Årsmelding LillCanto

Transkript

1 Årsmelding 2007 LillCanto

2 Styre og «stell» i LillCanto 2007 Egil H. Tverberg, leiar Petter Brodal, nestleiar Elin Ramsgaard. kasserar Ellen Marie Velle, sekretær Hilde Bergersen Ådland, styremedlem Dirigent: Natalia Eliseeva Fest- og arrangementskomité: Torbjørn Ellingsen, Dagfinn Larsen, Ulla Tronvoll Revisor: Ulf Hoppe Materialforvaltar: Kathrine Økstad Loddsal: Ada Fosse Ekstrøm Valkomité: Bård Ivar Saur, Kristin Heldor Martinsen, Randi Antonsen Varamedlem til styret: Annie Selle Framsideillustrasjon: LillCantos jule-cd 2007

3 Året med LillCanto Januar Året 2007 starta for LillCantos del med medlemsmøte på første øvingsdag. Her var det både evaluering av året som var gått, og orientering om planane for det som skulle koma. Møtet blei godt motteke av medlemene, og ser no ut til å bli ein tradisjon ved starten av kvart år. I slutten av månaden hadde LillCanto fått den store æra å vera med på Nyttårscantat. Dette årvisse arrangementet frå Norges Korforbund Oslo-Akershus var denne gong lagt til Lillestrøm kirke, vår «heimearena», den 28. januar. Lillcanto blei vald ut saman med sju andre kor frå Oslo og Akershus, mens det var heile fjorten kor som hadde meldt si interesse. Dei som var med i tillegg til LillCanto var Akademisk korforening, Kløfta Sangerlag, Nesodden Sangkor, Oslo Telefonikerne, Kor Aktivum, Kor Uten Navn og Grorud Mandskor. Vi i LillCanto presenterte stoff frå jubileumskonserten for Mozart vi hadde hausten 2006, noko som blei godt motteke av publikum og dei andre kora. Februar Årsmøtet for 2007 blei halde måndag 12. februar utan kontroversielle saker på agendaen, så årsmøtet gjekk unna på rekordtid. Det viktigaste som skjedde på møtet var å takka avtroppande leiar Torbjørn for godt utført arbeid i mange år på rad som leiar. Heilt til siste slutt som leiar hadde Torbjørn levert inspirerande og fantasifulle bidrag til LillCantos arbeid. Dette lovde han å halda fram med, om enn i mindre målestokk, som nyvald medlem av festkomiteen og som initiativtakar til Pilegrimskonserten vi skulle ha hausten To andre som bør nemnast frå årsmøtet er Tor-Ove og Bjørn, som også takka for seg etter fleire år i styret, der dei har levert ein upåklageleg innsats! Mars Første vårmånad i året starta for LillCanto sin del med seminar og tilhøyrande fest. Seminaret var på Vigernes skole, der Georg Reiss fekk første inntrykk av korleis vi låg an før konserten med Magnolia jazzband i Lillestrøm kirke 11 mars. Det var dessverre ikkje alt vi hadde like godt tak på så kort tid før konserten, men Georg tok det med stoisk ro. Konsekvensen blei likevel at det blei gjort nokre endringar i repertoaret for Magnoliakonserten, noko som viste seg å falla heldig ut til slutt. Laurdagskvelden etter seminaret var det fest i Teaterkjelleren i Lillestrøm Kultursenter. Dette var ei fest med innlagt Vorspiel, der Ulf hadde regien. Tema for Ulfs lysbileteframvising var heimlandet Tyskland og potensielle reisemål der. LillCanto hadde nemleg bestemt seg for å ta til utlandet i sitt 25. år, 2008, og som eit land med stor kulturell historie peika Tyskland seg ut som ein fullverdig kandidat. Ulf gav eit engasjerande og lærerikt innblikk i kva ulike områder i Tyskland har å by på, med særleg hovudvekt på området rundt Berlin. Det var mange byar som vi alle fekk lyst til å besøka, men på dei få dagane vi

4 har til turen vår måtte det gjerast eit utval. Reisekomiteen som har Reidun, Ada og Ulf som permanente medlemer fekk jobben å sjekka ut kva som var praktisk mogleg, og har etter dette gjort ein framifrå jobb med å få bestemt reisemål, Weimar, ordna påmelding, tinga flyreiser og reservert hotell. Før vorspielet var heilt over, kunne Torbjørn presentera opptak frå heimestudio av nokre nye julesongar som han hadde komponert. Alle som høyrde det var mektig imponert, både av melodiar og tekst, og av fin song frå Hilde og Kristin. Torbjørn hadde rundt årsskiftet lansert ideen om at LillCanto skulle gi ut ein jule-cd jula 2007, og det var tydeleg på det som vi fekk høyra denne kvelden at dette kunne verta ei knallbra plate! Så var det klart for fest med både varme og kalde rettar frå buffeen. Det var dans til musikk frå boks, der korets danseløver fekk svinga seg på sitt beste vis, mens dei av oss som ikkje har like mykje å stilla opp med på parketten likevel fekk sjansen til å trakka dansepartneren sin litt på tærne... Festkomiteen hadde også fått ordna til ein musikkquiz, og med kaffi og avec blei konkurranseinstinktet vekt i koret. Kven som var på vinnarlaget skal vera usagt, men det var som vanleg tett mellom laga. Og som eit deja vu frå LillCantos 15-årsjubileum toppa tantene frå Amerika kvelden med sin fantastisk morosame song til «konfirmanten» LillCanto. Sundag 11. mars var det tid for den tradisjonelle jazzkonserten med Magnolia jazzband i Lillestrøm kirke. Av dei verka vi hadde med denne gongen var nok «Almighty God» og «Come Sunday» frå Duke Ellingtons «Sacred Concerts» dei som sette LillCantos kunstnariske kvalitetar mest på prøve. Men sjølv om desse hadde gitt oss utfordringar gjennom øvingsperioden greidde vi, med god hjelp av Natasja, å heva oss til vårt beste nivå, slik at vi fekk mykje gode tilbakemeldingar frå publikum på framføringa av desse. Kanskje dei kan bli aktuelle å ta opp igjen i 2009, då det er 20-årsjubileum for Magnoliakonsertane i regi av Lillestrøm menighet? April I april låg det an til at LillCanto skulle opptre to gonger, noko som ikkje er vanleg for LillCanto i april. Laurdag 15. april skulle vi presentera oss under Skedsmo kommunes kulturmingling i Lillestrøm Kultursenter, men dessverre måtte arrangøren avlysa på grunn av for få påmeldte av kommunens kulturkrefter. Dermed gjekk vi glipp av sjansen til å promotera oss, og til å rekruttera fleire til koret. Måndag 23. april stod det dugnadssynging på programmet. Strømmen sparebank har jamleg såkalla Seniortreff på Velferden i Strømmen, og denne måndagen hadde dei hyra oss inn til å opptre. Vi hadde fått med oss Georg Reiss og Morten Gunnar Larsen, og framførte delar av programmet frå jazzkonserten i mars. Pensjonistane var nok ikkje alle klare over at her var det ein verdskjend jazzpianist som akkompagnerte eit lokalt amatørkor, men vi fekk godt med applaus for konserten vår - sjølv om det var lågt under taket i lokalet, og oppvarmingsrommet nok hadde romtemperatur nærare 30 grader enn 20.

5 Mai I perioden etter Magnoliakonserten i mars hadde vi begynt å øva på mellomaldermusikk, som skulle vera tema for konserten Pilegrim i oktober. Men i mai blei det også brukt ein måndag til å utføra dugnad for Sosial- og helsedirektoratet på Oslo Plaza. Vi pakka kursmateriell til ein landsomfattande konferanse, og det var bra oppmøte frå koret. Med erfaring og innsatsvilje gjekk jobben unna i ein fart, ja det var faktisk slik at vi var så godt som ferdige før arrangørane kom med maten som dei hadde ordna til oss. Dei var godt nøgde med arbeidet vårt, og sa at det var gode sjansar for at vi fekk fleire oppdrag. Flott levert av koret! Juni Som avslutning på vårsemesteret tok LillCanto ut på tur på og rundt Mjøsa. Her blei det både båttur med Skibladner, samt omvisingar på Maihaugen på Lillehammer og på Domkirkeodden i Hamar. Turen skulle starta laurdag morgon med busstur frå Lillestrøm til Eidsvoll. Som vanleg når LillCanto arrangerer helgeaktivitetar så var det strålande solskin frå skyfri himmel. Medan vi venta på bussen utanfor LVGS blei ei av dei påmeldte, Hilde, kapra og ført vekk av ei veninne her var det nemleg snakk om utdrikkingslag for vår kjære alt som skulle gifta seg seinare på sommaren. Men vi andre blei frakta trygt til Eidsvoll for å borda gode gamle Skibladner. Frå Eidsvoll skulle «Mjøsas hvite svane» frakta oss til Gjøvik. Ombord fekk vi ikkje servert jordbær og fløyte, men vi blei traktert med ein lett frukost og oppkvikkande drikke. Oppe på soldekket sat LillCantistane tett i tett for å nyta varmen og den flotte utsikta. Og sjølvsagt blei Prøysens «Så seiler vi på Mjøsa» framført. Frå Gjøvik tok bussen oss til Lillehammer der turen gjekk rett til dei Sandvigske samlingane på Maihaugen. Etter kaffi og litt å bite i servert ute på steinbord starta vi på omvisinga. Det var mykje gamalt og fint å sjå på, men opplevinga blei noko skjemma av at ikkje alle guidane hadde fullgod kunnskap om det dei hadde å visa fram. Berre på gardstunet Bjørnstad var det ei ung jente som imponerte med kunnskap og levande framføring av historia til gardstunet.

6 Når bussen så tok oss sørover til Hamar der vi sjekka inn på Victoria hotell, var Domkirkeodden neste mål på turen. Den fantastiske glaskatedralen som er bygd over domkirkeruinane gav eit imponerande inntrykk. Og guidinga her var også av høg klasse. Inne under glastaket fekk vi ein minikonsert berre for oss, før vi fekk grundig innføring i vekst og fall for domkyrkja på Hamar, og for biskopens borg som låg rett ved. Det blei fortald både om munkar og prestar som la grunnlaget for domkyrkja på 1100-talet, og om lokale bønder som henta bygningsstein frå ruinane av domkyrkja som ikkje blei så høgt verdsett i hundreåra etter reformasjonen. Etter omvisinga var vi invitert til middag i Hamarstua, restauranten på Domkirkeodden, og glade korsongarar fekk nyta både superb mat og smakfull vin før turen gjekk tilbake til Hamar sentrum og hotellet. Her hadde vi ein riktig triveleg kveld med både allsong og oppgåveløysing, og dei siste natteramnane heldt på til dei tidlege morgontimar. Men alt har ein ende, så etter hotellfrukost sundag morgon var det Noregs Statsbaner som fekk det prestisjefylte oppdraget å føra LillCanto heimatt til sitt kjære Lillestrøm. Juli Midt i LillCantos sommarferie var det ei av altane som besøkte Lillestrøm kirke for å seia ja til sin utkåra. Hilde og Thomas hadde lagt sin store dag til datoen 07/07/07, sikkert for å gjera det enkelt for Thomas å hugsa bryllaupsdagen i åra som kjem... LillCanto var også til stades med songsolist, gratulantar, gåveutdelarar og fotograf dei første bryllaupsfotoa var å finna på LillCantos heimeside berre timar etter storhendinga. August-oktober Haustsemesteret bar preg av årets store evenement for LillCanto, konserten med tittel «Pilegrim». For å gi eit godt musikalsk grep på temaet hadde vi knytt til oss Vegard Lund, ekspert på mellomaldermusikk og virtuos på lutt med fleire plateinnspelingar bak seg. Konseptet for konserten var ei pilegrimsreise frå Oslo til Nidaros og Heilag Olavs katedral rundt Pilegrimsleia gjekk jo også

7 gjennom Skedsmo, slik at vi kunne få ein lokal vinkling på historia. Jan Ove Ekeberg hadde skrive ein flott tekst som skodespelaren Liv Hege Nylund gjorde til ei levande framstilling av ei enke som tok ut på den strevsame turen til Nidaros for å be for sine avdøde, mann og born. Turen gjekk over Nitsundet og via Hamar oppover Gudbrandsdalen til haustkulde på Dovre før ho kom fram til målet. Mellom historiene som ho fortalde frå reisa nordover framførde LillCanto illustrerande musikkstykke saman med instrumentalensemblet leia av Vegard på lutt, med Elizabeth Gaver på fiddle, Paulina Fred på fløyter og Martin Nordrum Kneppen på slaginstrument. Som songsolistar skulle vi ha med Per Andreas Tønder og Marit Solstrand, men dessverre måtte Per Andreas melda avbod berre få dagar før konserten. Heldigvis var Marit sporty nok til å ta på seg det som Per Andreas skulle synga, så det blei eit vellukka resultat likevel. Også Romerikes blad synest resultatet var flott, for omtalen konserten fekk i avisa dagen etterpå er vel ein av dei beste LillCanto nokon gong har fått. Undervegs til målet som var konserten i Lillestrøm kirke sundag 14. oktober hadde vi eit laurdagsseminar på Vigernes skole, pluss ein minikonsert i september. Vi var nemleg så heldige at vi hadde blitt invitert til å vera med på Kor-i-lia og Rælingen sanglags haustkonsert til inntekt for NRKs TV-aksjon. Så torsdag 20. september stilte vi i Øvre Rælingen kirke med Vegard som vikardirigent sidan Natasja var oppteken denne kvelden. Slik fekk vi sjansen til å framføra litt av programmet frå Pilegrim, og kanskje fekk vi lokka nokre av tilhøyrarane til konserten vår ein knapp månad seinare? Nemnast må også at prosjektet hadde si eiga side på Internett der det var informativ og utfyllande informasjon om konsertprosjektet. Det var Torbjørn, initiativtakar og leiar for prosjektet som stod bak denne sida fersk nettside-freak etter innkjøp av ny Mac-datamaskin. Eit verkeleg flott tiltak som mange sette stor pris på. Opptak av konserten blei også gitt ut på CD til sal i koret, noko som både gav litt ekstra inntekter til prosjektet, pluss at det gav dei som var med eit minne å ha til sidan. Oktober-desember Rett etter Pilegrim-konserten var det å gyva laus på repertoaret for julekonserten. I tillegg skulle dei to månadane fram til konserten også brukast til å spela inn LillCantos jule-cd, så programmet var tøft! Men det første som skjedde etter haustkonserten var at vi kunne gratulera Elin og Rune med sin førstefødde, som har fått namnet Lina Aurora.

8 Etter som mora rapporterer er songboka som koret i samsvar med tradisjonen gav den nyfødde i full bruk. Bra! Om vi enn hadde eit tøft program fram mot julekonserten så takka vi ja då Sosial- og helsedirektoratet nok ein gong spurde om vi kunne stilla til dugnad ein måndagsettermiddag, denne gong på Thon hotell ved Varemessa, så det var ikkje langt å reisa til dugnaden. Det var same jobb som sist, og rask og effektiv innsats av dei som stilte talrike frå koret gjorde at me rakk å bli ferdige til øvingsstart og plateopptak. Som vanleg hadde arrangøren problem med å skaffa til vege alt som skulle pakkast, så her kunne lett jobben gått endå fortare! Nytt denne gongen var at morgonen etterpå var det to-tre frå koret som stilte for å dela ut materialet og namneskilt til kursdeltakarene. Vi håpar på at vi får fleire jobbar som dette, og takkar Astri Teien som skaffar oss desse jobbane. Julekonserten 2007 skulle ha mykje av dei tradisjonelle julesongane, men det som vi såg mest fram til var å få presentera Torbjørns nykomponerte julesongar for publikum, både på plate og konsert. Natasja hadde tatt på seg oppdraget å arrangera nokre av dei for koret, og ho leverte eit godt arbeid der. Etter kvart som innøvinga gjekk sin gang, tok vi også enkelte øvingar i bruk til opptak. Her blei Lillestrøm kirke brukt til opptak av dei gode gamle julesalmane, og opptaka gjekk rimeleg greitt. Det kunne alltid vore kjekt med meir tid til å perfeksjonera opptaka, og med unge Lillestrømlingar som råna forbi utanfor i Storgata var det ikkje alltid det hjelpte å synga aldri så fint. Men vi kom i mål her òg! Til å ta opptak av Torbjørns songar hadde vi leigd plass i eit lokalt studio på Vigernes. Der sat Terje Kingsrød og Torbjørn bak spakane ein søndags ettermiddag, mens frivillige frå kvar av stemmegruppene i koret gjorde sitt beste for å få Natasjas arrangement overført til harddisk. Det var nok fleire som følte det litt som dei var med på Idol der vi stod med øyretelefonar framfor mikrofonane... Etter miksing av plata fekk vi hjelp av Tone-Lises mann, Morten, til å «mastra» plata, før det var klart for å trykka opp 200 eksemplar av CDen «Vi går i vinternatt». Salet av plata gjekk veldig bra, så det siste eksemplaret gjekk ut i romjula, og blei i følgje rykta faktisk seld vidare på svartebørsen for 200 kroner (ordinær utsalspris var 150 kroner)! I samband med julekonserten vår hadde Romerikes blad meir enn ei heilside om plata vår, med tre generasjonar Bergersen som ramme for

9 artikkelen. Her hadde også Jan Rudolf Pettersen tatt for seg CD-en, og vi og Torbjørn spesielt har grunn til å vera nøgd med at han gav terningkast 4! Av ting som han nemnde kan vi sitera: «Solistene, både barn og voksne, synger fint. Koret er med her og der med et velklingende bakgrunnsteppe. Soprangruppa skinner virkelig flott i flere av sangene.» og «'Fra fjord og fjære' og 'Deilig er jorden' klinger slik vi kjenner koret fra sine beste konserter.» Julekonserten 9. desember blei ein kunstnarisk suksess. Vi hadde først ein avdeling med julesalmar av den tradisjonelle typen, der vi også hadde hjelp av Børre Velsrud på orgel og Kristine Aksøy Alveng som las frå Tor Åge Bringsværds «De hellige tre narrer». Siste del av konserten framførde vi fire av Torbjørns songar, med Kristin og Hilde som solistar, og med akkompagnement av klaver (Torbjørn), bass (Stig Inderberg) og gitar (Egil Magne Hjelanes). Så, heilt til slutt inviterte vi publikum til å synga med på «Deilig er jorden», og då var det nok mange både i koret og nede i kyrkjebenkane som hadde ein stor klump i halsen. Reaksjonane frå tilhøyrarane etter konserten var overstrøymande. «Det beste LillCanto har gjort» var det fleire som uttrykte, og ikkje minst Torbjørns julesongar fall i god smak! Som avslutning på 2007 var det endå to oppdrag att etter julekonserten. Sundagen etterpå var vi med på Lillestrøm menighets «Vi synger julen inn», der vi også song i felleskor med Lillestrøm damekor. Og dagen etterpå var vi på LIBOS og song julesongar for og med dei eldre pleietrengande der. Det er alltid kjekt å få opptre for desse seniorane, og sidan vi ikkje hadde fått til å gjera dette i vårsemesteret var det ekstra fint å få synga jula inn på LIBOS. Takk også til Kristine Aksøy Alveng som var vikar for Natasja. Etter at songen var slutt samla vi oss på Jekyll & Hyde for juleavslutning med mat og prat; også eit koseleg arrangement som opptakt til julefeiringa.

10 Repertoar 2007 Nyttårscantat, Lillestrøm kirke, søndag 28. januar LillCanto, dirigent Natalia Eliseeva Jubilate Deo, W. A. Mozart Abendruhe, W. A. Mozart Voggesong, W. A. Mozart. Nynorsk tekst og arr: Olav Ve Unsere kleine Nachtmusik, W. A. Mozart, basert på Eine kleine Nachtmusik av W. A. Mozart. Tekst og arrangement av Lorenz Maierhofer Magnoliakonsert, Lillestrøm kirke, søndag 11. mars Magnolia Jazzband og LillCanto, dirigent Natalia Eliseeva Go tell it on de mountain, arr. H.T. Burleigh Almighty God, Duke Ellington Oh, Freedom, Per Indrehus Give me a clean heart, Margaret Doureux Come Sunday, Duke Ellington Go down Moses We Shall Walk Through the Valley in Peace, John Purifoy Bred dina vida vingar, Skånsk folkmelodi Free At Last Seniortreff, Strømmen sparebank, Velferden på Strømmen, mandag 23. april LillCanto, Georg Reiss (klarinett), Morten Gunnar Larsen (piano) Come Sunday, Duke Ellington Oh, Freedom, Per Indrehus Go down Moses Give me a clean heart, Margaret Doureux We Shall Walk Through the Valley in Peace, John Purifoy Høstsang, Øvre Rælingen Kirke, torsdag 20. september LillCanto, dirigent og lutt Vegard Lund Mariam Matrem Virginem (1) Ubi Caritas, Maurice Duruflè, op. 10 Stella Splendens (1) Felleskor, dirigent Finn Evensen Slavekoret fra Nebukadneser, Guiseppe Verdi

11 Pilegrim, Lillestrøm kirke søndag 14. oktober LillCanto, dirigent Natalia Eliseeva, Marit Solstrand (sopran), Vegard Lund (lutt), Elisabeth Gaver (fiddle), Paulina Fred (fløyter), Martin Nordrum Kneppen (perkusjon), Liv Hege Nylund (resitasjon), tekst av Jan Ove Ekeberg. St. Halvard Hymne Los Set Gotx Recomptarem (1) Mariam Matrem Virginem (1) La Seste Estampie Real (instrumental) Gaudete (2) Skriva jag mig föresatt (2) Voggesong frå Gudbrandsdalen, arr. Per Indrehus Insignis est fugura (2) Stella Splendens (1) Stabat Mater, G.M. Nanino ( ) Ubi Caritas, Maurice Duruflè, op. 10 Lux Illuxit St. Olavs hymne Laudemus Virginem (1) (1) fra Libre Vermell (Den røde bok), 1300-tallet (2) Fra Piæ Cantiones 1582 Vi går i vinternatt, Lillestrøm kirke, søndag 9. desember LillCanto, dirigent Natalia Eliseeva, Børre Velsrud (orgel), Torbjørn Ellingsen (klaver), Stig Inderberg (bass), Egil Magne Hjelanes (gitar) Julefantasi, Glade jul Ludvig Nielsen ( ), Opus 12 Nå tennes tusen julelys, Emmy Köhler Kimer i klokker, Grundtvig/Stralsund Fra fjord og fjære, Zincks koralalbum Et barn er født i Betlehem, Lucas Lossius De hellige tre Narrer, Tor Åge Bringsværd, opplesning ved Kristine Aksøy Alveng Jul, jul strålande jul, G. Nordqvist/E. Evers Stille Nacht, Franz Grüber Mitt hjerte alltid vanker, H.A. Brorson, solist: Kristin Heldor Martinsen Det hev ei rosa sprunge, Michael Prätorius Å, du herlige / O,Sanctissima, Folketone Joy to the World, G.F. Händel Julemotet, Eyvind Alnæs, Solister: Kristin Heldor Martinsen og Kristine Aksøy Alveng Snøfnugg, Torbjørn Ellingsen, Solist: Kristin Heldor Martinsen Julenatt, Torbjørn Ellingsen, Korarr. Natalia Eliseeva,

12 solist: Hilde Bergersen Ådland Klokkeklang, Torbjørn Ellingsen, Korarr. Natalia Eliseeva, Solist: Kristin Heldor Martinsen Vi går i vinternatt, Torbjørn Ellingsen, Korarr. Natalia Eliseeva, solist: Hilde Bergersen Ådland Deilig er jorden, B.S. Ingemann, arr. A. Öhrwall Vi synger julen inn, Lillestrøm kirke, søndag 16. desember LillCanto, dirigent Natalia Eliseeva, Børre Velsrud (orgel), Torbjørn Ellingsen (klaver), Stig Inderberg (bass), Egil Magne Hjelanes (gitar) Kimer i klokker, Grundtvig/Stralsund Stille Nacht, Franz Grüber Klokkeklang, Torbjørn Ellingsen, Korarr. Natalia Eliseeva, Solist: Kristin Heldor Martinsen Vi går i vinternatt, Torbjørn Ellingsen, Korarr. Natalia Eliseeva, solist: Hilde Bergersen Ådland Felleskor, dirigent Natalia Eliseeva Julemotet, Eyvind Alnæs, Solister: Kristin Heldor Martinsen og Kristine Aksøy Alveng Felleskor, dirigent Nina T. Karlsen Deilig er jorden, B.S. Ingemann, arr. A. Öhrwall Opptreden, LIBOS, mandag 17. desember LillCanto, dirigent Kristine Aksøy Alveng, piano: Hilde Bergersen Ådland Jul, jul strålande jul, G. Nordqvist/E. Evers Klokkeklang, Torbjørn Ellingsen, Korarr. Natalia Eliseeva, Solist: Kristin Heldor Martinsen Vi går i vinternatt, Torbjørn Ellingsen, Korarr. Natalia Eliseeva, solist: Hilde Bergersen Ådland Deilig er jorden, fellessang, B.S. Ingemann, arr. A. Öhrwall Allsanger Glade jul Julekveldsvise, Alf Prøysen Romjulsdrøm, Alf Prøysen