Informasjon og kvalitetsplan BORE SFO 2018-2019
Innleiing Då me er midt i eit skifte av leiar i SFO, er mykje av denne planen den same som i fjor. Me har justert litt på nokre rutinar og nokre forventningar til dei føresette. Men elles vil planen vera stort sett den same som før. Me ser føre oss at SFO må gå gjennom siste del av planen for å justera denne i forhold til kva satsingar skulen vil ha framover. Om dette blir justert i løpet av året, eller om det kjem ny plan til neste år det vil tida vise. Me ser fram til samarbeidet mellom SFO og skule saman med ny leiar i SFO Edel Njærheim. Bore skule juni 2018 Rektor
1. Velkommen til SFO INFORMASJON 18/19 Skulefritidsordninga er eit frivillig omsorgs- og fritidstilbod for barn i grunnskulen sine 4 første år. Barn med funksjonshemming kan søkja om plass utover 4. trinn. SFO er eit tilbod når dei ikkje har undervisning, og foreldra er på arbeid Bore SFO Me er ein stor SFO med om lag 100 elevar. Elevane er delt opp i 3 basar (sol, måne, stjerne) der elevane er sett saman på tvers av alder. Dei har rom i Sør-igarden rundt hovudbasen rom 3. Dei 3 gruppene vil bli slått saman ut over dagen når det blir færre elevar. Me har tilgang til gymsalen fleire gonger i veka og kan bruka svømmehallen ved Bore ungdomsskule. For tida er det byggeaktivitet på skulen, men SFO vil likevel ha god plass til leik og aktivitet ute, blant anna i ballbingen. Me bruker og grillhytta. SFO er borna si fritid. Me prøver derfor å ha ein balanse mellom fri leik og vaksenstyrte aktivitetar, der borna sjølv skal vera med og bestemma. Personalet ved Bore SFO Dagleg leiar: Edel Njærheim Miljøarbeidarar: Det er elles tilsett mange miljøarbeidarar, nokre av dei arbeider berre i SFO og nokre arbeider både i SFO og skule Opningstider SFO har opent alle skuledagar frå skuleslutt og til 16.30. For dei som har morgontilbod startar dagen 07.00. SFO har ope i skulen sine ferier frå kl 0820-16.30 (+ morgontilbod frå 07.00). Dei som har tilbod tre dagar, har dei same 3 dagane i ferien og. SFO har stengt i heile juli. Planleggingsdagar: SFO er og stengt på planleggingsdagane: 16. august, 17. august, 16. november, 2. januar, 31. mai.
Oppseiing SFO har ein månads oppseiingstid. Dette gjeld og for endring i opphaldstid. Oppseiing er gjeldande frå den 1. kvar månad. 1. mai er fristen for oppseiing for neste skuleår. Ved oppseiing etter 1. mai blir du belasta ut august månad. Oppseiing skal skje via Visma. Ekstratøy/skift. Me er ute i all slags ver. Det er derfor viktig at barna har med klær som er tilpassa ver og vind. Barna må og ha eit ekstra skift liggande på skulen. Obs: Merk alle klede. Måltid Barna får mat og drikke kvar dag på SFO. Kvar fredag er det varm mat. I feriane er det varm mat kvar dag. Det skal vera fokus på sunn og variert mat. Innkryss Personalet fører kontroll med frammøte kvar dag. Dei kryssar inn barna når dei kjem, samt kryssar dei ut når dei går. Det er derfor viktig at du melder frå når barna skal ha fri eller er sjuke. Dette gjer du på programmet School Link. Kontakt Meldinger frå heimen blir gitt i School Link. Her kan du senda fråværsmelding rett inn i krysselistene. Det er derfor den beste og sikraste måten å melda fråvær på. Dersom du vil snakka med personalet, har me desse telefonane: Base Sol: 415 16 803 - Det er denne telefonen me kan nås på i ferie. Base Måne: 948 55 626 Base Stjerne: 908 18 991 Kontor SFO: 51 78 84 70 Kontor skulen: 51 78 84 50 Mail: bore.sfo@klepp.kommune.no
Henting Dersom barn skal hentast av andre enn foreldra, må SFO få melding om dette. Til vanleg skal barna ha faste sendetider. Desse vil me skal vera kvar halve time (til dømes 1500 1530). Dersom personalet skal senda heim barn til alle tider, får dei ikkje tid til anna. Dersom det ved spesielle behov blir endring i sendetid, melder du frå om dette. Meldingar i School Link kan ein ikkje forventa blir lese heile tida. Er det noko som hastar bruker du telefonen. 2. Samarbeid SFO og heimen Eit godt samarbeid mellom dei føresette og personalet er avgjerande for barna sin trivsel. De som føresette skal ha tydelege forventningar til oss. Me har og forventningar til de som foreldre. Bore SFO er ein stor SFO der mange av barna går heim sjølv. Foreldrekontakten med enkelte av barna blir derfor mindre. Det er derfor ekstra viktig at de som foreldre følgjer desse forventningane: Forventningar til dei føresette - At de abonnerer og følgjer med på skulen/sfo si heimeside. http://minskole.no/bore - Overheld fristar for innsending av påmelding etc. - Gir oss nødvendig informasjon om barnet. - Gir oss tilbakemelding om fråvær, sjukdom, endringar i hentetider osv. - Sørgjer for at barnet har skiftetøy. - At de respekterer reglane og opningstidene i SFO. Forventningar til personalet - Me skal ta barna på alvor, visa interesse, forståing og omsorg. - Tilretteleggja for leik ut frå barna sitt nivå, ønskje og føresetnader. - Gi tilbakemelding og informasjon om forhold gjeldande ditt barn. - Vera vennlege og opne i samhandling med barn og føresette. - Me skal halda avtalar som er gjort. - Me skal vera tydelege og trygge vaksne. - Senda ut informasjon om aktivitetar og eventuelle endringar i god tid. - Vera opne og mottakelege for tilbakemeldingar og konstruktiv kritikk.
3. Visjon mål og verdigrunnlag. Visjon og forankring Visjonen til Klepp kommune ligg til grunn for arbeidet: «Barna vår framtid» Hovudmål SFO er ein stad der barn opplever å bli sett, høyrt og er ein aktiv del av eit inkluderande miljø. Verdigrunnlaget Solidaritet Mangfald Ansvar Raushet Tryggleik. - «SMART SFO» Solidaritet: Ditt barn skal få vera ein del av fellesskapet. Det skal læra å forstå og respektera andre, andre sine meiningar og medverka til eit godt fellesskap. Barn lærer mykje av kvarandre, barn lærer mykje av trygge vaksne og vaksne lærer mykje av barn. Mangfald (læring) og meistring: Ditt barn har med seg sine talent og sine utfordringar. Læring kan i SFO skje gjennom leik. Vi lærer at det er plass til alle og at alle har med seg sin «glupskap» (mange intelligensar). Innanfor desse ramane vil ditt barn få oppleva meistring og bygga vidare på sitt sjølvbilde. Ansvar: Ditt barn skal få vidareutvikla sitt sjølvbilde, det å stå til ansvar både i medgang og motgang hjelper oss å bli gode medborgarar. Ditt barn skal få oppleva stolthet og trygghet til å meistra og feila. Raushet: Ditt barn skal få bli kjent med mange andre barn. Dei skal få læra å sjå styrker og likskap hos andre heller enn forskjell. Barnet skal få oppleva kulturar og mangfald på ein måte der alle er verdsett. Det er rom for å feila, det er rom for å meistra, det er rom for å vera! Trygglelik: Ditt barn skal få rammene som skal til for å nå sine mål, for å oppleva meistring og å tora å strekka seg litt lenger.
4. FOKUSOMRÅDE Medborgarkompetanse og sosialt medansvar Mål: Barna skal lærast opp til å delta aktivt i samhandling med andre. Barna skal læra å forstå og respektera andre, andre sine meiningar og medverka til eit godt fellesskap Slik gjer me på Bore SFO Gleding Bore skole er ein PALS-skule og dette gjeld også på SFO. Me har 3 hovudreglar: Respekt, Ansvar og Omsorg. Me som vaksne skal gi gode og tydelege beskjedar. Barna skal vera trygge på oss. Dette vil igjen setja «tonen» for korleis me snakkar til kvarandre, og korleis barna snakkar til oss vaksne og kvarandre. Me har mykje spel og regelleikar både inne og ute. Der lærar elevane å venta på tur, respektera kvarandre samt resultat av spelet. Me oppfordrar til dialog når nokon er ueinige eller noko er uklart. Alle som ønskjer, skal få høve til å delta. Barna får sjølv bestemme kva aktivitet dei ønskjer å ta del i. Dette er barnas fritid, derfor set me barna si medbestemming høgt. Me som vaksne er på utkikk etter gode eksempel, me gir ros, oppmuntring og belønning. Barna får BRA-kort når me tar barna i å gjera noko bra. Desse samlar me inn, og så får dei belønning etter ei viss mengde BRA-kort (popcorn, film, discofest, tur, bake). Barna er då sjølv med på å bestemma kva belønninga skal vera. Leik som utviklingsarena Mål: Barna i SFO skal stimulerast til sosial samhandling gjennom ulike aktivitetar og leikeformer. Leik er ein viktig faktor i elevane si utvikling og læring. Slik gjer me det på Bore SFO - Me legg til rette for leik inne og ute. - Barna sine val skal prioriterast. Det vil seia at me skal gi tid og rom for fri leik og høve til val blant dei vaksenstyrte aktivitetane. - Personalet organiserer leiker og aktivitetar.
Helse, miljø og fysisk aktivitet Mål: Barnet skal oppleva glede og meistring i fysiske aktivitetar og friluftsliv i nærmiljøet. Slik gjer me det på Bore SFO - Barna har tilgang til uteområdet og ballbingen kvar dag. - Me bruker nærområdet aktivt, til tur og utforsking. - Barna kan kvar veke delta på fotball, bade- og handballgrupper. - Me bruker grillhytta, som ein del av fredagsgruppene, og som Palsbelønning ol. - Me oppmuntrar barnet i leiken, og legg til rette for utfordringar på barnet sitt nivå. - Me har fokus på sunn mat og god hygiene. Me snakkar om dette saman med barna. Kunst, kultur og kreativitet Mål: Barna skal oppleve glede og meistring ved å delta i ulike kunst og kulturaktivitetar Slik gjer me på Bore SFO Kafegruppe der barna sjølv les i bøker og teikneseriar. Her er det og høgtlesing innimellom. Formingsoppgåver til dei ulike høgtidene.(jul, påske, vår og sommar) Kvar dag har barna høve til å perla, teikna og byggja med klossar. Me tar vare på kulturarven ved til dømes bruk av songleiker, hoppereglar etc. Me ser fram til eit nytt og spennande år. Helsing oss på Bore SFO