for innstilling den 8.5.18. Foreløpig dato til Stortingsbehandling er satt til 15.5.18. Generelt sett er finansieringsopplegget som blir lagt til grunn i bompengesaker robust med store sikkerheitsmarginar, både på anslag for trafikkmengde og rente. Det er soleis liten risiko for at garantiansvaret vil bli utløyst. I tillegg er det mogleg å auke bompengetakstane med inntil 20 prosent og/eller forlenge nedbetalingstida med inntil 5 år dersom økonomien i prosjektet blir svakare enn føresett. Likevel vil konsekvensane vere store for fylkeskommunen dersom garantiansvaret blir utløyst
Fylkesrådmannen meiner det er prinsipielt feil at ein fylkeskommune skal påta seg garantiansvar for statleg infrastruktur. Det hadde vore ein fordel å avvente behandling av denne saken til etter Representantforslag 151 S (2017 2018) er behandla i Stortinget. Statens vegvesen opplyser til fylkeskommunen at det er kritisk for framdrifta i prosjektet at fylkeskommunen gjør nødvendige vedtak nå. Fylkesrådmannen tilrår derfor at forslag til lokal politisk vedtak blir godkjent. Møre og Romsdal fylkeskommune føreset at dersom reglane for garantiansvar blir endra i Stortinget vil dette også bli gjort gjeldande for prosjektet E39 Lønset Hjelset. Forslag til vedtak: 1. Møre og Romsdal fylkeskommune tilrår at prosjektet E39 Lønset-Hjelset blir delfinansiert med bompengar i tråd med «Faglig grunnlag E39 Lønset-Hjelset» frå Statens vegvesen datert 21.3.2018. 2. Møre og Romsdal fylkeskommune legg til grunn følgjande finansiering av prosjektet: Kostnadsoverslag (styringsramme): 1380 mill. 2018-kroner Statleg løyving 610 mill. 2018-kroner Bompengeandel 770 mill. 2018-kroner 3. Innkrevjinga skjer i begge retningar i automatiske bomstasjonar på ny og eksisterande E39. Innkrevjingspunktet på ny E39 blir på Hjelset. Innkrevjingspunktet på eksisterande E39 blir også på Hjelset. 4. Møre og Romsdal fylkeskommune aksepterer ein gjennomsnittleg bompengetakst på inntil 27 kroner (2018-prisnivå). Med gjeldande føresetnader svarer dette til bompengetakstar på om lag 30 kroner for takstgruppe 1 og om lag 60 kroner for takstgruppe 2. Dersom det i løpet av bompengeperioden blir opna for at nullutsleppskøyretøy skal betale bompenger, blir taksten inntil 50 prosent av ordinær takst innafor kvar takstgruppe. 5. I tråd med nye takstretningslinjer for bompengeprosjekt blir det lagt til grunn at trafikantar i takstgruppe 1 som betalar med elektronisk brikke oppnår 20 prosent rabatt, og at trafikantane i takstgruppe 2 betaler det dobbelte av taksten for takstgruppe 1. Det gis ingen rabatt for køyretøy i takstgruppe 2. 6. Det er føresett timesregel og eit passeringstak på 60 passeringar per månad for køyretøy i takstgruppe 1 føresatt gyldig brikke og avtale. 7. Møre og Romsdal fylkeskommune legg til grunn ein innkrevjingsperiode på 15 år. 8. Kostnadauke utover prisstigninga opp til kostnadsramma skal dekkast med statlege midlar og bompengar etter same prosentvise fordeling som innafor styringsramma. Eventuelle overskridingar ut over kostnadsramma er staten sitt ansvar og blir dekt med statlege midlar. 9. Dersom inntektene blir høgare og/eller finansieringskostnadene lågare enn førsett, skal bompengetaksten reduserast eller bompengeperioden kortast ned. Endeleg takst- og rabattsystem skal leggast fram for lokalpolitisk behandling i god tid før innkrevjinga startar.
10. Dersom bompengeselskapet sin økonomiske situasjon gjer det nødvendig, kan gjennomsnittstaksten aukast med inntil 20 prosent ut over prisstigninga og innkrevjingsperioden forlengast med inntil 5 år. 11. For Møre og Romsdal fylkeskommune: Under føresetnad av Kommunal- og moderniseringsdepartementet sin godkjenning, garanterer Møre og Romsdal fylkeskommune med sjølvskyldnarkausjon for gjelda til bompengeselskapet, med pant i bompengeselskapet sin rett til å krevje inn bompengar. Det samla garantibeløpet (som tilsvarar bompengeselskapet sin maksimale gjeld berekna ut frå pessimistiske føresetnader) er avgrensa oppad til 1 080 mill. 2018-- kroner med tillegg på 10 prosent av til ein kvar tid gjeldande hovudstol til dekking av eventuelle påløpte renter og omkostningar. Det samla garantibeløpet blir slik 1 190 mill. 2018-kroner. Garantien gjeld frå første opptrekk på finansieringa i samband med rekvisisjonar frå Statens vegvesen i byggeperioden, og gjennom innkrevjingsperioden på 15 år. Innkrevjingsperioden kan i særlege tilfelle forlengast med inntil fem år. I tillegg skal garantien gjelde inntil to år, jf. garantiforskrifta 3. Samla garantitid blir, inkludert byggeperioden, på inntil 26 år frå første opptrekk på finansieringa i samband med rekvisisjonar frå Statens vegvesen. Garantisten sine utlegg kan dekkast gjennom ein auke av realtakstane med inntil 20 prosent og ei forlenging av bompengeperioden med inntil 5 år. Garantien gjeld inntil bompengeselskapet sin gjeld er nedbetalt og blir redusert i takt med nedbetaling av lån. Det er føresett at garantien blir sikra 1. prioritet i retten til å krevje inn bompengar. 12. Møre og Romsdal fylkeskommune meiner det er prinsipielt feil at ein fylkeskommune skal påta seg garantiansvar for statleg infrastruktur. Blir reglane for garantiansvar endra i Stortinget føreset Møre og Romsdal fylkeskommune at dette også blir gjort gjeldande for prosjektet E39 Lønset Hjelset. Ottar Brage Guttelvik fylkesrådmann Arild Fuglseth samferdselssjef Vedlegg 1 Faglig grunnlag E39 Lønset - Hjelset