Tíðindi úr Føroyum tann 29. feb Tíðindi til føroyingar uttanlanda stuðla av tí føroysku sjómanskirkjuni.

Tíðindi úr Føroyum tann 29. feb. 2015 Tíðindi til føroyingar uttanlanda stuðla av tí føroysku sjómanskirkjuni. Danjal av Rana 29.02.2016 (08:07) Nú verður kaldari aftur Fleiri lágtrýst og tilhoyrandi brúgvaløg flyta seg komandi vikuna inn yvir oyggjarnar úr vestri, og tað gevur óstøðugt og rættiliga kalt veður. Mánadagin verður gul til stívt andøvsgul, 5 til 10 m/s av vestri og útsynningi. Tað slítur í og verður samdrigið. Um kvøldið og náttina makar hann vindin niður í lítið lot, undir 5 m/s, fyrst av útsynningi, seinni eystri. Tað verður skýggjað og regn kemur inn yvir landið av útsynningi. Hitin alt samdøgrið millum 1 og 5 hitastig. Týsdagin verður lítið lot av ymsum ættum, undir 5 m/s. Yvirhøvur skýggjað og stundum regn. Hitin um dagin um 5 hitastig. Út ná náttina verður andøvsgul upp í ein strúk av norðri, 8 til 13 m/s og ælaveður, partvís vátaslettingur ella heglingur. Hitin millum frostmarkið og 3 hitastig. Mikudagin øtlar hann vindin í strúk í vindi upp í skrið av norðri, 13 til 18 m/s, men frá kvøldinum makar hann vindin og út á náttina verður andøvsgul upp í ein strúk av útnyrðingi, 8 til 13 m/s. Yvirhøvur skýggjað, kavi og heglingsæl. Hitin um dagin millum frostmarkið og 3 hitastig, um náttina millum frostmarkið og 3 kuldastig. Hósdagin makar hann vindin niður í lot til andøvsgul av norðri og eystri, 3 til 8 m/s, sum móti nátt snarar í ein eystan og landnyrðing og øtlar upp í gul til stívt andøvsgul, 5 til 10 m/s. Yvirhøvur skýggjað og okkurt kavaæl. Hitin alt samdøgrið millum frostmarkið og 3 kuldastig, um náttina kaldari í støðum. Fríggjadagin verður gul til stívt andøvsgul av landnyrðingi, 5 til 10 m/s, sum um kvøldið øtlar í stívt andøvsgul upp í hvassan vind, 10 til 15 m/s, av landnyrðingi. Samdrigið og vátaslettings- ella kavaæl. Hitin alt samdøgrið millum frostmarkið og fýra hitastig, um náttina kaldari í støðum. Leygardagin makar hann vindin niður í andøvsgul upp í ein strúk, 8 til 13 m/s, av norðri. Samdrigið og kavaæl. Hitin alt samdøgrið millum frostmarkið og 3 kuldastig, um náttina kaldari í støðum. Ætlar at sigla um Atlantshavið í einum avgusti Nøkur menniskju duga betur at gera sínar dreymar til veruleika enn onnur. Skotin Tom McClean er ein teirra. T.d. at vera tann fyrsti, ið hevur róð einsamallur um Atlantshavið úr Nýfoundlandi til Írlands, og tann fyrsti, ið fór um Atlantshavið í einum báti upp á bert 3 metrar. Og hann er heldur ikki av tí slagnum, ið letur seg kúga. 3 vikur eftir at Tom McClean fór um Atlantshavið í einum 3 metrar longum báti, tók ein annar met hansara við einum báti, ið var 20 sentimetrar styttri. Hetta fekk McClean at taka motorsagina fram og stytta bát sín við 60 sentimetrum, fór síðani avstað aftur og tók metið av nýggjum. Nú er Tom McClean vorðin 73 ára gamal, men tað hevur ikki minkað um ævintýrhugan. Næsta verkætlan hansara liggur longu og vaggar á sjónum út fyri íbúð hansara á Isle of Skye. Ein 65 tons tungur bátur úr stáli og trevjuglasi og tilevnaður sum ein avgustur. Við honum ætlar hann enn ein a ferð at fara um Atlantshavið. Hann ætlar at blaka fortoyningarnar so skjótt sum hann hevur fingið ein sponsor. Upprunaligi dieselmotorurin í avgustinum, sum sjálvandi eitur Moby, er skiftur út við elmotorar, ið verða riknir við alternativari orku. Harumframt er Moby útgjørdur við einum andarholi, ið kann blása sjógv langt upp í luftina. Hann er jú ein hvalur. Kelda: vice.com Antares.fo

Maersk Supply savnar løgdu skip síni í Fredericia Maersk Supply Service hevur gjørt av at savna meginpartin av løgdu skipunum hjá reiðarínum í Fredericia. Maersk Asserter og Mærsk Terrier liggja longu í havnini, og næstu vikurnar verða seks skip aftrat løgd har. Valið fall á Fredericia, tí tey kundu bjóða okkum eina góða avtalu, ið samsvaraði við tørv okkara, siger Claus T. Sørensen, ið situr í leiðsluni hjá Maersk Supply Service, við Maritime Danmark. Vit spara nógvar pengar í útreiðslum við at savna øll skipini í einari havn, siger Claus T. Sørensen Umframt Maersk Asserter og Mærsk Terrier verða Maersk Shipper, Maersk Beater, Maersk Advancer, Maersk Assister, Maersk Searcher og Maersk Supplier løgd fyri teym í Fredericia Partar av manningini verða fyribils verandi umborð, meðan skipini liggja fyri teym, meðan onnur verða flutt umborð á onnur skip. Maersk Supply Service hevur onki boð upp á, nær skipini loysa aftur. Tað veldst alt um, hvussu marknaðurin fer at laga seg í framtíðini, sigur reiðaríið. Kelda: maritimedanmark.dk Antares.fo Jens Meinhard heldur fram sum formaður fyri farmaskip Hósdagin 25. februar hevði Reiðarafelagið fyri Farmaskip ársaðalfund sín. Jens Meinhard Rasmussen legði fram nevndarfrágreiðing og segði m.a. soleiðis: Tað er ymiskt, hvussu árið hevur hilnast í vinnuni. Offshore er sum heild í svárari kreppu og hevur stórar avbjóðingar fyri framman vegna kollaps í oljuprísum og minkandi leitivirksemi. Harumframt ávirka støðan í Russlandi og stórar korruptionsgølur í Brasilia marknaðin neiliga. Kreppan væntast at verða long. Fyri aðrar partar í vinnuni gongur betur. Tangaskipamarknaðurin hevur havt eina positiva gongd í seinastuni, og lækkandi oljuprísir hava eisini havt eina jaliga ávirkan á partar í vinnuni. Kappingin er sum altíð hørð, tí reiðaríini virka á altjóða marknaðinum. Tí er tað umráðandi fyri vinnugreinina framhaldandi at hava støðugar karmar og at vera kappingarfør í mun til reiðarí undir øðrum flaggi. Umframt at vinnan sjálvsagt javnt tillagar seg til umstøðurnar, so hevur tað týdning, at føroysk lóggáva, reglur og umsiting ikki leggur óneyðugar byrðar á vinnuna. Tað eru millum annað viðurskifti í sambandi við FAS, sum eiga at verða dagførd, soleiðis at føroysk skip kunnu kappast á jøvnum føti við onnur. RFF hevur javnan samband við politikarar og umsiting, soleiðis at ikki óneyðugir fótonglar verða lagdir fyri vinnuna. Undan valinum í september 2016 vísti RFF á, at tørvur var á eini yvirskipaðari maritimari strategi. Felagið fegnast tí um, at Uttanríkis- og vinnumálaráðið hevur tikið stig til hetta og hevur sett ein bólk at gera uppskot til eina maritima strategi. Av sitandi nevndarlimum stóðu Jónas Sigmarsson, Hentzar Steingrímsson, Sjúrður Johansen og Bogi P. Nielsen fyri vali, og vórðu teir allir afturvaldir. Umframt hesar sita eisini Jens Meinhard Rasmussen, Gunnbjørn Joensen og Rúni V. Poulsen í nevndini. Nevndin hevur skipað seg við Jens Meinhard Rasmussen sum formanni og Hentzar Steingrímsson sum næstformanni. Kelda: industry.fo Antares.fo Síðsti B&W nýbygningurin seldur til upphøggingar Tað allarsíðsta skipið, ið varð bygt á Refshaleoynni í Keypmannahavn, Ever Mighty, hevur siglt sína seinastu ferð - úr Haldia í India til Chittagong í Bangla Desh, har skipið nú skal gerast um til endurnýtslutilfar. Nýbygningur nr. 957 á Burmeister & Wain Skipasmiðjuni varð latin eigarunum 20. mars 1996. Samstundis helt øll skipabygging uppat á Refshaleoynni í Keypmannahavn.

B&W Skipasmiðjan hevði tá til fánýtis stríðst fyri at yvirliva á einum sperdum marknaði og við avmarkingum í fíggjarligum møguleikum. Ever Mighty er nú seld til upphøggingar í Chittagong í Bangla Desh. Kelda: maritimedanmark Antares.fo Maersk Oil ikki við í nýggjari olju- og gassleiting Mærsk er ikki millum tey 12 feløgini, ið samanlagt hava fingið 16 nýggj leitiloyvi í Norðsjónum eftir olju og gassi. Mærsk søkti upprunaliga saman við Shell um fýra loyvi, men valdi síðani at siga nei til tey øll. Tað er óheppið, at Shell og Mærsk - sum vit kenna sum stórar spælarar í Norðsjónum - ikki eru við, sigur Martin Næsby, stjóri í Olie Gas Danmark, við vinnulívsportalin Finans. Sambært Finans er orsøkin til, at hvørki Mærsk ella Shell vilja fara undir nýggja leiting í danska partinum av Norðsjónum, at Shell ikki vildi góðtaka krøvini hjá donsku myndugleikunum um økta ábyrgdarveiting, og at Mærsk ikki vildi standa einsamalt eftir við øllum íløgunum, eftir at Shell tók seg aftur. Vit høvdu vónað, at Mærsk og Shell eisini vóru á listanum yvir luttakararnar í komandi sjeynda umfarinum av loyvum. Tó stendur tað sjálvandi feløgunum frítt at gera av, um tey vilja taka ímóti loyvunum ella ikki undir ásettu treytunum, sigur Ture Falbe-Hansen, kunningarstjóri í Energistyrelsen, við Finans. Tað er positivt, at stórur áhugi framvegis er fyri danska partinum av Norðsjónum, sjálvt um oljuprísirnir í løtuni eru lágir. Mongu nýggju loyvini fara at meðvirka til, at vit kunnu varðveita eitt støðugt leitingarumhvørvi í Danmark. Og nýggju íløgurnar í leiting fara vónandi at verða umsettar í nýggj rakstrarverd fund, sum kunnu hjálpa til við at fíggja okkara vælferðarsamfelag og grønu umlegging, sigur orku-, veitingar- og veðurlagsmálaráðharrin Lars Chr. Lilleholt. Energistyrelsen fer nú at greina royndirnar frá 7. umfarinum við atliti at fyrireikingunum til 8. útbjóðingarumfar. Kelda: Finans og Energistyrelsen Antares.fo Stórsigur til Hillary Clinton 29.02.2016-06:00 Hillary Clinton hevur allar orsøkir til at smílast. Undanvalið í South Carolina í gjáranáttina var ein knúsandi sigur til hennara í royndini at gerast demokratiskt valevni á forsetavalinum í USA. Hillary Clinton fekk heili 73 prosent av atkvøðunum, meðan kappingarneytin Bernie Sanders einans fekk 26 prosent. Veljarakanningar undan valinum vístu ein greiðan sigur til Clinton á knøpp 30 prosent, men úrslitið gjørdist ein nógv greiðari sigur enn kanningarnar vístu. Avgerandi dagur í morgin Í morgin verður tann sokallaði Super Tuesday. Tá verður undanval í stórum parti av statunum í USA, og alt bendir á, at fyrrverandi forsetafrúan hevur av álvara latið seg í føraratroyggjuna, eftir at hon hevði eina heldur trilvandi byrjan av forsetavalstríðnum. Clinton verður mett at standa sterk í suðurstatunum, tí hon hevur gott tak á minnilutabólkum. Hetta sást á valinum í Nevada fyri eini viku síðani og aftur nú í vikuskiftinum sást hetta á valinum í South Carolina. Fleiri av statunum ið hava val týsdagin eru suðurstatir og veljarakanningar benda á, at Clinton fer at standa seg væl. Sanders viknaður Tað sær eisini út til, at Hillary Clinton endiliga hevur funnið útav, hvussu hon skal handfara Sanders, sum annars hevur givið henni nógv harðari mótstøðu, enn upprunalga varð roknað við. Boðskapurin um, at eitt forsetavalstríð snýr seg um meira enn bara tann eina spurningin, sær út til at virka. Sanders hevur annars fyri tað mesta bara tosað um at stýra bankunum. Tó má sigast um Bernie Sanders, at hann hevur megnað at staðið fyri teimum mest óvæntaðu valúrslitunum í USA í nýggjari tíð. Eingin hevði frammanundan roknað við, at ein lutfalsliga ókendur 74 ára gamal jødi úr einum av fólkafátækastu statunum í USA, sum kallaði seg sjálvan sosialist, kundi

seta kós móti landsins hægsta embæti. Tað megnaði hann eitt skifti, men nú sær tó út til, at møguleikin hjá honum er minkaður nógv. 80 føroyingar við privatflogfari til Danmarkar á messu 29.02.2016-06:23 Í morgin byrjar ein messa í Fredericia. Og føroyingar koma í fleirtali. Týsdagin, í morgin, verður tann so kallaða MESSE C í Fredericia. Hetta er messa fyri bygnings-fakfólk, hondverkarar og onnur innan byggivinnuna. Væntandi fara eini 30.000 at leggja leiðini til Fredericia 1. til 4. mars, nú messan verður hildin fyri 17. ferð. Fredericiaavisen.dk hevur umrøtt hesa messuna, men tað er ikki bert umfatandi messan, sum fær umtalu. Heimasíðan varpar nevniliga ljós á, at 80 føroyingar koma allan vegin úr Føroyum á messu við privatflogfari. Heimasíðan skrivar soleiðis: Vi får besøg på messen af 80 håndværkere fra Thorshavn på Færøerne. Det viser interessen for messen fra hele Norden. Oven i købet har XL-BYG så valgt at flyve dem ind med privatfly. Det synes vi arrangører er et meget godt udtryk for, hvor stor betydning messen har som mødested for branchen. XL-Tórshavn hevur ikki spart, ljóðar frá Fredericiaavisen, men hevur gjørt eina góða tænastu fyri arbeiðarar sínar. Hálvthundrað føroyingar til innandurakapping í Keypmannahavn 29.02.2016-07:45 Leygardagin skipaði fótbóltsfelagið fyri útisetar í Keypmannahavn, ÍF Føroyar, fyri innandura kapping. Luttøkan var avbera góð, má sigast. Norðlýsið var sum vera mann til staðar og fekk nakrar myndir av hugnaligu steypakappingini. Innandurakappingin varð hildin í Svanemøllehallen, sum er á Eysturbrúgv. Vinnararnir av steypakappingin, Niels og tey, sum liðið kallaði seg, vann kappingina. "Niels og tey" eru á myndini. Kappingin var annars skipað soleiðis, at fyrst og fremst hava útisetarnir melda seg til kappingina. Síðani hevur nevndin í felagnum roynt at gjørt lið, so jøvn sum eina ferð tað ber til, har minst ein genta/kvinna skuldi vera á hvørjum liði. Málini, sum genturnar skutu, taldu tvífalt so nógv sum hjá monnunum. Tískil var týdningarmikið at gentan fekk seinasta fótin á. Umframt hetta, skuldi hvørt lið navngeva liðið, finna upp á eitt herróp og eina jubil-senu. Kiskurnar fingu heiðurin fyri besta navnið. Undirritaði kann upplýsa, at tað var ógvuliga stuttligt og at tiltakið eydnaðist væl. Hetta var fyrri partur av degnum, tí seinni var boðið til pitsa og annað gott á Oyrasundskollegiinum. ÍF Føroyar skipar skipar á hvørjum fyri innandurakapping og hugna afturvið, stutt áðrenn kappingarbyrjan. Landskappingin hjá teimum fýra liðunum, sum leika heilan-vøll byrjar seinast í mars og fyrst í apríl. Menninir hava longu vant í ein góðan mánaða, meðan kvinnuliðið hevur vant í tvær vikur. Havi bestan hug at javna moskuna við jørðina 29.02.2016-10:39 Tað er eingin orsøk at lata Grimhøjmoskuna vera opna ella at lata imam Abu Bilal verða verandi í landinum. Inger Støjberg, integratiónsmálaráðharri, er ikki mjúk í orðum, nú TV 2 hevur avdúkað loyniligar upptøkur, sum avdúka at Abu Bilal mælir til at ótrúgvar muslimskar kvinnur, sambært sharialógini, skulu pískast ella steinast, og at tað sama eigur at galda fyri muslimar, sum venda islam ryggin. Tað er fullkomiliga óhoyrt, at tað finnast menniskju í Danmark, í prætika tílíkt, sigur Inger Støjberg. Tað hoyrir ikki heima her, og hann hoyrir heldur ikki heima í Danmark, sigur hon. Løgreglan hevur upplýst, at tey fara at kanna útsøgnina hjá imaminum nærri. Føroyingar álopnir av 20 tilflytarum í Keypmannahavn

Farna fríggjakvøld kom Tórður Dahl og vinmaðurin út fyri einari hending, sum seint verður gloymd. Brádliga vórðu teir umringaðir av tjúgu monnum, sum ætlaðu at buka teir við jarnrørum og ketum. Dagblaðið hevur tosað við Tórða Dahl um skakandi hendingina. Hann greiður soleiðis frá hendingini Eg og vinmaðurin høvdu verið á fríggjadagsbarr á Radiograf Skúlanum, ið liggur á Nørrebro. Um midnáttartíð avgera vit at fara yvir á Sjúkrarøktarfrøðingaskúlan, ið liggur nærhendis. Vit fara síðani til gongu og tað er tá vit koma útfyri hendingini, greiður Tórður Dahl frá. Tá vit eru farnir til gongu, kemur ein ungur drongur av øðrum etniskum uppruna yvir til okkara, sum byrjar at lýsa í eyguni á okkum við einum lasara. Vit biðja hann halda uppat, men hann vil ikki gevast. Vit skumpa hann frá okkum, so vit kunnu fara fram við honum. Ungi drongurin slær okkum í andlitið. Vit gerast sjálvandi illa við, men royna at lata tað fara so vit kunnu fara víðari. Men brádliga steðga fýra fullir bilar. Vit vita ikki hvat gongur fyri seg. Nakrir mans royna at umringa okkum og vit leggja til merkis, at teir fara í viðførisrúmið í bilinum, tá teir fara eftir vápnum. Teir taka nakrar jarnketur og jarnrør. Menninir vóru somuleiðis av øðrum etniskum uppruna. Máttu renna fyri lívinum Vit hyggja forfardir uppá hvønn annan, og vinmaðurin sigur við meg, at nú ræður um at renna fyri lívinum. Og vit renna avstað av øllum alvi. Nakrir royna at renna eftir okkum og restin roynir at jagstra okkum í bili greiður Tórður Dahl frá. Eftir, at vit høvdu runnið eina góða løtu hildu vit, at vandin var av. Men so var ikki. Vit síggja at teir blíva við at jagstra okkum og vit sluppu okkum aftur til rýmingar. Vinmaðurin hjá mær kom fram á ein bil, ið helt av fyri reyðum í eini ljóskurvu, og hann velur at leypa inn í bilin og biðja um hjálp. Bilførarin hjálpir honum, og hann sleppur síðani til rýmingar. Eg renni víðari, tað sum eg eri mentur. Einir fýra mans eru í hølunum á mær, og tveir bilar fylgja aftaná. Uttan at eg havi givið mær far um tað, so renni eg inn í eina blindgøtu. Eg verði tí noyddur til, at renna ímóti teimum og tað er tá eg verið álopin. Einir fýra mans leggja á meg og bilarnir steðga, og fleiri eru á veg í móti mær. Eg verði sligin við eini jarnketu á bringuna, á knæið, í ryggin og á halabeinið. Tíbetur klári eg at renna í gjøgnum trunkan og sleppa aftur til rýmingar. Vinmaður mín er tá sloppin til rýmingar, og hevur fingið fatur á einum taxa bili. Hann roynir at ringja til løgregluna, men teir fáa ikki hjálpt tí vit ikki kunnu greiða frá hvar vit eru. Eg føldi at adrenalinið pumpaði í kroppinum og eg rann víðari. At enda hevði eg runnið so leingi, at eg hevði onga hóming av hvar eg var. Eg mátti tí spyrja meg fyri hvar eg var. Tá hevði eg runnið heilt frá Nørrebro til Ryparken (3-4 kilometrar). Eg ringdi tá til vinmannin hjá mær, og hann kom eftir mær við Ryparken. Og ikki fyrr enn tá føldi eg vandin var av. Sluppu væl frá hendingini Tórður Dahl er sjálvsagt skakaður av hendingini. Men lítið er at ivast í, at tað hevði kunna enda ógvuliga nógv verri. Eg eri øgiliga eymur í kroppinum, sigur Tórður Dahl. Eg havi eitt sár á knænum og sár á hondini. Tað sæst eisini á bringuni, at eg eri sligin við eini ketu. Eftir at hava verið úti fyri slíkari hending, má man bara takka Guði fyri, at vit sluppu heilskapaðir frá hendingini, sigur Tórður Dahl. Slík hending kemur ógvuliga illa við. Vit vóru farnir á fríggjadagsbarr, fyri at hugna okkum saman við floksfeløgum. Vit høvdu á ongan hátt ímyndað okkum at vit kundu koma út fyri slíkari skakandi

hending. Og høvdu vit vitað, hvat tað var ungi drongurin hevði roynt at lagt upp til, so høvdu vit hildið okkum langt burtur, greiður Tórður Dahl frá. Ikki óvanligt Dagblaðið hevur fingið orðið á ein royndan danskan løgreglumann. Hann sigur, at tað tíverri kemur alt ov ofta fyri, at fólk royna at provokera, fyri at kunna leggja upp til bardaga. Tað er sjálvandi altíð eitt gott hugskot at fylgjast við einum øðrum, tá tú ferðast í náttarlívinum. Skuldi okkurt hent, so hevur tú eitt vitnið, sum í øllum førum hevur sæð tað sama sum tú. Men tað sigur seg sjálvt, at tú ikki hevur ein livandi kjans at verja teg sjálvan, tá tú verður umringaður av tjúgu monnum, ið bera vápn, greiður løgreglumaðurin frá. Hann greiður eisini frá, at tað kann vera ringt, at finna gerningsmenninar í slíkum førum. Tað er tíverri ógvuliga ringt, at fáa uppklára slík harðskapsmál. Um okkurt vakmyndatól er nærhendis, so kann ein vera heppin, at ein mynd verður fangað av gerningsmonnunum. Db.fo Gamalt skipsróður komið úr útgrevsturi á Bedingini í Klaksvík 29.02.2016-16:22 KSS ger stórar broytingar á sleipistøðina í Klaksvík. Løpið verður at kalla gjørt av nýggjum, og grivið verður út. Í hesum sambandi er eitt forvitnisligt róður komið fyri ein dag. Róðrið er stórt, tveir metrar høgt og góðan metur breitt. Teir á KSS hava tosað aftur og fram um hvat hetta er fyri róður og eru samdir um, at hetta má vera frá einum deyðsiglara, tíð onki sæst til farvegin eftir skrúvuvatninum á róðrinum. 88 ára gamli Óli Lydersen, ið kom á timbursmiðjuna á bedingini at arbeiða í 1946 sigur, at róðrið er í hvussu so er komið at liggja har áðrenn 1948, tí tá høvdu teir bedingina uppi og tað er heilt víst, at tað er ikki komið at liggja har í hansara tíð. Óli Lydersen heldur, at róðrið er av eini skonnart, tí tað er ov stórt at vera av eini slupp, men hvør skonnartin er veit ongin nakað um. Hvat verður av róðrinum veit ongin í løtuni, men møguliga kemur Føroya Sjómannadagur upp í leikin her, hvør veit. Peikar eisini á B36 29.02.2016-17:22 Ríkin N. Djurhuus tippar her um, hvussu endaliga støðan í Effodeildini 2016 verður. Ríkin er íðin HB viðhaldsmaður. Hann væntar tó, at FM endar hjá grannunum aftur í ár. Ríkin væntar, at endaliga støðan verður hendan: 1. B36 2. Víkingur 3. KÍ 4. NSÍ 5. HB 6. ÍF 7. AB 8. Skála 9. TB 10. B68 Hví verður júst B36 FM vinnari? B36 hevur tann stórtsæð sama hópin í mun til undanfarna árið, tó so Hans Pauli Samuelsen er farin til Víking, men sum bleiv sagt - Lið hava vunnið FM uttan Hans Paula fyrr! Eg vænti teir halda somu gongdina, við øðrum leikarum ið taka yvir, eftir teimum sum eru farnir burturúr. Eyðun Klakkstein sær út til at hava funnið røttu uppskriftina til samansetingina av hópinum, og spælistílurin verður

nokk í sama standi sum í fjør. Profilarnir hjá teimum eru enn í hópinum, umframt at Cieslewicz og Róaldur skuffa nokk eiheldur í ár. Hvør verður ársins leikari? Um B36 vinnur FM í ár, so verður tað uttan iva við Lukasz Cieslewicz sum ársins leikara. Tað munnu verða fá sum ivast í hansara kvalitetum. Hvør leikari á HB liðnum fær sítt gjøgnumbrot í ár? HB liðið í ár er ungt, men hinvegin so verður tvungið at brúka teir ungu leikararnar, her kann verða gjørligt at onkur av teimum veruligan bítur seg fastan á liðið. Jákup F. Hansen sær út til at skula vera fastur maður í miðverjuni, undir liðini á Johan Troest, um hann megnar hesa uppgávu, í sama mun sum síðumaðurin, so er eingin ivi um at hann verður ein av lyklaleikarunum frameftir. Í tí meira framatrættaða spælinum verður lagt upp til at Teit Jacobsen møguligan fær nógva spælitíð. Hann hevur verið ein profilur í teimum yngru rekkjunum, og hevur víst sítt virði tá tað hevur staðið nógv á, so spennandi verður at síggja um hann megnar at flyta hetta støði yvir til effo-deildina, og at verða fremsti maður á HB liðnum. Hvat er lykilin til eitt gott úrslit hjá HB í ár? Liðið er í einari jaligari menning, hóast stóra frágongd, so letur til at nógv orka er løgd í teir leikarar ið umboða liðið í løtuni. Royndirnar eru kanska ikki nógvar hjá ymsum av leikarunum, men har eru royndir menn ímillum, og spennandi verður at síggja hvussu hesir megna, at taka ábyrgd og halda liðnum uppi, tá mótgongdin kemur, ella heldur um mótgongdin kemur. Útlendingar keyptu tá føroyingar seldu 29.02.2016-19:12 Tað var áhugaverdur og fangandi lestur nú Dimmalætting útgreinaði hvussu stórur partur av yvirskotinum hjá Bakkafrost verður goldið sum vinningsbýti til útlendingar. Ein milliardbeinleiðis av landinum og søgan er áhugaverd og ikki minst at sambært roknskapinum kemur Bakkafrost at gjalda umleið 400 milliónir í beinleiðis skatti inn í landskassan í 2016. Yvirskotið er illgrunasamt, sigur føroyskur búskaparfrøðingur. MEN um vit lata slíkar útsøgnir liggja og hyggja eftir tølunum, so er talan um eina veruliga sólskinnsøgu. Bakkafrost hevði 810 milliónir í yvirskotið í 2015. Gjørdi íløgur á góðar 600 milliónir í 2015. Beinleiðis skattur til gjaldingar til Landskassan í 2016 verður umleið 400 milliónir. Gjalda vinningsbýti á 400 milliónir. Størsti avtakarin av vinningsbýtinum uppá 400 milliónir krónur, er tann føroyski landskassin, sum fær umleið 120 milliónir av hesum 400 milliónunum. Síðani fáa eigararnir restina, har størsti eigarin fær slakar 38 milliónir krónur. Útlendingar keyptu tá føroyingar seldu Bakkafrost fór á Keypskálan í 2010, har stovnsligir (eisini almennir) og privatir íleggjarar fingu møguleikan at keypa partabrøv í Bakkafrost. Føroyingar áttu 100% av felagnum, tá tað fór á Keypsskálan, og umleið 44% var sett til sølu. BankNordik seldi síni 34% og aðrir seldu umleið 10%. Men tað vísti seg, at tað var ikki eins stórur áhugi millum føroyingar at keypa hesi partabrøv, sum vóru til sølu, sum tað var millum útlendingar. Og fleiri av teimum Føroyingum, sum keyptu, bæði feløg, almennir stovnar og privatfólk, seldu partabrøvini aftur, so hvørt sum virðið vaks á felagnum. Tó so, nøkur valdu at halda fast, og tey kunnu í dag gleða seg um, at tey lótu peningin arbeiða í felagnum. Tí tey sum t.d. settu 100.000 kr í felagið, hava fingið 80.000 kr aftur bara í vinningsbýti umframt hækkingina í partabrævinum. Tá Bakkafrost keypti Havsbrún í 2011, fingu parteigarirnir í Havsbrún eisini møguleika at veksla um til partabrøv í Bakkafrost til kurs 49, heldur enn at selja. Fleiri valdu at selja, men nøkur tóku heldur av tilboðinum um at fáa ognarskap í tí samanlagda felagnum. Sigast má, at hesi hava eisini fingið gott avkast síðani. Millum tey sum seldu var m.a. sjálvur eigarin av Dimmalætting og útlendingar keyptu. Í dag eru umleið 4300 parteigarar í Bakkafrost úr 22 ymiskum londum. Av hesum eiga Føroyingar umleið 26%, Bretar umleið 22% og Norðmenn sløk 19%. Birgith Lassen 29.02.2016 (08:58) Endiliga fekk Leo sín Oscar

Síðani 1994 hevur hann verið tilnevndur til ein Oscar seks ferðir. Men ikki fyrrenn í nátt føroyska tíð eydnaðist tað Leonardo DiCaprio at fáa ein av hesum mætismiklu lítlu, gyltu monnunum. Leonardo DiCaprio vann fyri sín høvuðsleiklut í filminum The Revenant. Í síni takkarrøðu tosar hann um umhvørvið og ta broyting, umhvørvið fer í gjøgnum beint nú. - Latið okkum ikki taka hesa jørðina fyri givið. Latið okkum ikki taka nakra løtu fyri givið, segði Leonardo DiCaprio millum annað í síni vælfyrireikaðu røðu. And the Oscar goes to. Virðislønina fyri besta film fekk framleiðslan Spotlight. Mad Max: Fury Road vann heili seks gyltar menn, og favoritturin The Revenant vann til samans tríggjar virðislønir. Eina fyri bestu fotografering, besta leikstjórn og besta mannliga høvuðsleiklut, sum altso Leonardo DiCaprio fekk. Árni Gregersen, ting.fo 29.02.2016 (12:03) Lars Løkke hevur umskipað Tað var serliga buldrasligt hjá danska forsætisráðharranum í seinastu viku. Leygardagin legði Eva Kjer Hansen, sum stríðið stóð um, frá sær. Í dag hevur forsætisráðharran so tilnevnt ein nýggjan ráðharra. Nýggi ráðharrin er Esben Lunde Larsen, sum higartil hevur verið kenslumálaráðharri, sum nú tekur við sum nýggjur landbúnaðar- og umhvørvísmálaráðharri. Nýggjur kenslumálaráðharri og ráðharri fyri vísind verður Ulla Tørnæs. Hon situr í Evropa-tinginum, men forsæitsráðharrin kallar hana heim til danskan politikk og ein sess í stjórnini. Morten Løkkegaard, journalistur og fyrrverandi vertur í DR, fer í Evropatingið fyri Ulla Tørnæs. Áki Bertholdsen 29.02.2016 (13:21) Vilja hava Cliff Richard at boykotta Føroyar Fólk, sum eru ímóti grindadrápi, vilja nú hava Cliff Richard at boykotta Føroyar, og at lata vera við at koma til Føroya at halda konsert, fyrrenn vit eru givin at drepa grind. Cliff Richard skal annars spæla á Summarfestivalinum í summar, men nú hava tey stovnað ein bólk á Facebook, ið onkur, ið kallar seg Stop Dolphin Slaughter stu'lar og har heita tey alment á Cliff Richard um ikki at koma til Føroya. Umhvørvisfólkini vísa á, at í øldir var grindadráp neyðugt fyri at liva í Føroyum, men nú á døgum er tað ein avoldaður, blóðugur ítróttur, har hvalir verða riknir a land og dripnir við knívum, tí tað er gomul siðvenja. Tey vísa eisini aftur, at talan kann vera um at útvega mat, tí grind eru so heilsuskaðilig, at hon er ikki mannaføði. Tí er rætt og slætt talan um ein blóðugan ítrótt, siga tey. - Vit heita blídliga á Sir Cliff Richard um ikki at lata hesa óbótagerð verða óátalaða, men at gera tað rætta og ikki at fara til Føroya, fyrrenn vit eru givin hesi ráu siðvenju, tað er at drepa grind, siga tey. Árni Gregersen, ting.fo 29.02.2016 (14:21) Nú kemur gongd á politikkin Tað hevur friðarligt í tinginum síðani á nýggjárinum, men nkemur ferð á aftur.

Seinasti framløgudagur í hesi tingsetuni er 7. marts, so nú koma uppskotini á løgtingsskrivstovuna. Úrlandsstýrinum er 17 ymisk uppskot komin í dag og eftir ætlan kom fimm-sjey uppskot afturat áðrenn seiansta framløgudag. Harumframt kemur andstøðan við nøkrum uppskotum - helst fleiri enn 10. Tingfundur verður mikudagin klokkan 11. Uppskotini frá landsstýrinum í dag snúgva seg millum annað um: Uppskot til broyting í matvørulógini, uppskot til broytingar í løgtingslóg um serskúla, uppskot um broyting í løgtingslóg um grind og annan smáhval, uppskot til broyting í ársroknskaparlógini og uppskot til broyting í løgtingslóg um framleiðslu, flutning og veiting av ravmagni. Jóannes Hansen 29.02.2016 (15:27) Móttøka verður fyri heimsmeistaranum Í gjár vann Bogi Olsen úr Rituvík HM í inniróðri. Í dag ferðast hann og hinir átta rógvararnir heima aftur á klettarnar. Tað gera teir umvegis Keflavík, hagani teir fara við Atlantsflog og til Føroyar. Kappróðrarfelagið NSÍ fegnast um heimsmeistaraheitið hjá Boga Olsen og um góðu úrslitini hjá hinum báðum rógvarunum úr felagnum, sum vóru við í kappingini í Boston. Talan er um systkini Kem og Ingu Weihe úr Lamba, sum stóðu seg væl, hóast tað ikki á hesum sinni rukku heiðursmerkjapallinum. Borgarstjórin og varaborgarstjórin í Runavíkar kommunu Tórbjørn Jacobsen og Helgi L. Petersen hittu heimsmeistaran á flogvøllinum í Reykjavík seinnapartin. Tá ið teir báðir borgarstjórin og varaborgarstjórin ikki eru heima, verður tað fyrrverandi borgarstjórin, Magnus Rasmussen, býráðslimur og løgtingsmaður, sum vegna kommununa fer at fagna rógvarunum. Eisini fara umboð fyri róðrarfelagið at siga nøkur orð. Almenna móttøkan verður í neystinum á Glyvrum klokkan 18.00 Vilmund Jacobsen 29.02.2016 (20:47) Toskur og hýsa á marknaðinum Nógv tær størstu nøgdirnar á uppboðssøluni í morgun vóru toskur og hýsa. Toskur fekk líkinda prís, tó at prísurin hevur verið betri fyrr í vetur - og prísurin á hýsu var fyri fiski-og útróðrarmenn ikki nøktandi. Sløk 100 tons vóru av toski, harav nógv mest var av toski 3, stívliga 42,3 tons tilsamans, sum fóru fyri miðalprísin 17,45 krónur fyri kilo. Næst mest var av toski 4, 26,5 tons tilsamans, sum fóru fyri miðalprísin 13,78. Stívliga 7,8 tons vóru av toski 1, og her var miðalprísurin 20,95 krónur fyri kilo. Sløk 19 tons vóru av toski 2, sum fekk miðalprísin 19,14. Samlaðu nøgdirnar av hýsu, sum seldar vórðu á Fiskamarknaði Føroya í morgun, vóru 54 tons, harav 4,1 tons var av hýsu 1, sum fekk besta miðalprísin, 14,61 krónur fyri kilo. Nógv mest var av hýsu 2, 28,4 tons tilsamans, og her var miðalprísurin 13,26. 19,2 tons vóru av hýsu 3, og her skuldi tað vísa seg, at hýsa 3 fekk betri miðalprís enn hýsa 2, nevniliga 13,78. Smærri nøgdir vóru eisini av brosmu, longu, kongafiski, havtasku og svartkalva á søluni hjá Fiskamarknaði Føroya í morgun, nøkur fá tons av hvørjum fiskaslagi sær. Tey tilsamans 184,3 tonsini, sum vórðu seld á uppboðssølu í morgun, fóru fyri stívliga 2,8 miljónir krónur, sum gevur ein miðalprís fyri øll fiskasløgini samanlagt á 15,36 krónur fyri kilo.

Vilmund Jacobsen 29.02.2016 (22:57) Pál Weihe leggur frá sær Í morgin - týsdagin 1. mars klokkan 15 - verður samkoma í Heilsu- og innlendismálaráðnum í samband við, at Sirið Stenberg, landsstýriskvinna, hevur valt nýggjan formann og nýggjar limir í Fólkaheilsuráðið. Á samkomuni verður tað fyrst Sirið Stenberg, landsstýriskvinna, sum fer at almannakunngera nøvnini á teimum, ið komandi árini skulu mynda Fólkaheilsuráðið. Tá Sirið Stenberg hevur avdúkað nýggja Fólkaheilsuráðið, og hvør nýggjur formaður verður, fer Pál Weihe, fyrrverandi formaður í ráðnum, at siga nøkur orð. Eisini fer nývaldi formaðurin at greiða frá sínum ætlanum á fólkaheilsuøkinum. Meting um tilfeingið fyri viku 9 2016 Friday, 26 February 2016 Samandráttur: Línuskip: Tey flestu línuskipini eru úti. Tvey eru farin til Íslands, meðan restin er undir Føroyum, men fiskarí er tíverri ikki nøktandi. Skipini fiska mest tosk, hýsu og so longu og brosmu. Vit vantað tvey ella trý skip koma at landa mánadagin og so koma fleiri seinni í vikuni. Onkur er nýliga byrjaður túr og kemur tí neyvan inn hesa vikuna. Okkurt línuskip sum fer avstað í næstum, fer helst til Íslands at fiska. Útróður: Streymurin verður góður og veðri verður eisini gott tað mesta av tíðina, so tí vantað vit nógvan útróður. Bátarnir fáa so at siga bara tosk og hýsu. Djúpvatnstrolarar: Tríggjir fiska upsa, men koma neyvan at landa í vikuni. Tveir eru á Flemish Kap. Onkur fer út í næstum. Partrolarar: Vit vantað at fleiri pør koma at landa í vikuni, men fiskaríið er framvegis vánaligt. Trolbátar: Ein er norðanfyri, tveir eru eystanfyri og trýggjir eru á Skeivabanka. Tann sum er norðanfyri fiskar tosk og hýsu, meðan hinir fiska havtasku. Trolbátarnir koma at landa miðskeiðis og síðst í vikuni Garnaskip: Tveir fiska svartkalva og koma helst at landa síðst í vikuni. Fiskaríið er brúkiligt Fmf.fo Valutanavn Nationalbankens middelkurs Australske dollar 488,87 Bulgarske leva 381,44 Brasilianske real 171,92 Canadiske dollar 505,19 Schweizerfranc 683,54 Kinesiske renminbi.yuan 104,56 Tjekkiske koruna 27,570 Euro 746,02

Britiske pund 949,38 Hong Kong dollar 88,13 Kuna 97,82 Ungarske forint 2,3970 Israelske new shekel 175,30 Indiske rupees 10,030 Japanske yen 6,0583 Mexicanske peso 37,680 Norske kroner 78,49 Newzealandske dollar 450,58 Polske zloty 171,33 Russiske rubel 9,0300 Svenske kroner 80,03 Singapore dollar 486,80 Thailandske baht 19,210 Tyrkiske lira 231,16 US dollar 685,18 Sydafrikanske rand 42,740 Danskebank.dk Andlát Jóhan Samuelsen, ættaður úr Sumba, búsitandi á Hamragarði í Vági, andaðist á Suðuroyar Sjúkrahúsi sunnudagin 28.februar, 92 ára gamal. Maria Louisa Magnussen, Miðvági andaðist sunnudagin 28. februar, 86 ára gomul. Asbjørn Poulsen, ættaður úr Miðvági, búsitandi í Hvide Sande, andaðist 24. februar, 68 ára gamal. Sólfríð í Króki andaðist á Landssjúkrahúsinum leygardagin 27. februar, 33 ára gomul.