Fantastiske dagar i Peru

Fantastiske dagar i Peru 21. juni - 7. juli 2010 Cuzco, det mektige Inkariket sin hovudstad ~ «den gløymde inkabyen» Machu Picchu ~ flytande sivøyer på Titicacasjøen ~ fargerik indianarkultur i Andesfjella ~ den kvite byen Arequipa ved foten av vulkanen «Misti» ~ eksotisk dyre- og planteliv i regnskogen i Amazonas! Peru er utan tvil det mest spennande reisemålet i Sør-Amerika. I hjartet av Andesfjella vaks det mektige Inkariket fram. Vi besøkjer Inkariket sin hovudstad Cuzco, og byen Machu Picchu som var ein av Inkafolket sine siste skansar og som låg gøymt i jungelen i fleire hundre år. På Titicacasjøen bur Urosindianarane på flytande sivøyer og indianarsamfunnet på øya Taquile har framleis ein kollektiv økonomi som strekker seg tilbake til Inkatida. I Andesfjella lever indianarane framleis sitt tradisjonelle og fargerike liv slik dei har gjort i hundrevis av år. Arequipa vert rekna som den vakraste kolonibyen i Sør-Amerika. Husa er bygd av kvit lavastein frå den mektige og vakre vulkanen «Misti» som med sine 5 800 m tronar høgreist og kvitkledd over byen! Langs kysten av Peru levde høgtståande kulturar lenge før Inkariket vart til. Dei har etterlate seg ufattelige skattar i gull, sølv og keramikk. Velkommen med på ei eventyrreise! Dagsprogram: Dag 1 - Måndag 21. juni: Avreise med KLM (KL 1140) frå Gardermoen kl 0640. Turen går via Amsterdam med framkomst til den peruanske hovudstaden Lima kl 1625 lokal tid (minus 7 t). Buss til Hotel José Antonio. På grunn av tidsforskjellen og lang flyreise kan det vere godt å gå tidleg til sengs, men dei som vil tar ein spasertur saman med reiseleiar i bydelen Miraflores der hotellet vårt ligg. Og det vert også høve til ein matbit på ein lokal restaurant. (Mat på flya) Dag 2 - Tysdag 22. juni: Etter frukost vert det sightseeing i det gamle Lima sentrum der landet sin fremste katedral og presidentpalasset ligg. Vi freistar danna oss eit inntrykk av denne byen som conquistadoren Francisco Pizarro grunnla i 1532 og som var sete for den spanske visekongen fram til frigjeringa i 1821. I dag er Lima ein metropol og pulserande verdsby med over 8 millionar innbyggjarar. Vi skal innom katedralen og det gamle San Francisco-klosteret, eit vakkert kompleks frå kolonitida. Og vi køyrer gjennom bydelane Miraflores og San Isidro der rikfolket bur og arbeider. Det vert lunsj undervegs, før vi ender opp på flyplassen for å fly til Arequipa, den nest største byen i Peru. Flyturen tek en dryg time, og vel framme sjekkar vi inn på Hotel Casa Andina Classic. Arequipa ligg på 2400 meter er grunnlagd ved foten av den mektige vulkanen Misti som ragar 5800 meter til værs. Arequipa sentrum er bygt i typisk spansk kolonistil rundt eit bysentrum med Plaza de Armas, hovudkatedral og rådhus. Arequipa vert rekna for å vere ein av dei vakraste byane i Sør-Amerika. Sentrum er kjenneteikna med sine karakteristiske kvite hus, bygt av kvit lavastein, kalla «siljar», og difor går Arequipa under kallenamnet «den kvite by». Kvelden er sett av til fritid, og reiseleiar inviterer dei som vil med på ein av byen sine betre restaurantar. (Frukost og lunsj Dag 3 - Onsdag 23. juni: Etter frukost startar vi dagens program med omvisning i det kjende Santa Catalina-klosteret. Så vert det besøk til kyrker, gamal arkitektur og vakre utsiktspunkt i Arequipa sentrum. Byen er omgitt av snøkvite fjell og ein frodig elvedal snor seg gjennom terrenget og kløyver byen i to delar. For nokre få år sidan (1991) fann arkeologar ei 15 år gamal inkajente som vart ofra til gudane på ein fjelltopp, sannsynlegvis for å skaffe regn. Ho har ligge nedfrosen i is i fleire hundre år, men eit vulkanutbrot ca 30 mil frå Arequipa, henta henne fram i dagen. Dette vakte internasjonal oppsikt, og jenta sin mumie er i dag utstilt i eige museum som vi skal vitja. Det kan virke noko grotesk, men museet gir god innsikt i dei religiøse tilhøva i Inkatida. Arequipa er kjend for sine typiske matrettar og har fleire gode restaurantar. Lunsjen i dag vert på ein av desse. Ettermiddagen er avsett til fritid og om kvelden inviterer reiseleiar igjen til middag på ein av byen sine betre restaurantar. (Frukost og lunsj

Dag 4 - Torsdag 24. juni: I dag set vi kursen mot Puno by som ligg ved breidda av Titicacasjøen. Vegen frå Arequipa buktar seg innover i eit fantastisk fjellterreng. Det er eit vakkert og imponerande skode! I denne fjellheimen lever dei ville slektningane til lama og alpakka, kalla vicuña (utt: vikonja). Dei er totalfreda og ofte kan ein treffe på dei langs vegen. I Inka-tida var det berre Inkaen sjølv som kunne kle seg i vicuña-ull. I dag eksporterast det noko ull frå statlege prosjekt der dyra vert fanga inn til klipping. Kiloprisen er svært høg! Etter ca fem timer er vi framme i Puno. Inkariket breidde seg sørover frå Cuzco på 1400-talet og underla seg ei mengde mindre kulturar. Puno-regionen vart forholdsvis seint innlemma i Inkariket. Difor kallast folket her sør for Aymara-indianare og snakkar aymara i motsetning til lenger nord der ein snakkar qechua og kallast Quechua-indianare. I dag er Aymara-folket delt mellom Peru og Bolivia, og dei aller fleste bur i Bolivia. A ym ar a-land vart delt av den politiske grensa som den kvite overklassen trekte då Bolivia fekk sitt sjølvstende frå spanske-kongen i 1825. Vi er framme i Puno omlag midt på dagen, men sidan byen ligg på 3800 meters høgde, og for å venne oss til opphaldet i høglandet, har vi sett av resten av dagen til kvile. Det er naudsynt å ta det heilt med ro og berre ete lette måltid denne fyrste dagen oppe i Andesfjella. Vi vert innlosjerte Hotel La Hacienda og reiseleiar organiserer lunsj og middag i hotellet sin restaurant i 6. etasje med flott utsikt over Titicacasjøen. (Frukost Dag 5 - Fredag 25. juni: Etter frukost går vi om bord i båten som i dag skal frakte oss ut til dei flytande sivøyene på Titicacasjøen der Uros-indianarane lever sitt tradisjonelle liv. Dei bygger øyane sine opp av totora-siv og held seg med både husdyr og poteter frå eigen produksjon. Mellom Puno og halvøya Capachica ligg det eit breitt sivbelte der det er fleire større og mindre sivøyer kor det i dag bur ca 900 menneske. Sagnet fortel at Uros-indianarane levde av jakt og fiske kring sjøen då Aymara-indianarne inntok området sørfrå. Jordbruksfolket frå sør fordreiv Uros-indianarane som flykta ut på sjølve sjøen og etablerte det heilt spesielle samfunnet på flytande sivøyer. Her har dei levd i generasjonar av jakt på sjøfugl, fiske og potetdyrking i kunstige åkrar laga av rotna siv. I dag er dei etnisk samanvevde med Aymara-folket, og det vert fortald at den siste som snakka det gamle Uros-språket, ei kvinne, døydde på 1980-talet. Herifrå set vi kursen mot øya Taquile som ligg utanfor Puno-bukta. Taquile har ein fantastisk natur, og ligg svært vakkert til. Etterkvart stig den store øya fram i synsranda. Her lever Inkaindianarane sitt isolerte liv upåverka av det meste som har skjedd i landet sidan spanjolane raserte Inkakulturen for 500 år sidan. Samfunnet på Taquile er unikt. Vi kjem til ei øy i dobbelt forstand, ei øy i Titicacasjøen og ei øy i folkehavet upåverka av støy og stress og børsnoteringar! Dei lever kollektivt og alle har kva dei trenger! Dei har så absolutt noko å lære bort til vestlege marknadsøkonomar! Og deira gjestmildskap er imponerande. Dei gir oss innblikk i sine daglege syslar. Blant anna strikkar mannfolka på Taquile dei flottaste luer og vantar i avanserte mønstre, og kvinnene vever band og belte i dei vakraste fargespill. Klesdrakta til folk på Taquile fortel om alder, sosial status og sivilstand. Til dømes har ugifte menn kvit dusk på lua mens dei gifte har raud dusk! Eit besøk på «samvirkelaget» på øya er ei oppleving og ein utmerka stad for innkjøp av eksotiske presangar! Eit lite tips: Dei breiaste av dei vevde banda passar fint som løparar på norske salongbord, i sær til jul Om ettermiddagen er vi tilbake i Puno. (Frukost og lunsj Dag 6 - Laurdag 26. juni: Frå Puno set vi i dag kursen mot sør for å køyre til Urubambadalen, lenger nord i Andesfjella. Første stopp blir etter ca ein halv time for å vitje Sillustani, eit arkeologisk område der svære steinsiloar er reist over gravene til viktige personar frå Colla-kulturen som regjerte i området før inkaepoken. Inkariket breidde seg sørover frå Cuzco på 1400-tallet og underla seg både Colla ane og ei mengd mindre kulturar. Langs vegen bur nokre familiar på små gardsbruk der dei inviterer oss til å sjå dagleglivet til indianarane. Her får vi sjå korleis dei bur, dyrkar jorda og lagar maten sin. Og vi får sjå husdyra deira, lama og alpakka som er så typiske for høglandet i Peru. Vidare går turen gjennom eit vakkert fjellandskap der små indianarsamfunn ligg spreidde utover dei svære viddene. Landskapet er prega av vakre dalar, enorme vidder, små og store alpakkaflokkar og eventyrlege fjelltoppar og himmelen han er aldri så blå og fjella aldri så vakre som i Andes! Undervegs vert det lunsj på ei vegkro i nærleiken av byen Sicuani. I kveldinga er vi framme i Urubambadalen og tek inn på Hotel San Agustin Recoleta. (Frukost og lunsj Dag 7 - Sundag 27. juni: I dag skal vi utforske Urubambadalen der elva Vilcanota renn på si ferd mot Atlanterhavet, tusenvis av kilometer mot aust. Først reiser vi til Pisaq, ein fascinerande indianarlandsby øvst i dalføret. På grunn høge fjell og bakande sol mellom bratte dalsider, var matproduksjonen i Urubambadalen særs viktig for heile Inkariket. Endå i dag eksporterast det mais herifrå bl.a. til USA og Japan. Urubamba-maisen reknast for verdas beste! På torget i Pisaq handlar vi lokalt kunsthandverk og nyt den indianske atmosfæren i landsbyen. I fjellsida over Pisaq besøkjer vi mektige inkaruinar og vandrar på ekte inkavegar. Etter lunsj på innbydande restaurant i dalen, vitjar vi Ollantaytambo, eit enormt militærkompleks frå Inkatida. Det er

bygd av kjempesvære steinblokker på opptil 30 tonn og er ein av dei få plassane der spanjolane tapte et militært slag mot Inkariket. Vidare skal vi innom ei saltgruve, Salinas de Maras, der ein utvinn salt i naturlege førekomstar i terrassar i ei dalside. Sein ettermiddag vert det retur til hotellet. (Frukost og lunsj Dag 8 - Måndag 28. juni: Så er dagen komen for ei vakker togreise til det legendariske Machu Picchu, den gløymde inkabyen langt inne i Andesfjella. Toget går frå Ollanta stasjon og følgjer breidda av Vilcanota-elva nordaustover mot Amazonas-jungelen. Som eit eventyrslott troner Machu Picchu på et høgdedrag mellom djupe dalar og høge fjell der regnskogen møter fjellkjeda! Dei spanske conquistadorene fann aldri Machu Picchu. Difor ligg byen som eit urørt monument frå inkatida. Vi får ei kjensle av å være sett fleire hundre år tilbake i tida. Machu Picchu er ei natur- og kulturoppleving i særklasse. Etter ei guida omvisning vert det lagt til rette for lunsj oppe ved sjølve ruinane eller nede i landsbyen. Dei som vil kan framleis nyte inntrykk i og rundt Machu Picchu, eller ein kan slappe av på Hotel Hatuchay Tower i den vesle landsbyen Agüas Calientes (Varme kilder) som ligg samanklemt mellom bratte, bromelia-kledde fjellveggar ved elva djupt nedanfor Machu Picchu. Om kvelden står middagsborda dekka på hotellet. (Frukost og middag Dag 9 - Tysdag 29. juni: I dag er dagen sett av til eit nytt besøk i den gamle Inkabyen Machu Picchu. Mens vi i går hadde ei guida omvising, vert det i dag ein frivillig tur (inngangsbillett ikkje inkludert, kjøpast lokalt) utan guide, der den enkelte kan få tid til ettertenksamt å nyte dei mektige inntrykka ein får på staden, eller gå ein tur på Inkastiane som går ut frå Machu Picchu. Dei som vil kan også stige opp på fjelltoppen Wayna Picchu som er den vesle toppen som ein ser til høgre i bakgrunnen på dei berømte bileta frå Machu Picchu. Frå toppen av denne er det eit imponerande skode over ruinbyen med sine sagnomsuste omegner. Eller ein kan vandre til Inti Punko, Solporten, der den gamle inkavegen frå Cuzco kjem inn over skaret ovanfor Machu Picchu. Om ettermiddagen tek vi toget tilbake til Urubambadalen og buss vidare over eit fjellplatå til Inkarikets hovudstad Cuzco der vi i kveldinga er framme og tek inn på Hotel José Antonio. (Frukost Dag 10 - Onsdag 30. juni: Cuzco var politisk og religiøst senter for Inkariket som på sitt største strakk seg frå Colombia i nord til Argentina og Chile i sør. Cuzco har ei rekke bygningar og minnesmerke frå denne tida. Programmet i dag gir oss eit godt innblikk i Inkafolket sin svært imponerande byggekunst. Steinarbeida er heilt utrulege! Enno er det ingen som kan gi eit fullgodt svar på korleis enorme steinblokker vart tilpassa kvarandre med millimetermål i innfløkte vinklar! Då spanjolane kom til Cuzco møtte det dei eit mektig syn av flotte bygg og vakre parkanlegg, alt rikeleg utstyrt med veggpynt og statuar i reint gull! Etter vitjing av fortidsminne i Cuzco sentrum, tek vi turen til Sachsahuaman, eit imponerande seremonisenter utført i kjempemessige steinblokker på høgda over Cuzco by Q encco og Tambo Machay, også dei viktige minnesmerke frå Inkatida. Herfrå går turen til restaurant Don Antonio for felles lunsj. Ettermiddagen er sett av til fritid der ein kan vandre rundt i Cuzco og bli betre kjent med byen som har så mykje historie om indiansk høgkultur og audmjukande erobring av spanske soldatar. (Frukost og lunsj Dag 11 - Torsdag 1. juli: Fridag i Cuzco. Dagen er satt av til eigen disposisjon, og forslag til aktivitetar gis av reiseleiar. Cuzco er et eldorado for shopping med masse moglegheiter til å handle overalt i den vakre byen som er oversiktlig og lett å finne fram i. For dei som har lyst kan vi anbefale Museo Inca som er det beste museet i byen. Om kvelden tilbyr reiseleiar felles middag i den vakre restauranten Cafe Bistro. (Frukost Dag 12 Fredag 2. juli: I dag står Amazonas-jungelen for tur. Vi går om bord i flyet som tek oss til byen Puerto Maldonado i den sørlegaste delen av den enorme regnskogen. Byen ligg ved floden «Madre de Dios» som via Madeirafloden renn ut i sjølve Amazonasfloden djupt inne i Brasil. Herfrå bær det ut på jungelsafari. Ein elvebåt tar oss med til ein såkalla «lodge» kor vi skal oppleve regnskogen frå innsida. Opplegget er eksotisk og fascinerande, men sjølvsagt helt ufarleg. Vi får innblikk i kultur og folkeliv i Amazonas og vandrar rundt i jungelen sin eigen botaniske hage. Innlosjering på Eco Amazonía Lodge. (Frukost, lunsj og middag Dag 13 Laurdag 3. juli: Heile dagen i regnskogen. Blant tilboda er utflukt til innsjøen Lago Apuvictor, besøk på apekattøya, alligatorsafari, omvising i jungelen sitt eige apotek kor moderne legevitskap har fått hjelp av urbefolkninga sine eldgamle kunnskapar, heile tida saman med lokalkjende guidar. NB: Opplegget i regnskogen er sjølvsagt heilt trygt. Vi har ingen aktivitetar som inneber risiko for liv og helse! Og - regnskogen kan ikkje forklarast, han må berre opplevast frå innsida!! (Frukost, lunsj og middag

Dag 14 Sundag 4. juli: Heile dagen er sett av til hygge og opplevingar i regnskogen. Aktivitetane vert fordelte på dagane og nærare beskjed vert gitt frå dag til dag. Det vert eit balansert program mellom kvile i det behagelege klimaet og aktivitetar knytte til elva, regnskogen og den eksotiske vegetasjonen. Vakker fuglesong, lyden frå tusenvis av sikadar og flagrande kjempesommarfuglar er med å krydre tilværet i Amazonas. Lodge n har badebasseng og vi bur i trivelege hytter i lokal stil med gode senger, dusj og wc og med hengekøyer på terrassen! (Frukost, lunsj og middag Dag 15 Måndag 5. juli: Etter frukost tek elvebåten oss tilbake Puerto Maldonado. Flyet løfter oss opp over Amazonas-jungelen sitt grøne teppe og innover dei majestetiske Andesfjella med mellomlanding i Cuzco, før ferda fortset til hovudstaden Lima. Frå flyplassen vert vi frakta til Hotel José Antonio i bydelen Miraflores der vi er kjende frå før. Ettermiddagen er sett av til fritid og om kvelden drar vi heilt ned i strandkanten og et avskilsmiddag på den vakre restauranten Rosa Nautica som er bygd på ein pir som stikk ut i Stillehavet, og der bølgjeskvulpa akkompagnerer vårt gode måltid. (Frukost og middag Dag 16 - Tysdag 6. juli: Så har vi komt til siste dagen i Peru. Vi har ikkje sett opp noko program for dagen. Dei som vil går på eiga hand, og reiseleiar vil kome med tilbod om felles program dagen før. Blant anna vil det verte høve til å vitje det kjende Gullmuseet der ein kan sjå ufattelige skattar i gull, sølv og keramikk frå dei såkalla pre-inka kulturane. Om ettermiddagen går ferda til flyplassen som ligg i hamnebyen Callao, der Thor Heyerdahl i 1947 segla ut med Kon-Tiki-flåta på si 101 dagar og 8000 km lange ferd til Polynesia. Kl 1935 letter flyet frå Lima for retur til Noreg via Amsterdam. (Frukost og mat på flyet Dag 17 - Onsdag 7. juli: Framkomst til Amsterdam kl 1500 og vidare til Noreg med framkomst til Gardermoen kl 1840. Pris: NOK 25.700,- + flyskattar Prisen inkluderar: Flyreise med KLM Oslo-Lima t/r. Innanriksfly i Peru iflg. programmet. 15 hotellovernattingar i dobbeltrom i god turistklasse. Frukost kvar dag + 14 lunsj eller middag. (Når vi ikkje har lagt inn alle måltid, er det fordi det løner seg å kjøpe resten av måltida lokalt i Peru. Alle måltida vert tilrettelagt for dei som ynskjer å ete saman med reiseleiar) Inngangsbillettar og transport iflg. programmet. Norsk reiseleiar på hele turen + lokale guider (eng.). Enkeltromstillegg: NOK 4.690,- Prisen inkluderer ikkje: Tips til guidar og sjåførar undervegs (NOK 300,- pr. pers.) Flyskatt KLM (pr i dag) kr 2 640,- og lokale flyplassavgifter på ca NOK 330,- (Flyskattane kan endrast.) Drikke til inkluderte måltider NB: KLM flyr også frå Sandefjord, Kristiansand, Stavanger, Bergen og Trondheim. Husk å føre opp «tilslutning» på påmeldingsskjema dersom du ønskjer utreise frå ein av desse byane. Prisen varierer noko! Reiselitteratur: Det fins dessverre lite og ingenting av reisehandbøker om Peru og Bolivia på norsk. Derimot fins det ei på dansk: Turen går til «Peru & Bolivia», ca NOK 170,-. I bokhandelen har dei dessutan fleire ulike reisehandbøker på engelsk. Hotell: Vi nyttar turisthotell med god standard: Lima: Hotel Jose Antonio Tel +51 1 4457743 / 4456870 www.hotelesjoseantonio.com

Urubamba: Hotel San Agustin Recoleta Tel +51 84 201004 www.hotelessanagustin.com.pe Machu Picchu: Hotel Hatuchay Tower Telefon +51 84 21 12 01 www.hatuchaytower.com Cusco: Hotel José Antonio Tel +51 84 23 90 30 www.hotelesjoseantonio.com Puno: Hotel La Hacienda Tel +51 51 35 61 09 www.lahaciendapuno.com Arequipa: Hotel Casa Andina Classic Tel +51 54 20 20 70 www.casa-andina.com (Atterhald om eventuelt bytte til tilsvarande hotell. Oppdaterte opplysningar vert gitt før avreise.) Visum: Visum til Peru og Bolivia er ikkje nødvendig for skandinaviske turistar. NB: Husk gyldig pass som bør vere gyldig minst 6 mnd. etter heimkomst! Vi tilrår å ta fotokopi av passet og oppbevare denne avskilt frå passet. (For andre nasjonalitetar, sjekk på http://travel.peru.com/travel/english/trip_planner/visas.asp) Vaksinar: Vaksinar er ikkje lovpålagt, men vi tilråder Gulfeber og beskyttelse mot hepatitt. Sørg også for å vere oppdatert på difteri/stivkrampe og polio. WHO anbefaler malariatablettar for opphaldet i Amazonas, men lokalt hevdar dei at ingen vert smitta av malaria der vi skal opphalde oss. Romma er utstyrt med myggnetting. Ta kontakt med ditt lokale helsekontor i god tid før turen! Reiseapotek: Ta med eit lite reiseapotek i tillegg til evt. faste medisinar. Vi tilrår tablettar mot reisesjuke og hovudpine, yoghurttablettar (regulerer fordøyelsen), kulltablettar og immodium (mot diaré), solkrem og leppepomade med høg faktor. Handhygiene er viktig. Vi anbefaler desinfeksjonskrem/-spray som fåast på apotek. Valuta: Ta med ein del US-dollar eller Euro i kontantar. Dei fleste bankkort er gangbare og det er god tilgang på minibankar. Den peruanske mynteining heter «nuevos soles» og kan vekslast på hotell og vekslehus. (1 usd = ca. 2,9 / 1 euro = ca 3,8). Vær forsiktig med å veksle på gata. Dette er legalt og skjer «overalt», men det er relativt stor fare for å få falske seidlar! Ved framkomst til Lima anbefaler vi å veksle i banken ved bagasjebandet. All handel i Peru skjer i lokal valuta! Shopping: Peru har et rikt utval av indiansk kunsthandverk. Du får kjøpt handstrikka genserar og vevde tepper i lama- og alpakkaull, gull- og sylvarbeid, keramikk, handdekorert lær og elles typiske souvenirartiklar til mykje hyggelege prisar! Høgda: I Cuzco (3 500 m) og Puno (3 820 m) vil du merke den tynne lufta. Hos nokon kan det gje forbigåande hovudpine, kvalme og ein følelse av ikkje å få nok oksygen. «Høgdesjuka» kan motverkast med tablettar (Sorroche pills) som fåast kjøpt i Peru eller med druesukker (frå norsk apotek). Ved behov tilbyd vi dessutan oksygen frå flaske. Høgdesjuke kan både førebyggjast og behandlast med legemiddelet Diamox. Mange har veldig god nytte av dette, men du må i så fall få det av legen (på resept) før du reiser. Men «den beste høgdemedisin» å ta det med ro, drikke mykje væske, gå sakte og unngå stress! Dersom

du har hjarteproblem eller høgt blodtrykk bør du kontakte lege før du bestemmer deg for turen. Erfaringsmessig er det ikkje noko problem med høgt blodtrykk i høgda. Klima og klede: Klimaet i Peru og Bolivia vekslar med høgda og avstanden til havet. Juni/juli er «vinter» i Peru. Det betyr vanlegvis fint ver og god temperatur, men det kan likevel gå ei og anna regnbye. Ta med lett bomullstøy, genser, anorakk og varme beinklede til bruk i høgda. Dei fleste vert overraska over temperaturen om kvelden og natta i Andesfjella. Folk er vane med å ha det kaldt inne, og hotellromma kan opplevast kalde. Derfor anbefaler vi godt og varmt undertøy og nattøy. Vanlig fritidstøy til middag på hotella er greitt. Husk gode tursko (gjerne joggesko). Ei lett regnjakke eller paraply kan være fornuftig å ha på lur, sjølv om vi forventar fint ver. Regntida er frå januar til mars. Mat: På inkluderte måltider kan du trygt ete det du får servert bortsett frå råkostsalat og majones/remulade! Unngå å kjøpe mat på «gata»! Elles gjeld dei vanlege forsiktigheitsregler: ~ drikk berre vann frå flaske ~ all frukt må vaskast og skrellast ~ prøv å unngå mat som ikkje er kokt eller stekt Det er inkludert fleire måltid undervegs. Resten av måltida vert tilrettelagt for dei som ynskjer felles måltid. Straum: Peru brukar 220 V / 50 Hz. Dei fleste norske apparat med originale stikkontaktar kan brukast. Tipsing: Det er vanlig at kvar deltakar gir 2-3 dollar i tips dagleg til lokale guidar og sjåførar. Det vert totalt 300,- kr pr. deltakar for heile turen. Vi plar samle inn dette ein av de fyrste dagane, slik at reiseleiaren fordeler tips undervegs. Bagasje: Fri bagasje på flyet er inntil 20 kg. Husk bagasjeplass til ting du kjøper med deg frå reisa. Til Machu Picchu og Amazonas treng du ein mindre ryggsekk eller bag, då vi ikkje får med oss store kofferter på desse utfluktene (dei lagrast sjølvsagt trygt imens)! (Mobil)telefon: Mobiltelefonnettet i Peru og Bolivia fungerer berre med norske apparat med såkalla triband (900/1800/1900). Undersøk med din teleleverandør (på internettsida deira) om dei tilbyd dekning i Peru og Bolivia, og kva pris dei tek! Det er elles god tilgang på telekort og telefonautomatar i undervegs. Litteraturliste Mange har lyst til å lese seg litt opp på reisemålet før avreise. Her fylgjar nokre boktitlar som kan vere aktuelle: Steinar Anda/Jørgen Blitzner: Peru, skatter skjult i jungel, gjemt i sand. Eide Forlag, 2004. Pris ca kr 300,- Ronald Wright: Cut stones and crossroads. A joruney in the two worlds of Peru. Viking Press, 2001 Victor von Hagen: Highway of the sun, Brown and Company, 1955 David P. Werlich: Peru a short history, Southern Illinois University Press, 1978 John Hemming: The Conquest of the Incas, Harcourt, Brace, Jovanovich, Inc., New York, 1973/2003 Nigel Davies: The Ancient King-doms of Peru, Penguin, 1998 Thor Heyerdahl: Skjebnemøte vest for havet, Gyldendal 1992 Sikkerheit: ~ Etter mykje uro og interne stridigheitar på 1980-tallet er Peru nå inne i ein periode med fredeleg utvikling. Gerilja-organisasjonen «Lysande Sti» fekk aldri med seg grasrota og måtte gi opp sin kamp då deira leiar og grunnleggjar vart arrestert i 1992. Han sit framleis fengsla i hovudstaden Lima.

~ Som i mange andre land i den 3. verda er det også i Peru ein del lommetjuvar som ser seg om etter uforsiktige turistar. Det er lurt å unngå store folkemengder, og vi tilrår våre deltakarar ikkje å bere kontantar, pass og verdipapir i ytterlommene, men i ei eigna lomme/veske innanfor kleda. ~ Flysikkerheita i Peru er stort sett som i andre land i den tredje verden. Vi bruker fortrinnsvis flyselskapet LAN Perú som er eit godt innarbeida selskap i Peru. Dei er underlagt vanlege internasjonale prosedyrar for flysikkerheit og teknisk vedlikehald, og har ikkje hatt ulukker med sine fly. Velkommen til ein tur du aldri vil gløyme! Peru er eit vakkert og eksotiske reisemål med kultur og opplevingar i særklasse! Dei fargerike indianarane er blitt omtala som «eit folk med hjarte utanpå!» Bli med oss og treff dei heime i sitt eige miljø!