Politi-kar frå Innvær

Transkript

1 Politi-kar frå Innvær Odd Harald Hovland stiller som Ap sin ordførarkandidat på Bømlo. Etter over 25 år med KrF, Høgre og Venstre i førarsetet meiner han det no er dags for at eit sosialistisk parti flyttar inn i første etasje i rådhuset. Den førre Ap-ordføraren på Bømlo var Bjarne Kristiansen så langt tilbake som i Etter å ha vore bømling i 25 år og lensmann ei årrekkje, er Odd Harald Hovland klar for nye oppgåver. Han stiller til val som Ap sin ordførarkandidat, og trur bømlingane fort vil oppleve at eit sosialistisk parti har overtatt ordførarstolen etter at dei borgarlege har dominert politikken i 26 år. Tekst: Frank G. Stenersen/Bømlo-nytt Det er snart 25 år sidan Odd Harald Hovland takka ja til eit vikariat ved Bømlo lensmannskontor. Han hadde då budd på Rjukan eitt års tid i lag med kona Laila Innvær Hovland. Etter planen skulle dei slå seg ned i Bergen, men slik skulle det ikkje gå. I dag kjenner dei fleste bømlingane Hovland frå avisspaltene der han iført uniform fortel om politiet sine årsstatistikkar, eller må svare for bemanninga i lensmannsdistriktet. Men privatpersonen Odd Harald Hovland og kva som engasjerer bergensaren er mindre kjent blant bømlingane. Eg plar seie eg kjem frå Ikea, då veit alle kvar eg meiner, smiler han. Hovland hadde oppveksten på Flaktveit ved Åsane. Reinaste bondelandet på den tida. Kort tid etter at han flytta heimefrå og tok til med med militærtenesta ved befalsskulen, skulle heile området bli ein stor drabantby. Det gjekk utruleg fort. Området er knapt til å kjenne igjen frå då eg budde der, seier firebarnsfaren.

2 Yngste dottera bur enno heime. Kona jobbar til dagleg i Bufetat og familien har derfor valt å vere fosterheim for ei åtte år gamal jente. Dei tre eldste fuglane har forlate reiret. Og no er eg til og med blitt bestefar, seier han nøgd. Samfunnsengasjert Ordførarkandidaten, som har vore lensmann på Stord sidan 2007, tar i mot lokalavisa for ein drøs i hagen heime på Innvær. Fleire dagar i veka syklar han til og frå arbeidsplassen i Leirvik sentrum, tre mil kvar veg, trygg på at det gir han eit større overskot til å takle ein travel kvardag som ektemann, far, politimann og politikar. Befal, lensmann og no ønskjer du å bli ordførar. Er det idealisme som ligg bak yrkesvala dine? Hovland drar litt på det, er kanskje litt redd for å framstå som svulstig overfor sambydingane, men stadfestar at han alltid har vore opptatt av å bidra til eit betre lokalsamfunn. Eg har vel aldri klart å halde fingrene av fatet og blir fort veldig engasjert, ler han. Men eg har nok alltid hatt ei generell interesse for samfunnsutvikling, eit engasjement som berre vart sterkare då eg fekk born, seier han vidare. Det var debatten om Svortland skule som førte til at han takka ja til å stille på Ap si liste. Han har no fire år bak seg som folkevald representant i Bømlo kommunestyre. Trur du bakgrunnen frå politiet vil vere ein styrke i ordførarvervet? Det vil i alle fall ikkje vere ein ulempe. I dette yrket får ein erfaringar som andre yrkesgrupper ofte er spart for. Me får sjå samfunnets fine og lyse sider, men møter også livets skuggesider i vår arbeidskvardag. Eg trur nok det er ei god ballast å ta med seg inn i rolla som ordførar, seier han.

3 Også åra som leiar for lensmannsetaten trur han vil vere ein fordel den dagen har tar på seg eit større politisk verv. Han har kursa seg i leiing og organisasjonsutvikling med fokus på offentleg sektor, og seier også det gav han eit godt innblikk den offentlege forvaltninga. - Behov for meir dynamikk I tillegg har dei fire siste åra i kommunestyret vore veldig lærerike. Det er mykje som skjer i politikken og mykje ein skal få med seg, så eg har enno meir å lære, seier han. Kva vil vere den største skilnaden på ein Høgre-ordførar og Ap-ordførar dei neste fire åra? Eg meiner det er behov for meir dynamikk i leiinga. Kommunen er i dag for mykje prega av vedlikehaldstanke, at me skal ta vare på det me har. Det er viktig, men me må samtidig sjå framover og leggje til rette for ei positiv utvikling av lokalsamfunnet, seier han. Som døme nemner han kommuneplanen, eit kommunalt styringsdokument som skulle vore vedteke for tre år sidan. I staden brukar koalisjonen no planen for alt den er verdt under valkampen. Det er ikkje bra at denne planen har blitt liggjande heile den siste valperioden, meiner Hovland. Han er heller ikkje imponert av framdrifta i næringssaker, og meiner kommunen bør ha fokus på å korte ned sakshandsamingstida. Også dette planarbeidet må gå raskare og meir dynamisk, meiner han. Ein mann, ein hatt Hovland seier han som ordførar ikkje ville tatt på seg for mange oppgåver utanfor rådhuset. Eg hadde nok vakta meg for å ta på meg for mange hattar, om det er styreverv i kommunale selskap eller andre oppgåver. Som ordførar

4 meiner eg det er viktig å syte for at ein er fri til å ta del i debatten. Då er det best å halde seg uavhengig og heller setje andre representantar inn i desse verva, meiner han. På same bakgrunn meiner han det er viktig med eit klart skilje mellom kommuneadministrasjonen og dei folkevalde. Administrasjonen skal trekkje konklusjonar på reint fagleg grunnlag, og kome med råd og lovlighetskontroll i høve dei enkelte vedtaka. Det er viktig med eit godt samarbeid, men minst like viktig at det er politikarane som har den politiske styringa av kommunen, seier han. Har du inntrykk av at det er for tette bindingar i rådhuset i dag? Det har eg ikkje grunn for å påstå, men etter 12 år med same ordførar kan det vere sunt med ei utskifting no. Det kan fort danne seg samarbeidsformer som, sjølv om dei ikkje er uryddige, langt frå er ein styrke for kommunen, trur han. Tydeleg ideologisk forskjell Sjølv valde han å gå inn i Ap etter å ha vurdert arbeidet partiet legg til grunn i kvardagen. Men han la også vekt på dei historiske linene i partiet som han meiner gir ein god peikepinn på korleis partiet ønskjer å utvikle samfunnet i framtida. Den største forskjellen mellom Ap og Høgre er at me ønskjer å styrke den offentlege helse- og omsorgstenesta innan offentlege rammer. Det er særleg viktig no som Samhandlingsreformen står på trappene. Ap ønskjer å vere ein garantist for ei god utvikling innan dei offentlege rammene, seier Hovland. Han er derfor lite imponert over dei borgarlege partia som opnar for private aktørar på helsemarknaden. Dette er jo ein tydeleg ideologisk forskjell mellom oss og Høgre. Problemet med private helsetenester er at kommunane likevel sit igjen med store utgifter. Kor mykje det kostar for kommunane å følgje med og

5 følgje opp dei private aktørane i kommunen kjem ikkje fram i anbodsrundane og er heller ikkje noko dei borgarlege partia ønskjer å snakke høgt om, seier han. Dersom målet er gode resultat, god styring, effektivisering og høg kompetanse er det fullt mogeleg å få det til innan offentleg sektor. Men det krev politisk og administrativ handlekraft, seier Hovland. Fleire lærlingar Han meiner også det må på plass minst ein offentleg barnehage på Bømlo i åra som kjem. Me ønskjer eit supplement til dei private barnehagane me har i dag. Med berre private aktørar har me berre høve til å få statstilskot. Med kommunale barnehagar kan me òg få kommunale tilskot til heilt andre satsar, seier han. Han peikar på at kommunen i dag ikkje har ein einaste lærling innan barne- og omsorgsarbeid, noko ein kommunal barnehage kunne ha bøta på. Det er viktig at me sikrar lærlingplass til våre eigne ungdomar. Per i dag har kommunen berre sju, det er altfor få. Men dei einaste som tener på private barnehagar er eigarane, og dei ønskjer sjølvsagt ikkje bruke pengar på lærlingar, seier ordførarkandidaten vidare. Hovland meiner det er vanskeleg å trekkje fram enkeltsaker å gå til val på. Han meiner det er det heilskapelege programmet som er Ap sin styrke. Ein klarar aldri å finne eit parti ein er 100 prosent samd med. Det er om å gjere å finne eit parti som deler syn i flest mogeleg saker, og som har ein heilskapeleg politikk og ønskje om samfunnsutvikling som ein sjølv. Det nyttar ikkje å melde seg ut og danne eige parti berre fordi ein blir usamd i enkeltsaker. Då hadde me hatt mange parti i kommunestyret, seier han og siktar til Dei kristne.

6 Tøffe prioriteringar Dei viktigste sakene for oss er næringsutvikling, arbeid og verdiskaping for å sikre at folk skal velje å bli eller flytte til Bømlo. Me må òg syte for ei god eldreomsorg og eit godt helsetilbod for innbyggjarane. Me veit at eldrebølgja er i kjømda, og oppgåvene som ventar vil krevje fleire tilsette enn i dag, seier han. Men fleire oppgåver og fleire tilsette samtidig som de ikkje ønskjer å privatisere. Kvar kjem pengane frå? Som alltid må det tøffe prioriteringar til. Me veit overføringane frå staten vil auke i samband med Samhandlingsreformen. Me seier heller ikkje at me vil fjerne eigedomsskatten, men vil jobbe hardt for å unngå å auke den. Det er ingen som ønskjer å krevje eigedomsskatt av innbyggjarane, men me gjekk heller aldri til val som garantist på at me ikkje skulle innføre eigedomsskatt, seier Hovland og sparkar mot Høgre.