Konf irmant 2019 Informasjon om konf irmasjonstida i Foldnes, Landro og Fjell kyrkje.
Velkommen til konfirmasjonstida i Fjell 2018-2019! Det nærmar seg konfirmasjonstid!. Vi i kyrkja held på å planlegge konfirmantåret, og gler oss til at du skal vere med! Kva er konfirmasjon eigentleg? Konfirmasjonstida heng saman med dåpen. I dåpen fekk du trua som gåve, og i konfirmasjonen får du moglegheit til å stadfeste at du vil leve i denne trua. Gud ønskjer også å stadfesta at han har omsorg for deg og elskar deg. Det ønskjer vi at du skal erfare i konfirmasjonstida. Konfirmanttida er eit år der du får vere med på mykje gøy, får anledning til å samtale og grunne på dei store spørsmåla i livet, og moglegheit til å bli kjend med mange nye ungdommar og vaksne. Dette kan bli eit år du seint vil gløyma! Individuell tilrettelegging Vi vil gjere det mogleg for alle som ønskjer det, å vere konfirmant. Det kan vere mange årsaker til at det kan vere vanskeleg å følgje det ordinære opplegget som er sett opp. Om det er funksjonshemmingar, sosiale vanskar, sjukdom, eller anna som gjer det utfordrande for konfirmanten å følgje opplegget, ønskjer vi svært gjerne å kome i kontakt med foreldre/føresette og konfirmanten slik at vi saman finn ei god løysing for konfirmasjonstida.
Undervisningssamlingar Alle konfirmantane får undervisning i den kyrkja dei tilhøyrer, og blir fordelte etter skule og barneskulekrins. Undervisninga er som regel rett etter skuletid. Har de spesifikke ønskje om kva gruppe konfirmanten skal gå i, eller kven han/ho skal gå saman med, kan ein sende dette på e-post til Beate Sørhus (beate.sorhus@fjell.kommune.no). Etter fristen 20. juni kan vi ikkje garantere at vi kan innfri desse ønskja. Undervisninga tek til i september. Interessegrupper Alle konfirmantane er med i ei interessegruppe i tillegg til undervisningssamlingane. I desse gruppene får konfirmantane vere ein del av ungdomsarbeidet og andre aktivitetar i kyrkja. Etter T14-dagen vil konfirmantane kunne registrere kva interessegrupper dei helst vil vere med i. I tillegg til nye interessegrupper vil desse gruppene vere Leir, TenSing Lukas, KRIK, Tweens+, Landroklubben, Lysmesse, Bibelgruppe m.m. Det kjem meir informasjon om desse gruppene på T14-dagen.
Gudstenester Gudstenesta er kyrkjelyden si storsamling. Gud møter oss, vi møter Gud og vi møter kvarandre. Konfirmantane skal delta på minimum åtte gudstenester i tillegg til konfirmasjonsgudstenesta i mai. På kvar gudsteneste skal konfirmantane fylle ut eit gudstenesteark for å registrere frammøte. Dette arket skal leverast til presten eller kyrkjevertane når gudstenesta er slutt. Vi oppfordrar foreldre/føresette til å slå følgje med konfirmanten til gudstenestene. Ung messe I løpet av året vil det bli arrangert fleire Ung Messe i kyrkjene. Dette er gudstenester spesielt tilpassa ungdom, og vi vil anbefale desse for konfirmantane. Ungdom er med i planlegging og gjennomføring av gudstenesta, noko som gjer at all musikk, forkynning og liturgi er meir ungdommeleg enn det vil vere på ei alminneleg gudsteneste. Lysmesse Søndag 9. desember skal nokre av konfirmantane vere med på å lage lysmesser i alle Fjell og Foldnes kyrkje. Dette er stemningsfulle gudstenester der alle konfirmantar og foreldre er særskild velkomne. Vi tenner lys i mørkret og les tekstar som fortel om yset som kom til verda. Ei flott adventsgudsteneste for heile familien.
Presentasjonsgudsteneste I september skal alle konfirmantane presenterast for kyrkjelyden i den kyrkja dei høyrer til. Alle konfirmantar må møte på si presentasjonsgudsteneste. Dette er ei heilt vanleg gudsteneste, men som ein del av forbøna blir alle konfirmantane lest opp og bedt for. På presentasjonsgudstenesta vil alle konfirmantane òg få utdelt ein bibel, som vi skal bruke i konfirmanttida. Fjell kyrkje: Søndag 9. september kl. 11.00: Kolltveit (Ekerhovd) og Tellnes. Søndag 23. september kl. 18.00: Skålevik (Algrøy/Syltøy), Knappskog og Ulveset. Foldnes kyrkje: Søndag 9. september kl. 11.00: Brattholmen og Hjelteryggen. Søndag 16. september kl. 11.00: Foldnes, Bjorøy og Liljevatnet. Landro kyrkje: Søndag 23. september kl. 11.00: Spjeld, Landro, Misje og Ågotnes. Konfirmasjonsgudsteneste Det vil bli to konfirmasjonsgudstenester på kvar av datoane (kl.10.30 og kl.12.30). Kva krins som kjem tidleg og seint på dagen, vil bli bestemt etter at konfirmantane er påmeldt og vi kan sjå kor stort konfirmantkullet er. Dette gjer det lettare for oss å fordele gruppene likt, slik at det blir best mogleg plass til familie og gjester i kyrkja på konfirmasjonsdagen. Fjell kyrkje: Søndag 5. mai Laurdag 11. mai Foldnes kyrkje: Laurdag 4. mai Søndag 5. mai Søndag 12. mai Landro kyrkje: Laurdag 11. mai Søndag 12. mai Kolltveit (Ekerhovd) Skålevik (Algrøy/Syltøy) Tellnes Ulveset Knappskog Foldnes Hjelteryggen Liljevatnet Brattholmen Bjorøy Landro Misje Spjeld Ågotnes
Arrangement T14 Kick-off! Torsdag 6. september kl. 18.00 i alle tre kyrkjene Konfirmantåret startar med ei høgtideleg og festleg samling i kyrkja di. Denne dagen er for både konfirmantane og foreldre. På T14 vil du få info om konfirmantåret og om alle dei ulike interessegruppene. T15 Storsamling Laurdag 6. april blir det ei storsamling i Foldnes kyrkje for alle konfirmantane i Fjell, Foldnes og Landro! Denne kvelden blir fylt med underhaldning, seminar, konsert, kiosk og god stemning! Fasteaksjonen Fasteaksjonen er Kirkens Nødhjelp sin årlege innsamlingsaksjon. Alle konfirmantane er med på å gå med bøsse i sitt nærområde søndag 7. april. Denne helga treng vi hjelp frå foreldre både på laurdag og søndag til mellom anna baking, praktisk hjelp og vakthald. Meir info om dette kjem på foreldresamlinga i januar/februar. T15 Wrap-up! Omlag ei veke før konfirmasjonen er det Wrap-up for alle konfirmantar og konfirmantlærarar i kyrkjene. Det blir underhaldning, kake og brus, og i ser tilbake på konfirmantåret saman. På slutten av kvelden inviterer vi alle foreldre/føresette til ei kort infosamling om konfirmasjonsdagen. Under denne infosamlinga vil konfirmantane få utdelt kappane dei skal bruke under konfirmasjonen.
Kontakt med heimen Foreldresamlingar Det blir nokre samlingar med foreldre/føresette i konfirmasjonstida: T14 Kick-off 6. september. Fokus på interessegruppene. Tema- og informasjonssamling i januar/februar. Fokus på Fasteaksjonen T15 Wrap-up i april. Kappeutdeling og info om konfirmasjonsdagen. Informasjon De vil få tilsendt viktig informasjon i Konfirmantposten som Kyrkjekontoret sender ut 4 gonger i løpet av året. På nettsida vår (www.kyrkja.no/fjell/konfirmant) skal det alltid ligge oppdatert informasjon. Semesterplan for undervisingsgruppene blir sendt ut til konfirmantar og foreldre/føresette i august og desember. Informasjonen vil hovudsakleg bli sendt ut via e-post, men påminning om viktige samlingar kan òg kome på sms direkte til konfirmanten og foreldre/føresette. Praktisk informasjon Økonomi Alle konfirmantane betalar ein kontingent på kr. 700,- Dette dekkjer utgifter i samband med undervisning og arrangement, og reingjering av konfirmantkappene. I tillegg til kontingenten kjem utgifter til interessegruppene. Prisen på desse vil variere. Dei som ikkje betalte ved påmelding vil få faktura i starten av konfirmantåret. Dersom du har vanskar med å betale, ta kontakt - så finn me ei god løysing for deg. Dåpsattest Er konfirmanten døypt andre stader enn i Fjell (Fjell, Foldnes eller Landro kyrkje), må de sende kopi av dåpsattest til oss, slik at det formelle er i orden. Dersom du ikkje har dåpsattesten tilgjengeleg, kan du bestille ein kopi frå kyrkja der konfirmanten er døypt. Dåpsattesten kan sendast som brev eller e-post, eller leverast til konfirmantlærar.
Ansvarlege for konfirmasjonstida Sokneråda er ansvarleg for konfirmantopplegget, og har vedteke konfirmantplanen for Fjell, Foldnes og Landro sokn. Kateketen, kyrkjelydspedagogen, prestane og andre konfirmantlærarar har saman ansvar for konfirmantundervisninga. Vi håpar dette informasjonsheftet gir svar på det meste omkring konfirmasjonstida som kjem, og inviterer til eit godt samarbeid mellom heim og kyrkje. Har de spørsmål eller innspel: ver frimodige og ta kontakt! Venleg helsing konfirmantteamet: Rannveig Vestbøstad Vik, Terje Aannerød, Bjarte Nese, Maria Tveten og Beate Sørhus Ta kontakt dersom det er noko du lurar på! Kyrkjelydspedagog Beate Sørhus Tlf: 55 09 74 63 / E-post beate.sorhus@fjell.kommune.no Besøksadresse: Temahuset, Tytebærbrekko 2, Straume. (2.etg., over Jysk) Opningstider: Måndag-fredag, kl. 10-14. www.kyrkja.no/fjell/konfirmant