Revisjonsordninga i Møre og Romsdal fylkeskommune, invitasjon til samarbeid med Kommunerevisjonsdistrikt 2 om revisjon

Transkript

1 saksframlegg Dato: Referanse: Vår saksbehandlar: /2013 Hans Blø Saksnr Utval Møtedato Kontrollutvalet Fylkestinget Revisjonsordninga i Møre og Romsdal fylkeskommune, invitasjon til samarbeid med Kommunerevisjonsdistrikt 2 om revisjon Bakgrunn I møte i kontrollutvalet den orienterte leiaren om at han hadde mottatt ein e-post frå styreleiaren i Kommunerevisjonsdistrikt 2 Møre og Romsdal, Torbjørn Rødstøl, datert , med førespurnad om mogleg samarbeid om/samordning av revisjonstenester mellom fylkesrevisjonen og distriktsrevisjonen. E-posten frå styreleiaren ligg ved. Følgjande vart ført i protokollen frå møtet i kontrollutvalet: Medlemmene drøfta saka, m.a. med bakgrunn i synspunkt frå fylkesrevisjonssjefen, og var samde om å få utgreidd eit ev. samarbeid m.v. med revisjonsdistriktet. Kontrollsjefen viste til koml. 78 og rådde til at ein først fekk klarsignal frå fylkestinget om ev. ønske om endring i revisjonsordning, noko medlemene slutta seg til. Det var semje om å få lagt fram ei sak for fylkestinget i april 2013 med bakgrunn i utgreiinga, der fråsegner frå involverte partar vart innhenta. Medlemmene oppmoda om at resp. kontrollutval i kommunar i revisjonsdistriktet sytte for tilsvarande avklaring i sine kommunestyre. Medlemmene meinte det i tillegg var naturleg å sondere om revisjonseininga ev. kunne utvidast vidare ut over dei aktuelle kommunane i distrikt 2. Styreleiaren vart orientert om protokollføringa ved epost av , likeeins fylkesordføraren og fylkesrådmannen ved epost av Kommunerevisjonsdistrikt 2 Møre og Romsdal omfattar 6 Romsdalskommunar (Molde, Vestnes, Rauma, Nesset, Aukra og Fræna) og 3 Nordmørskommunar (Sunndal, Gjemnes og Eide). Hovudkontoret er plassert i Molde, har 5 tilsette og blir leia av distriktsrevisor Sigmund Harneshaug (statsaut. revisor). Dei har 3 rekneskapsrevisorar og 2 forvaltningsrevisorar. Distriktet er organisert som eit interkommunalt samarbeid etter kommunelova 27, er eige rettssubjekt og har eit styre. Oppdragsporteføljen utanom kommunane omfattar alle kommunale føretak og interkommunale selskap som dei deltakande kommunane har eller er medeigar i. Omsetninga er i 2012 på brutto kr (avsetningar haldne utanom).

2 Side 2 Fylkestinget fastsette i sakt-4/04 kva revisjonsordning fylkeskommunen skulle ha, og har som kjent valt å ha eigen revisjon, fylkesrevisjonen, til å utføre alle revisjonsoppgåver etter lova for fylkeskommunen. Fylkesrevisjonen blir leia av fylkesrevisjonssjef Finn Åge Ødegård (reg. revisor), har 6 tilsette med 4 rekneskapsrevisorar og 2 forvaltningsrevisorar. Utanom fylkeskommunen har fylkesrevisjonen revisjon av Midt-norsk kompetansesenter for tannhelsetenesta IKS og Åknes/Tafjord Beredskap IKS. Brutto driftsutgift i 2012 var på kr Båe revisjonseiningar har avtale med private revisjonsfirma om revisjon av oppdrag på vegne av desse, for at dei tilsette kan få oppfylt krava til fornying av revisorautorisasjonen etter revisorlova. Oppdraga har avgrensa omfang i høve til dette formålet. Om saksbehandlinga av saka om revisjonsordning Etter kommunelova 78 nr 3 og 4 er det fylkestinget sjølv som avgjer kva revisjonsordning fylkeskommunen skal ha og tilset revisor, etter innstilling frå kontrollutvalet. Revisjonsordninga kan anten vere eigen revisjon, deltaking i interkommunalt samarbeid eller å inngå avtale med privat revisor (ved konkurranseutsetting). Det er høve til å splitte revisjonsoppdraget i resp. rekneskapsrevisjon og forvaltningsrevisjon på ulike aktørar. Interkommunale revisjonsordningar er dei mest vanlege revisjonsordningane i landet, som og mange fylkeskommunar er med i. I nokre fylke er dei fylkesomfattande (Nord-Trøndelag og Telemark), eller fylkesgrenseoverskridande (Troms og nordlege del av Nordland). Det normale er likevel distriktsrevisjonar med kommunar som tilhøyrer eit naturleg avgrensa område. Den vanlegaste organisasjonsforma er interkommunale selskap (IKS), men og interkommunalt samarbeid etter kommunelova 27 er og brukt. Berre eit fåtal kommunar og fylkeskommunar har eigen kommunerevisjon/fylkesrevisjon, men gjerne knytt til større kommuneorganisasjonar der revisjonseininga blir av ein viss storleik (Oslo, Trondheim, Bærum, Asker, Nordland, Møre og Romsdal, Akershus/Østfold, Aust- Agder, Vest-Agder m. fl.). Nokre kommunar/fylkeskommunar har valt private revisjonsfirma som leverandør av revisjonstenester, men desse utgjer framleis ein liten del av kommunemarknaden. Etter møteprotokollen gjeld denne saka å innhente fullmakt frå fylkestinget til å få utgreidd spørsmålet om ev. samarbeid om revisjonsordning. I fullmakta bør det gå fram kva mynde kontrollutvalet skal ha i så måte. Det bør dermed ikkje leggast opp til val av konkret revisjonsordning no, men at kontrollutvalet får mynde til å utgreie spørsmålet med ny sak for fylkestinget, med ev. tilråding om val av ny revisjonsordning ev. behalde noverande ordning. Prosessen fram må uansett leggast opp slik at alle aktuelle partar blir høyrt og deira rettar og plikter blir ivaretatt. Det er dermed i denne saka ikkje lagt opp til ei grundig utgreiing om fordelar, ulemper m.m. ved ulike revisjonsordningar, ettersom det er ei fullmakt til kontrollutvalet som først må på plass. Det er likevel slik at fylkesrevisjonssjefen og dei tilsette ved fylkesrevisjonen har rett til å uttale seg til sakstemaet, og delta ved behandlinga av saka i kontrollutvalet. Vedlagt følgjer eit notat frå fylkesrevisjonssjefen, datert 19. mars d.å., der han vurderer spørsmålet om ev. å gå inn i eit samarbeid om revisjonsordning med

3 Side 3 Kommunerevisjonsdistrikt 2 Møre og Romsdal. Det er innhenta fråsegn frå dei tilsette ved fylkesrevisjonen, som og ligg ved. Kontrollsjefen vurderer det som ønskeleg å høyre fylkesrådmannen sitt syn på spørsmålet om endra revisjonsordning, og har bedt om slik fråsegn. Ved avslutting av saka er den ikkje mottatt, men vil ev. bli lagt frå i møtet. Ev. utvida samarbeid om revisjon med andre revisjonsdistrikt I protokollen frå møtet i kontrollutvalet den var og følgjande passus teke inn: Medlemmene meinte det i tillegg var naturleg å sondere om revisjonseininga ev. kunne utvidast vidare ut over dei aktuelle kommunane i distrikt 2. Etter det kontrollsjefen kjenner til har det vore kontakt mellom revisjonssjefane i fylket om ev. samarbeid om revisjonstenester. Det har medført at styret i Distriktsrevisjon Nordmøre IKS (omfattar resterande 8 kommunar på Nordmøre) og Kommunerevisjonsdistrikt 3 Møre og Romsdal IKS (omfattar 12 kommunar på Nordre/Indre Sunnmøre inkl. Midsund og Sandøy) båe har gjort vedtak om å delta i drøftingar om samarbeid. Likeeins har styret i Kommunerevisjonsdistrikt 2 tatt initiativ til å utvide samarbeidet om revisjon også til øvrige distrikt. Intimasjonen i vedtaka i representantskapa/styra er førebels ikkje blitt ført vidare i konkrete forhandlingar. Kontrollsjefen er ikkje kjend med om det er gjort liknande vedtak i styrande organ i Søre Sunnmøre kommunerevisjon IKS (omfattar 7 kommunar på Søre Sunnmøre). I fall det er aktuelt å få utgreidd ei utviding av revisjonsdistriktet utover det det er tale om i denne saka, blir det eit arbeid av eit heilt anna og vesentleg større omfang. Kort om innhaldet i notatet frå fylkesrevisjonssjefen og fråsegnene Fylkesrevisjonssjefen har i sitt notat tatt for seg fordelar og ulemper ved ulike organisasjonsmodellar, men meiner at å fortsette med eige revisjon er det beste for fylkeskommunen, jamvel om han meiner eit interkommunalt samarbeid og vil kunne fungere godt. Det breiare fagmiljøet i ei større eining blir framheva som ein fordel samanlikna med å halde fram med ei eiga revisjonseining. Det blir spesielt vist til at lønsnivået blant revisorane i distrikt 2 er om lag 25% høgare enn tilsvarande hos fylkesrevisjonen, som i tilfelle kan medføre ein auka revisjonskostnad for fylkeskommunen. I fråsegna frå dei tilsette ved fylkesrevisjonen gir dei støtte til notatet frå fylkesrevisjonssjefen, men peiker på viktige omsyn som må ivaretakast i den vidare prosessen. Også dei tilsette viser til lønsskilnadene mellom revisjonseiningane, som i tilfelle må utjamnast for at dei tilsette skal gå inn for ei samanslåing. Dei meiner og at ein av faglege omsyn bør sjå om fleire revisjonseiningar kan bli med i ei større eining. Vurdering Revisjon er ikkje noko mål i seg sjølv, men eit verkemiddel for å nå mål. Revisjonen skal vere uavhengig og objektiv, men på sin måte medverke til at fylkeskommunen når sine mål. I tillegg er revisjonsordninga eit viktig instrument i den folkevalte kontrollen med forvaltninga og ivaretar dermed ein sentral funksjon i

4 Side 4 det som ligg i den demokratiske forfatningstradisjonen i landet vårt. Det folkevalte nivået må på sjølvstendig basis ta avgjerd om på kva måte revisjon, tilsyn og kontroll skal organiserast på. Det er mange ulike omsyn som må utgreiast og vurderast i val av revisjonsordning, som det ikkje blir gjort forsøk på her. Det er mange faglege argument for/imot ulike løysingar, men og i høve til fylkeskommunens rolle som regional utviklar. Dei berørte partane skal medverke og høyrast, og rettar og plikter ivaretakast i prosessen. Kontrollutvalet må i så måte få fullmakt til å fastsette eit mandat for ei utgreiing, velje utgreiingsmåte og fastsette framdrift. Det ligg i korta at kontrollutvalet skal foreslå for fylkestinget val av løysing, og i tilfelle framforhandle og legge fram til godkjenning ev. avtale/selskapsvedtekter m.m. om deltaking i eit interkommunalt samarbeid om revisjon. Jamvel om det i dette tilfelle er snakk om ev. samarbeid med kommunane i distrikt 2, har kontrollutvalet sagt seg positiv til å vurdere å delta i ei enno større eining. Dersom ein ser for seg ein nær fylkesomfattande revisjonsorganisasjon med deltaking frå eit fleirtal av kommunane og fylkeskommunen, blir det ein tung fagleg aktør som representerer eit unikt revisjonsfagleg miljø som ein berre finn i dei større revisjons- og konsulentselskapa. Ein slik kunnskapsorganisasjon kan vere til god hjelp for våre mange mindre kommunar, og utgjere kompetansearbeidsplassar av stor verdi for fylket. Faren er at organisasjonen blir (for) stor og mektig, nærast ein lokal riksrevisjon. Dersom ei meir fylkesomfattande løysing/revisjonsordning er aktuelt å utgreie, er det tale om ei mykje meir kompleks oppgåve og ein vesentleg større ressursinnsats. I tilfelle bør arbeidet organiserast som eit prosjekt og særskilte midlar løyvast, og ev. bli utført av utanforståande, m.a. for å sikre distanse til problemstillingane. Medverknad frå (eller i regi av) KS lokalt kan her vere aktuelt. Alternativet med konkurranseutsetting av revisjonen er ikkje sett fram som ønske av nokon, og ikkje blitt vurdert her. Avslutning/konklusjon Kontrollsjefen oppfattar protokollføringa i møte slik at kontrollutvalet ønskjer å få utgreidd spørsmålet om samarbeid med Kommunerevisjonsdistrikt 2 om revisjon, og ev. å få undersøkt om samarbeidet kan omfatte fleire kommunar/distrikt. Det er sjølvsagt eit alternativ allereie no å slå fast at ein ønskjer å halde fram med noverande ordning, dvs. eigen fylkesrevisjon. I så fall treng ikkje saka gå vidare til fylkestinget. Kontrollsjefen har i sitt forslag til tilråding tatt utgangspunkt i kontrollutvalet sitt uttalte ønskje. Forslag til vedtak: 1. Fylkestinget gir kontrollutvalet fullmakt til å greie ut alle sider ved å inngå i eit interkommunalt samarbeid med kommunane i Kommunerevisjonsdistrikt 2 om felles revisjonsordning. Kontrollutvalet kan framforhandle avtaleverk og andre tilhøve for å få etablert revisjonsordninga, og leggje resultatet fram for fylkestinget til godkjenning. 2. Dersom det er ønske frå andre kommunar/revisjonsdistrikt om å slutte seg til den interkommunale revisjonsordninga, gir fylkestinget kontrollutvalet fullmakt til å innlemme desse i forhandlingane. Kontrollutvalet vurderer i tilfelle på kva

5 Side 5 måte dette best kan skje, ev. ved ekstern hjelp, slik at prosessen kan ivaretakast på best mogleg måte. Hans Blø kontrollsjef Vedlegg 1 Epost frå styreleiar Torbjørn Rødstøl, Kommunerevisjonsdistrikt 2 Møre og Romsdal, datert Notat frå fylkesrevisjonssjefen, datert Fråsegn frå dei tilsette ved fylkesrevisjonen, datert