Ruter og lus
Ruter og lus Retrostrikk frå Salhus Tricotagefabrik Ann Kristin Ramstrøm (red.) Hanne Dale og Siri Angela Gamborg
MUSEUMSFORLAGET Trondheim 2018 ISBN 9788283050653 Grafisk formgivning Type-it AS Omslagsdesign Type-it AS Omslagsfoto Tove Lise Mossestad Forlagsredaktør laila.andreassen@museumsforlaget.no Papir 130 g Hello fatt matt Boka er satt med Freight Sans Pro 10/14,5 Trykk og innbinding GPS group Museumsforlaget Kjøpmannsgata 23 7013 Trondheim telefon 47 47 87 47 post@museumsforlaget.no www.museumsforlaget.no Denne boka er beskyttet av lov om opphavsrett til åndsverk, og avtaler om kopiering inngått med Kopinor. Ta kontakt med forlaget om du ønsker å gjengi deler av boka, i medieuavhengig form.
Innhald Forord 7 Starten på strikkeeventyret: Salhus Tricotagefabrik (1859 1989) 9 Krona på verket: produksjonen til Salhus Tricotagefabrik 19 Ruter og lus: mønsterstrikk ved fabrikken 25 Frå prøve til plagg 29 Før du begynner 33 Agat damegenser 35 Safir jakke 41 Hedvig damejakke 47 Hedvig pute 53 Oline kjole 57 Oline puter 63 Oline pute i Museumstvinn 71 Clausen herrejakke 75 Geysir damejakke 81 Streik dame- og herre genser 87 Streik teppe og puter 93 Arbeidaren dame- og herregenser 97 MakkO dame- og herregenser 103 Bertel herregenser 109 Astri damegenser 115 Emil herrejakke 119 DortheA lue og halvvottar 125 KlarA damegenser med hals og pulsvarmarar 131 Komet barnegenser 137 CobrA skjørt 143 Opal damegenser 149 Asjur turgenser til dame og herre 157 Fabrikkskjerfet 163 Asjur kjole og skjerf 169 ramm herregenser 177 Karde Meisteren dame- og herre genser 183 Notar 189 Takk 190 Kjelder 191 Foto og illustrasjonar 192
Forord 7 I alle museum finn vi skattar, som vakre gjenstandar og spanande historier om menneske og levde liv. Desse tinga gir oss innblikk i fortida, og vi som arbeider på museum elskar å vise fram tinga og fortelje deg alle historiene. Like utanfor Bergen finn du den tidlegare tekstilfabrikken Salhus Tricotagefabrik, som starta produksjon av klede allereie i 1859. Heilt fram til 1989 produserte strikkemaskinene metervis på metervis med stoff som blei sydd om til kvardagsplagg for store og små. Også kvardagsplagga måtte sjå fine ut, og sjølv dei enklaste konstruerte strikkemaskinene klarte å trylle fram lekre geometriske mønster som pryda kleda som blei sydd av syerskene på fabrikken. Det er dette rikhaldige mønsterarkivet av strikkeprøver som er nokre av våre uerstattelege skattar, og som vi vil vise deg i denne boka. For i dag tek vi vare på bygningane, maskinene, arkivet og tinga etter Salhus Tricotagefabrik. Då det ikkje lenger blei laga klede på fabrikken, tok det heldigvis ikkje lang tid før vernemyndigheitene, mellom anna Riksantikvaren og fylkeskonservatoren, bestemte seg for å verne anlegget. I dag er fabrikken eit nasjonalt minnesmerke over historia til den norske tekstilindustrien, og det er her du finn Norsk Trikotasjemuseum. På eit museum viser vi ofte fram dei finaste tinga våre i ei utstilling, men denne gongen skal du få dei med deg heim i ei bok og glede deg over nydesigna plagg inspirert av gamle strikkemønster. Nokre av dei fremste norske strikkedesignarane har bidrege til boka. Dei tok utfordringa på strak arm, og basert på mønstera til Salhus Tricotagefabrik har dei skapt oppskrifter til splitter nye jakker og genserar, kjolar og interiørstrikk. Arven etter fabrikkarbeidaren som for mange tiår sidan køyrde strikkemaskinene og trylla fram det enkle, men vakre mønsteret, er vi i dag stolte over å bruke på ein ny måte. No kan du glede deg over nydesigna strikkeplagg som i all hovudsak er basert på norskprodusert garn. Plagga er kalla opp etter merkevarer og nokre av dei kvinnene og mennene som arbeidde i produksjonen ved Salhus Tricotagefabrik. Slik har vi valt å heidre tekstilarbeidaren! Utan mine gode kollegaer Hanne Dale og Siri Angela Gamborg er eg i tvil om denne boka ville blitt til. Takk for at de såg kor viktig det er å få vist fram strikkemønstera, og for at vi saman vidareutvikla ideen om å lage ei strikkebok. Takk for prøvestrikking av mønstera, men ikkje minst Hanne Dale, takk for at du har ført pennen gjennom boka og halde orden på alle trådane av oppskrifter, masketal, dialogen med designarar alt det viktige som må vere på plass før ei bok kan gå i trykken. Vi vil også takke Hillesvåg Ullvarefabrikk, Rauma Garn og Sandnes Garn for godt norskprodusert garn til desse oppskriftene, mykje av det laga av norsk ull. Takk til alle prøvestrikkarane, som har stått på seint og tidleg for å få ferdig plagga til boka. Ei stor takk til dei flotte modellane som stilte opp i fritida si og fekk plagga til å sjå akkurat så fine ut som dei er! Takk til fotograf Tove Lise Mossestad, sminkør Seline Rasmussen Bjørseth og til redaktør Laila Andreassen. Gode strikkar, gled deg over eit nytt strikka plagg med historisk sus! Ann Kristin Ramstrøm Leiar, Norsk Trikotasjemuseum